اسلام آباد – پاکستان کے وزیراعظم عمران خان نے قوم سے خطاب کرتے ہوئے بجلی، پٹرول اور ڈیزل کی قیمتوں میں کمی کرنے کا اعلان کیا ہے
وزیراعظم عمران خان نے پیر کی شام قوم سے خطاب کرتے ہوئے کہا کہ آئندہ بجٹ تک بجلی، ڈیزل اور پٹرول کی قیمتوں میں اضافہ نہیں کیا جائے گا
انہوں نے اپنے خطاب میں بجلی پانچ روپے فی یونٹ کمی کا اعلان کیا جبکہ ان کا کہنا تھا کہ ’ڈیزل اور پٹرول کی قیمتوں میں دس، دس روپے فی لیٹر کمی کا اعلان کرتا ہوں۔‘
وزیراعظم نے خطاب میں کہا کہ ہم سمجھ رہے تھے کہ عالمی سطح پر تیل اور دیگر مصنوات کی قیمتیں ایک دم اوپر گئی ہیں، وہ اب نیچے آنی شروع ہوجائیں گی لیکن یوکرین کے اندر جو رہا ہے اور جنگ ہورہی ہے تو اب مجھے خوف ہے اور ہم نے مشورہ بھی کیا کہ اب قیمتیں نیچے نہیں آئیں گی
انہوں نے کہا کہ یہ جنگ ہوتی ہے تو تیل کی قیمت بھی اوپر ہوگی، پھر دنیا کی 30 فیصد گیس وہاں سے آتی ہے تو گیس کی قیمت بھی اوپر جائے گی
ان کا کہنا تھا کہ ہم نے روس سے کہا ہوا ہے کہ 20 لاکھ ٹن گندم چاہیے لیکن اب گندم کی قیمت بھی اوپر جائے گی
وزیراعظم نے کہا کہ ہم نے ایک فیصلہ کیا کہ ملک میں اس وقت سب سے بڑا مسئلہ پیٹرول اور ڈیزل کا ہے، ان کی قیمتیں اور اوپر گئیں تو لوگوں پر مزید بوجھ پڑے گا
ان کا کہنا تھا کہ پاکستان میں آج بھی پیٹرول اور ڈیزل کی قیمتیں، جب اپوزیشن کہتے ہیں پیٹرول اور ڈیزل مہنگا ہوگیا تو مجھے بتائیں کہ ان کے پاس اس کا کیا حل ہے
انہوں نے کہا کہ ہمیں باہر سے درآمد کرنا پڑتا ہے، اب تیل اوپر چلا جائے گا تو ہم اس پر کیا کریں، اگر ان کے پاس کوئی حل ہے تو ہمیں بتادیں، کیونکہ اس وقت بھی پاکستان دنیا کے 190 ممالک میں سے 25 ویں نمبر پر ہے جہاں پیٹرول اور ڈیزل سب سے کم فروخت ہوتا ہے
دیگر ممالک سے پیٹرول کی قیمتوں کا موازنہ کرتے ہوئے انہوں نے کہا کہ پاکستان میں اس وقت پیٹرول 160 روپے فی لیٹر ہے، بھارت میں 260 روپے لیٹر، بنگلہ دیش میں 185 روپے لیٹر، ترکی میں 200 روپے لیٹر ہے
انہوں نے کہا کہ اگر ہم ہر مہینے 70 ارب روپے کی سبسڈی دیتےہیں، اگر حکومت یہ سبسڈی نہ دے تو آج پیٹرول کی قیمت فی لیٹر 220 روپے ہوگی
ان کا کہنا تھا کہ میرے پاس اوگرا کی سمری آئی، انہوں نے کہا پیٹرول او ڈیزل فی لیٹر 10 روپے بڑھانا پڑے گا، کیونکہ دنیا میں تیل مہنگا ہوچکا ہے
وزیراعظم نے کہا کہ میں آج آپ کے سامنے آج بڑی خوش خبری سنانا چاہتا ہوں کہ بجائے 10 روپے بڑھانے کے ہم نے فیصلہ کیا ہے پیٹرول اور ڈیزل کو 10 روپے کم کر رہے ہیں
ان کا کہنا تھا کہ بجلی 60 بھی درآمدی ایندھن سے بنتی ہے، جیسے ہی باہر گیس، کوئلہ اور تیل مہنگا ہوتا ہے یا ہمارا فیول ایڈجسٹمنٹ چارج ہوتا ہے تو قیمت اوپر چلی جاتی ہے لیکن ہم نے فیصلہ کیا کہ اپنے لوگوں کو اس سے بچالیں گے
