کوئٹہ : صوبائی وزرا سمیت ناراض اراکین اسمبلی نے وزیراعلیٰ بلوچستان جام کمال خان کو مستعفی ہونے کے لیے کل شام 6 بجے تک کی مہلت دی ہے
بلوچستان اسمبلی میں صوبائی وزرا سمیت ناراض اراکین اسمبلی نے مشترکہ پریس کانفرنس کی
صوبائی وزیر خزانہ ظہور بلیدی نے کہا کہ وزیراعلیٰ بلوچستان جام کمال پر بی اے پی (باپ پارٹی) کے گیارہ اور چند اتحادی اراکین نے عدم اعتماد کا اظہار کیا، جس کی وجہ صوبے میں بے چینی بڑھ گئی بے ، ہم نے وزیراعلیٰ کو مستعفی ہونے کے لیے دو ہفتوں کا وقت دیا تھا، لیکن انہوں نے استعفیٰ دینے کی بجائے سوشل میڈیا پر ہمارے درمیان اختلافات کا تاثر دینے کی کوشش کی
صوبائی وزیر خزانہ ظہور بلیدی نے کہا کہ ہم تحریک عدم اعتماد کی صورت میں اسمبلی جائیں، اس سے بہتر ہے کہ وزیراعلیٰ خود ہی فوری استعفیٰ دے دیں
اس موقع پر رکن اسمبلی نصیب اللہ مری کا کہنا تھا کہ وزیراعلیٰ استعفیٰ دیں آئندہ وزیراعلیٰ بی اے پی سے ہی ہوگا
جبکہ صوبائی وزیر اسد بلوچ کا کہنا تھا کہ وزیراعلیٰ اپنے اتحادیوں کے ساتھ وعدوں پر پورا نہیں اترے، انہوں نے خود کو عقل کل سمجھا ہماری کسی بات کو خاطر میں نہیں لائے، وہ عہدے سے چمٹے رہنے پر بضد ہیں، لیکن اراکین کا اعتماد انہیں حاصل نہیں رہا
انہوں نے کہا کہ جام کمال کو کل شام 6 بجے تک کا وقت دیتے ہیں، کل تک استعفیٰ نہیں دیا تو تحریک عدم اعتماد سمیت دیگر آپشنز پر غور کریں گے.
