دنیائے فٹبال کے ارجنٹینی اسٹار لیونل میسی کے بعد پرتگالی اسٹار کرسٹیانو رونالڈو نے بھی کلب یوونٹس کو چھوڑ دیا ہے اور بارہ سال بعد دوبارہ اپنے سابقہ کلب مانچسٹر یونائیٹڈ کو جوائن کر لیا ہے
خبر رساں ایجنسی اے ایف پی کے مطابق مانچسٹر یونائیٹڈ نے جاری بیان میں کہا ہے کہ یونائیٹڈ یہ بتاتے ہوئے انتہائی خوشی محسوس کرتا ہے کہ کرسٹیانو رونالڈو کے ٹرانسفر کے لیے کلب کا یوونٹس سے معاہدہ ہو گیا ہے اور کلب میں ہر کسی کی نظریں کرسٹیانو رونالڈو کو خوش آمدید کہنے پر مرکوز ہیں
قبل ازیں مانچسٹر یونائیٹڈ کے منیجر اولے سولسکجر نے رونالڈو سے معاہدے کا عندیہ دیتے ہوئے کہا تھا کہ کرسٹیانو رونالڈو اس کلب کے لیجنڈ ہیں، اگر آپ مجھ سے پوچھیں تو وہ عظیم ترین کھلاڑی ہیں
اسکائی اسپورٹس اٹالیا کے مطابق مانچسٹر یونائیٹڈ نے یوونٹس کو 33ملین ڈالر کی پیشکش کی اور 25ملین یوروز کے عوض سپر اسٹار فٹبالر سے معاہدہ طے ہوا
یاد رہے کہ پانچ مرتبہ چیمپیئنز لیگ جیتنے کا اعزاز جیتنے والے رونالڈو نے پہلی مرتبہ مانچسٹر یونائیٹڈ کے لیے کھیلتے ہوئے پہلی مرتبہ چیمپیئنز لیگ جیتی تھی
یاد رہے کہ 2003ع سے 2009ع کے درمیان کلب کی نمائندگی کرتے ہوئے پرتگالی اسٹار نے بہترین کھیل پیش کرتے ہوئے 292 میچوں میں 119 گول اسکور کیے تھے اور تین پریمیئر لیگ ٹائٹل کلب کو جتوانے میں اہم کردار ادا کیا تھا
اس سے قبل رونالڈو کے یوونٹس سے مانچسٹر سٹی جانے کی خبریں زیر گردش تھیں لیکن گزشتہ چوبیس گھنٹوں کے دوران ڈرامائی تبدیلی کے نتیجے میں رونالڈو کا دوبارہ مانچسٹر یونائیٹڈ سے معاہدہ ہو گیا ہے
واضح رہے کہ کرسٹیانو رونالڈو 2009ع میں انگلش کلب مانچسٹر یونائیٹڈ کو چھوڑ کر ریال میڈرڈ کا حصہ بنے تھے اور اس وقت دنیا کے سب سے مہنگے کھلاڑی قرار پائے تھے
چھتیس سالہ رونالڈو نے اسپین میں نو سال قیام کے دوران ریال میڈرڈ کے لیے پندرہ ٹرافیاں جیتیں جس میں چار مرتبہ چیمپیئنز لیگ جیتنا بھی شامل ہے
پانچ مرتبہ بیلن ڈی اور جیتنے والے رونالڈو نے ریال میڈرڈ کے لیے کھیلتے ہوئے کلب کے لیے سب سے زیادہ گول اسکور کرنے کا عظیم فٹبالر راؤل کا ریکارڈ توڑا اور 438 میچوں میں 451 گول اسکور کیے تھے۔
رونالڈو نے 2018ع میں میڈرڈ سے نو سالہ رفاقت کا خاتمہ کرتے ہوئے یوونٹس کو جوائن کر لیا تھا ارو ان کا کلب سے چار سال کے لیے ایک سو ملین ڈالر کا معاہدہ ہوا تھا۔