وزیراعظم نے بتایا کہ ہم نے فیصلہ کیا ہے کہ بجلی 5 روپے فی یونٹ کم کر رہے ہیں، اس کا مطلب یہ ہے کہ آپ کے بجلی کے بل 20 فیصد سے 50 فیصد کم ہوں گے
انہوں نے کہا کہ ہم اس کے لیے بڑی محنت سے اور جگہ سے سبسڈی نکالی ہے کیونکہ لوگوں کو سب سے بڑا مسئلہ بجلی اور پیٹرول سے ہوتا ہے اور اس کی وجہ سے چیزیں مہنگی ہوجاتی ہیں
ان کا کہنا تھا کہ ہم نے فیصلہ کیا ہے کہ اگلے بجٹ ان دو چیزوں میں کوئی اضافہ بھی نہیں کریں گے اور اس سے پہلے ہم نے کم بھی کردیا، 5 روپے بجلی جبکہ پیٹرول اور ڈیزل کا پورے 20 روپے بنتا ہے
عمران خان نے قوم سے خطاب میں آئی ٹی کمپنیوں اور فری لانسرز کو ٹیکس میں سو فیصد چھوٹ دینے کا بھی اعلان کیا
انہوں نے کہا کہ احساس پروگرام کے تحت ملنے والی رقم کو بارہ ہزار سے بڑھا کر چودہ ہزار کر دیا گیا ہے۔ اس کے علاوہ انہوں نے بے روزگار گریجویٹ نوجوانوں کو تیس ہزار روپے کی انٹرن شپ دلوانے کا بھی اعلان کیا ہے
صحت کارڈ کے حوالے سے بات کرتے ہوئے وزیراعظم عمران خان نے کہا کہ مارچ کے آخر تک پنجاب میں ہر گھرانے کے پاس صحت کارڈ ہوگا۔ ’ہر خاندان سرکاری اور نجی ہسپتالوں میں جا کر دس لاکھ روپے تک علاج کروا سکتا ہے۔‘
خارجہ پالیسی
وزیر اعظم عمران خان نے پیر کو قوم سے خصوصی خطاب میں ملک کی خارجہ پالیسی پر گفتگو کرتے ہوئے کہا کہ میں نے حال ہی میں دو دورے کیے، ان میں سے ایک چین اور دوسرا روس کا تھا
ان کا کہنا تھاکہ دنیا میں تیزی سے صورت حال بدل رہی ہے اور اس کے پاکستان پر اثرات مرتب ہو رہے ہیں
انہوں نے کہا کہ جب سے میں نے سیاست شروع کی تو میری ہمیشہ سے خواہش تھی کہ پاکستان کی خارجہ پالیسی آزاد ہو، آزاد خارجہ پالیسی کا مطلب یہ ہوتا ہے کہ قوم اپنے لوگوں کے فائدے کے لیے خارجہ پالیسی بنائے اور وہ پالیسی نہ بنائے جو کسی اور کے فائدے کا سبب بنے اور اپنے ملک کو نقصان پہنچا دے
ان کا کہنا تھا کہ ہم نے جب امریکا کی دہشت گردی کے خلاف جنگ میں حصہ لیا تو میں شروع سے کہتا تھا کہ ہمارا اس جنگ سے کوئی تعلق نہیں تھا، 9/11 میں کوئی پاکستانی ملوث نہیں تھا، میں اس وقت سے کہتا تھا کہ ہمیں اس میں شرکت نہیں کرنی چاہیے
عمران خان نے کہا کہ ہم نے پہلے امریکا کی جنگ میں سوویت یونین کے خلاف شرکت کی اور جب دس سال کے بعد پھر شرکت کی تو پہلے وہ جہاد تھا، لیکن جب امریکا افغانستان آیا تو اس نے اسے دہشت گردی کا نام دے دیا، میں اس پالیسی کے خلاف تھا کیونکہ یہ خارجہ پالیسی پاکستانیوں کے فائدے کے لیے نہیں بنائی گئی
ان کا کہنا تھا کہ اس جنگ کی وجہ سے اَسی ہزار پاکستانیوں کی شہادتیں ہوئیں، پینتیس لاکھ لوگوں کی نقل مکانی ہوئی، قبائلی علاقہ تباہ ہوا، ملک کو ڈیڑھ سو ارب ڈالر سے زائد نقصان ہوا لیکن اس کی سب سے شرمناک بات یہ تھی کہ دنیا کی تاریخ میں پہلی مرتبہ ایک ملک کسی کی حمایت میں جنگ لڑ رہا تھا اور وہ ملک اسی ملک پر بمباری کر رہا تھا
