یورپ و امریکی ممالک کے بچوں میں ہیپاٹائٹس کی پراسرار قسم کی تشخیص

کراچی – براعظم یورپ کے چند ممالک اور امریکا کے بچوں میں ہیپاٹائٹس کی پراسرار قسم کی تشخیص کے بعد ماہرین نے پریشانی کا اظہار کرتے ہوئے بیماری کے سراغ لگانے پر کام شروع کردیا

برطانوی نشریاتی ادارے ’بی بی سی‘ نے اپنی ایک رپورٹ میں بتایا ہے کہ ابتدائی طور پر کچھ ہفتے قبل برطانیہ کے درجنوں بچوں میں ہیپاٹائٹس کی پر اسرار قسم کی تشخیص ہوئی تھی، جس سے ملک میں پریشانی کا عالم پیدا ہوگیا تھا

تاہم اب امریکا سمیت یورپ کے دیگر پانچ ملکوں کے بچوں میں بھی اسی طرح کی ہیپاٹائٹس کی پراسرار قسم کی تشخیص ہوئی ہے، جس کی وجہ سے کئی بچوں کو ہسپتال منتقل کرنا پڑ گیا ہے

رپورٹ کے مطابق ہیپاٹائٹس کی پراسرار قسم سے بچوں کے جگر میں تیزابیت کی مقدار زیادہ ریکارڈ کی گئی ہے، تاہم فوری طور پر مذکورہ وائرس پھیلنے کے اسباب معلوم نہیں ہو سکے

تقریباً ایک ہی طرح کی ہیپاٹائٹس کی پراسرار قسم کے کیسز برطانیہ، امریکا کے علاوہ ڈنمارک، آئرلینڈ اور نیدرلینڈ میں بھی ریکارڈ کیے گئے ہیں

مذکورہ قسم کے حوالے سے برطانوی ماہرین نے بتایا تھا کہ یہ روایتی ہیپاٹائٹس سے مختلف ہے

یورپین سینٹر فار ڈیزیز کنٹرول (ای سی ڈی سی) کے مطابق ابھی یہ واضح نہیں ہے کہ مذکورہ پراسرار قسم نے کتنے بچوں کو متاثر کیا ہے، تاہم اب تک یہ قسم چار یورپی ممالک میں ریکارڈ ہو چکی ہے

دوسری جانب عالمی ادارہ صحت (ڈبلیو ایچ او) نے بھی کہا ہے کہ ابھی تک ہیپاٹائٹس کی مذکورہ قسم سے آئرلینڈ میں پانچ سے بھی کم کیسز جب کہ اسپین میں تین کیسز سامنے آ چکے ہیں لیکن آنے والے دنوں میں مزید کیسز سامنے آنے کا خدشہ ہے

امریکی ریاست الاباما کے ماہرین کے مطابق اب تک ایک سے چھ سال کی عمر کے نو بچوں میں مذکورہ پراسرار قسم کی تشخیص ہو چکی ہے، تشویشناک بات یہ ہے کہ ان میں سے دو بچوں کا ہنگامی بنیادوں پر جگر کا ٹرانسپلانٹ بھی کرنا پڑا

واضح رہے کہ ہیپاٹائٹس کا وائرس جگر کو متاثر کرتا ہے اور مرض بڑھ جانے سے ہیپاٹائٹس کینسر میں تبدیل ہوجاتا ہے، مذکورہ پراسرار وائرس بھی بچوں کے جگر کو سخت متاثر کر رہا ہے. اس سلسلے میں پریشان کن بات یہ ہے کہ ماہرین اس پراسرار وائرس کے پھیلنے کی وجوہات کا تاحال پتہ نہیں چلا سکے ہیں.