کراچی – یہ تو ہم میں سے تقریباً ہر ایک کو علم ہے کہ دنیا کی بلند ترین عمارت برج الخلیفہ ہے اور دبئی میں واقع ہے، لیکن دنیا کی دوسری بلند ترین عمارت کے بارے میں بہت کم لوگوں کو معلوم ہے
اب دنیا کی دوسری بلند ترین عمارت بھی ایک اور مسلم ملک ملائیشیا تعمیر ہو رہی ہے
ملائیشیا کے دارالحکومت کوالالمپور میں 118 منزلہ عمارت شہر کے مختلف حصوں سے صاف نظر آجاتی ہے، جس کی بلندی 2227 فٹ ہے،، جبکہ برج خلیفہ کی بلندی 2717 فٹ پے اور اس وقت دوسری بلند ترین عمارت کا اعزاز شنگھائی ٹاور کے پاس ہے، جس کی بلندی 2073 فٹ ہے
اب کوالالمپور میں تعمیر ہونے والی دنیا کی دوسری بلند ترین عمارت کے اختتامی مرحلے کی 30 نومبر کو منعقدہ تقریب میں ملائیشین وزیراعظم اسماعیل صابری یعقوب نے اس منصوبے کو ”مستقبل کا آئیکونک ٹاور“ قرار دیا ہے
انہوں نے کہا کہ یہ نہ صرف انجنیئرنگ کی بے مثال کامیابی ہے، بلکہ اس سے ملائیشیا کی جدید اور ترقی پذیر ملک کی حیثیت مزید مضبوط ہوگی
اس عمارت کے بارے میں سامنے آنے والی تفصیلات کے مطابق یہ اکتیس لاکھ اسکوائر فٹ رقبے پر پھیلی ہوئی ہے، جس میں سے پچاس فیصد سے زیادہ حصہ دفاتر کے لیے مختص ہوگا
اس کے علاوہ ٹاور میں ایک شاپنگ مال، ایک مسجد، پارک حیات ہوٹل اور جنوب مشرقی ایشیا کا بلند ترین آبزرویشن ڈیک بھی ہوگا
چار ایکڑ کے وسیع رقبے پر مشتمل عوامی مقامات اور ایک پارک بھی گراؤنڈ لیول پر ہوگا
اس منصوبے کے پیچھے آسٹریلین ماہرِ تعمیرات فینڈر کیٹسالڈز تھے اور ان کا کہنا ہے کہ اس عمارت کا تکونی انداز ملائیشین ثقافت کی عکاسی کرتا ہے
انہوں نے کہا کہ یہ ڈیزائن اس ملک کے لوگوں کی بھرپور ثقافت کی عکاسی کرتا ہے
اس عمارت کو تعمیر کرنے والی کمپنی کے مطابق دنیا کی دوسری بلند ترین عمارت کے اعزاز کا حصول ایک ”اضافی بونس“ ہے
واضح رہے کہ اس عمارت کی تعمیر کا اعلان 2010ع میں ہوا تھا، جبکہ اس کی بنیاد پانچ سال قبل رکھی گئی تھی. اس عمارت کو 2021 میں ہی عوام کے لیے کھولا جانے تھا، لیکن مارچ 2020ع میں کورونا وبا کی پابندیوں کی وجہ سے اس کا تعمیراتی کام عارضی طور پر روک دیا گیا تھا، جس کے باعث اس میں تاخیر ہوئی.