انہوں نے کہا کہ ہمارے ملک میں چار سو سے زائد ڈرون حملے کیے گئے، جنرل مشرف کے دور میں صرف دس ڈرون حملے کیے گئے لیکن جو دو جمہوری لیڈرز آصف زرداری اور نواز شریف آئے تو ان کے دس سال میں چار سو ڈرون حملے کیے گئے
وزیراعظم نے کہا کہ آزاد خارجہ پالیسی ہوتی تو ان دونوں رہنماؤں کو امریکا کو کہنا چاہیے تھا کہ آپ کی بمباری سے ہمارے بچے، عورتیں اور بے قصور لوگ مررہے ہیں، تو کیا اس وقت دو جمہوری رہنماؤں کو اس پر کوئی اسٹینڈ نہیں لینا چاہیے تھا؟ اس پر ایک بیان تک نہیں دیا بلکہ امریکی صحافی نے اپنی کتاب میں لکھا کہ ‘آصف زرداری نے امریکی آرمی چیف سے کہا کہ ڈرون حملوں میں کولیٹرل نقصان سے مجھے کوئی فرق نہیں پڑتا’
ان کا کہنا تھا کہ یہ اس لیے تھا کہ یہ ملک کی بہتری کے بجائے اپنے پیسے بچانے کے لیے کرتے ہیں اور آج جنگ کے آغاز کے بعد سے روس کے بڑے بڑے کاروباری افراد کے امریکا اور برطانیہ نے اپنے بینکوں میں موجود اثاثے منجمد کرنے شروع کردیے ہیں، اس لیے ہمارے ملک کی پالیسی آزاد ہو ہی نہیں سکتی
انہوں نے قوم کو پیغام دیتے ہوئے کہا کہ اگر آپ اس ملک میں آزاد خارجہ پالیسی چاہتے ہیں تو کبھی اس پارٹی کو ووٹ نہ دیں جس کے پیسے، دولت اور جائیداد پاکستان سے باہر پڑی ہے کیونکہ وہ کبھی آزاد خارجہ پالیسی نہیں بنائیں گے
عمران خان نے کہا کہ میں نے جتنے بھی دورے کیے، جس میں دو چین کے اہم دورے تھے، اس میں ہمارے ملک کو بھی عزت ملی اور وقت ثابت کرے گا کہ ہم نے چین اور روس دونوں جگہ زبردست بات چیت کی
انہوں نے دورہِ روس کی وضاحت دیتے ہوئے کہا کہ ہمیں روس اس لیے جانا تھا کیونکہ ہمیں بیس لاکھ ٹن گندم روس سے امپورٹ کرنی ہے اور دوسری اہم چیز یہ ہے کہ روس دنیا کا وہ ملک ہے جس میں دنیا کی 30فیصد گیس ہے، تو پاکستان کی گیس میں کمی کے پیش نظر ہم نے ان سے گیس کے معاہدے کیے ہیں اور ہم ان سے گیس امپورٹ کریں گے جبکہ چین سے ہونے والے معاہدے خصوصاً سی پیک کے دوسرے مرحلے کے حوالے سے بھی تفصیلات سامنے آ جائیں گی
پیکا آرڈیننس
پریونشن آف الیکٹرانک کرائمز (پیکا) کے حوالے سے ان کا کہنا تھا کہ اس کے حوالے سے شور مچا ہوا ہے کہ آزادی صحافت کے اوپر پابندی لگائی جا رہی ہے اور لوگوں کے منہ بند کیے جارہے ہیں لیکن میں سب کو بتادوں کہ پیکا قانون 2016ع میں بنا تھا اور اس میں ہم صرف ترمیم کررہے ہیں۔
ان کا کہنا تھا کہ آج پاکستان کے اخبار اور میڈیا اٹھا کر دیکھ لیں تو اس میں 70فیصد خبریں ہمارے خلاف ہیں لیکن ہمیں اس سے کوئی فرق نہیں پڑتا البتہ یہ قانون ہم اس لیے لے کر آئے تاکہ پاکستان میں سوشل میڈیا پر آنے والے گند کو روکا جا سکے کیونکہ دنیا میں کسی بھی مہذب معاشرے میں اس طرح چیزیں نہیں آتیں، جو ہمارے سوشل میڈیا پر آ رہی ہیں
