کراچی : نادرا کی جانب سے سندھ میں مزید تین میگا سینٹر قائم کرنے کا فیصلہ کیا گیا ہے، کراچی میں دو جب کہ حیدر آباد میں ایک میگا سینٹر بنایا جائے گا
نادرا حکام کی جانب سے کراچی، حیدرآباد سمیت دیہی سندھ میں سہولیات کی فراہمی کے لئے بڑی پیش رفت سامنے آئی ہے. نادرا نے سندھ میں مزید تین میگا سینٹرز کے قیام کا فیصلہ کیا ہے، جن میں سے دو میگا سینٹرز کراچی جبکہ ایک حیدرآباد میں بنایا جائے گا، اور تینوں میگا سینٹرز پر دوشفٹوں میں سہولیات فراہم کی جائیں گی
ذرائع کے مطابق کراچی میں ملیر اور ضلع شرقی میں ایک ایک میگا سینٹرز کا قیام عمل میں لایا جائے گا، لیاقت آباد اور کورنگی سینٹرز کی تزئین و آرائش کے بعد دو شفٹوں میں سہولیات فراہم کی جائیں گی، وراثتی سرٹیفکیٹ کے اجراء کے لیے عوامی مرکز میں ایک خصوصی سینٹر بھی قائم کیا جائے گا
ذرائع نے بتایا ہے کہ کراچی میں چار ایم آر وی (موبائل رجسٹریشن وین) کا بھی اضافہ کردیا گیا ہے، مزید چار ایم آر وی کی شمولیت کے بعد نادرا سندھ کی موبائل رجسٹریشن وین کا مجموعی فلیٹ تئیس کا ہوگیا ہے
جب کہ ٹھٹہ کی تحصیل گھوڑا باری، میرپورخاص کی تحصیل سندھڑی اور عمرکوٹ کی تحصیل سامارو میں نئے سینٹرز قائم کیے جائیں گے
بتایا گیا ہے کہ حیدرآباد سمیت دیہی سندھ میں نئے منصوبوں کی تکمیل کی ڈیڈ لائن 31 دسمبر ہے.
