بھارتی وزیراعظم نریندر مودی کا ٹوئٹر اکاؤنٹ ایک بار پھر ہیک ہو گیا

نئی دہلی – بھارت کے وزیراعظم نریندر مودی کا ٹوئٹر اکاؤنٹ ایک مرتبہ پھر ہیک ہو گیا، تاہم اس کا دورانیہ مختصر تھا

بھارتی وزیراعظم کے دفتر سے اتوار کو کیے جانے والے ٹویٹ میں بتایا گیا ہے کہ یہ معاملہ ٹوئٹر انتظامیہ کو رپورٹ کیا گیا تھا

وزیر اعظم کے دفتر سے کیے جانے والے ٹویٹ کے مطابق یہ معاملہ ٹوئٹر انتظامیہ کے علم میں لایا گیا اور وزیراعظم کا ذاتی ٹوئٹر ہینڈل فوری طور پر محفوظ کر لیا گیا

ٹویٹ میں بھارتی وزیراعظم کے دفتر نے ٹوئٹر صارفین سے درخواست کی ہے کہ اس دوران کیے جانے والے کسی بھی ٹویٹ کو نظرانداز کر دیا جائے

تاہم یہ بات فوری طور پر واضح نہیں کی گئی کہ بھارتی وزیراعظم کا سات کروڑ تیس لاکھ فولوورز کا ذاتی ٹوئٹر اکاؤنٹ کتنی دیر تک ہیک رہا

دوسری جانب خبر رساں ادارے روئٹرز کو ای میل پر دیے گئے بیان میں ٹوئٹر کے ایک ترجمان نے بتایا کہ ٹوئٹر کو جیسے ہی اس سرگرمی کے بارے میں معلوم ہوا، انتظامیہ نے فوراً اس اکاؤنٹ کو محفوظ کرنے کے لیے ضروری اقدامات لیے

ترجمان کا مزید کہنا تھا کہ تحقیقات سے انکشاف ہوا ہے کہ اب تک کسی اور متاثر اکاؤنٹ کی کوئی تفصیلات نہیں ہیں

یاد رہے اس سے قبل ستمبر 2020ع میں بھی وزیراعظم نریندر مودی کا ذاتی ٹوئٹر ہینڈل ہیک ہوا تھا

اُس وقت ہیکرز کی جانب سے کچھ ٹویٹس جاری کیے گئے تھے، جن میں فولوورز سے کرپٹو کرنسی کے ذریعے امدادی فنڈ میں پیسے عطیہ کرنے کی درخواست کی گئی تھی.