کراچی : سندھ انسٹیٹیوٹ آف یورولوجی اینڈ ٹرانسپلانٹیشن (ایس آئی یو ٹی) نے روبوٹک سرجری پروگرام آغاز کر دیا ہے
سرجری کی یہ قسم جدید ترین طریقہ علاج تصور کی جاتی ہے۔ اس سلسلے میں ہسپتال میں حال ہی میں روبوٹکس کے دو نئے یونٹس کی تنصیب عمل میں آئی ہے
اس جدید سرجریکل نظام کو کیمبرج روبوٹکس نے تیار کیا ہے اور یہ بھارت، جنوبی امریکا اور مشرق وسطیٰ میں سرجری کی پیچیدہ بیماریوں میں کامیابی سے استعمال ہورہی ہے
ادارے کی جانب سے جاری پریس ریلیز میں نئی سہولت کی تنصیب کو ایک اہم پیش رفت قرار دیا گیا ہے، کیونکہ اس ٹیکنالوجیکل سرجری کے نئے طریقوں کے علاج کی نئی راہیں کھلیں گی
اعلامیے کے مطابق اس وقت روزانہ کی بنیاد پر مریض روبوٹک کے ذریعے سرجری کے میدان میں علاج سے مستفید ہو رہے ہیں
واضح رہے کہ روبوٹک سرجری کو سرجیکل سائنسز کی دنیا کا ایک انقلابی قدم قرار دیا جاتا ہے، کیونکہ اس سرجری کے ذریعے علاج سے نمایاں طور پر درد میں کمی ، خون کے کم زیاں اور انفیکشن کا خطرہ بہت کم ہونے کے فوائد حاصل ہوتے ہیں ۔ اس کے علاوہ ہسپتال سے جلد فراغت ملنے کے علاوہ روزمرہ کے کام معمول کے مطابق کئے جا سکتے ہیں
اعلامیے میں بتایا گیا ہے کہ ایس آئی یوٹی میں نصب نئے روبوٹک نظام کے تحت رواں ماہ نومبر کی 4 تاریخ کو چند مریضوں کی سرجری کی گئی، جس کے شاندار نتائج سامنے آئے ہیں۔ اس سے قبل 2017ع میں ایس آئی یو ٹی نے مریضوں کی سرجری کے لئے سول ہسپتال کراچی کے تعاون سے روبوٹک سرجیکل سہولیات فراہم کر نے کا آغاز کیا تھا۔ اب ایس آئی یو ٹی میں دو نئے روبوٹک سرجیکل یونٹس کی تنصیب سے مریضوں کی ایک بڑی تعداد مستفیض ہوگی، جبکہ ادارے میں لیپروسکوپک اور دیگر سرجری کے شعبہ جات کے ساتھ ساتھ شعبہ ایمرجینسی معمول کےمطابق چوبیس گھنٹے جاری رہیں گی
ایس آئی یو ٹی کی پریس ریلیز کے مطابق ابتدائی طور پر ورسیس روبوٹک سسٹم کی ٹیکنالوجی سے شعبہ گردہ و مثانہ کے مریض مستفید ہوسکیں گے، جس کے بعد اس کا دائرہ ادارے کے دیگر شعبوں جن میں معدہ و جگر، شعبہ امراض نسواں، اور بڑی آنت تک بڑھا دیا جائے گا
اس کے علاوہ علاقائی سطح پر سرجری سے وابستہ افراد کی پیشہ ورانہ صلاحیتوں میں اضافے کے لئے ایس آئی یو ٹی کے زیر اہتمام تربیتی پروگرام کا آغاز بھی جلد ہوگا.