انہوں نے کہا کہ خواتین کو نشانہ بنایا جا رہا ہے، جس سے لوگوں کے گھر اجڑ رہے ہیں کیونکہ فیک نیوز سے گند اچھالا جا رہا ہے، ابھی تک ایف آئی اے میں رجسٹر چورانوے ہزار مقدمات میں سے صرف اڑتیس کا فیصلہ ہوا ہے
ان کا کہنا تھا کہ عام لوگوں کو تو چھوڑیں، وزیراعظم کو بھی نہیں بخشا جا رہا، ایک صحافی نے تین سال پہلے لکھا کہ ‘عمران خان کی بیوی گھر چھوڑ کر چلی گئی اور عمران خان نے بنی گالا میں کوئی غیرقانونی کام کیا ہے’ میں نے عدالت میں مقدمہ کیا لیکن تین سال گزرنے کے باوجود وزیراعظم کو انصاف نہیں مل رہا
عمران خان نے کہا کہ وہی صحافی پھر لکھ رہا ہے کہ وزیراعظم کی بیوی گھر چھوڑ کر چلی گئی ہیں، اگر ملک کے وزیراعظم کے ساتھ یہ ہو سکتا ہے تو سوچیں باقی لوگوں کا کیا ہوگا، اسی صحافی نے جب نواز شریف دور میں کرپشن پر لکھا تھا تو اسے تین دن بند کرکے ڈنڈے مارے گئے تھے
ان کا کہنا تھا کہ ہمارے وزیر کے خلاف ایک خاتون نے لکھا تو انہوں نے انگلینڈ میں جا کر انصاف لیا اور اب مراد سعید کے خلاف بات کی گئی ہے تو وہ بھی انگلینڈ میں جا کر مقدمہ کرنے کا سوچ رہے ہیں
انہوں نے کہا کہ شوکت خانم پر میڈیا ہاؤس جنگ گروپ نے لکھا کہ شوکت خانم کا پیسہ تحریک انصاف کو جا رہا ہے، اتنی بھی زحمت نہیں کی کہ کم از کم شوکت خانم سے پوچھ تو لیتے، حنیف عباسی نے بھی اسی طرح کا الزام لگایا تھا اور شوکت خانم ذیلی عدالتوں سے وہ مقدمہ جیت چکی ہے، اب شوکت خانم انگلینڈ میں جنگ گروپ پر مقدمہ کرنے جا رہا ہے
ان کا کہنا تھا کہ یہ دنیا میں کہیں بھی نہیں ہوتا، آزادی صحافت کے نام پر مافیاز بیٹھ کر بلیک میلک کر رہے ہیں، یہاں ایسے صحافی بیٹھے ہیں جو پیسے لے کر گند اچھال رہے ہیں اور بلیک میل کر رہے ہیں، جس طرح کی غیرذمے دارانہ چیزیں یہاں آتی ہیں، کسی کی ہمت نہیں ہو سکتی کہ یہی جا کر آپ کسی اور جمہوریت میں کریں
وزیراعظم نے کہا کہ میں نے الیکشن جیتنے پر آزاد کشمیر کے وزیر اعظم کو نامزد کیا تو تین مرکزی اخباروں کے صفحہ اول پر آتا ہے کہ جادو ٹونے سے ستارے دیکھ کر آزاد کشمیر کے وزیراعظم کو منتخب کیا گیا، یہی چیز کہیں بھی انگلینڈ یا مغرب کے اخباروں میں کی جاتی تو ان پر اتنا بڑا ہرجانہ ہونا تھا کہ ان کے اخبار ہی بند ہو جاتے
کورونا، معاشی مسائل اور مہنگائی
وزیراعظم نے خطاب کے دوران 2018ع میں حکومت میں آنے کے بعد درپیش معاشی صورتحال، گردشی قرضوں کا بھی تفصیلی ذکر کیا اور کورونا کے دوران حکومت کی جانب سے عوام کی بہتری کے لیے کیے گئے اقدامات کا بھی احاطہ کیا
انہوں نے کورونا کی وجہ سے دنیا بھر مین بڑھتی ہوئی مہنگائی کا تذکرہ کرتے ہوئے کہا کہ چالیس سال میں سب سے زیادہ مہنگائی دنیا کی تگڑی ترین معیشت امریکا میں ہوئی، وہاں 1.5فیصد سے زیادہ اشیا مہنگی نہیں ہوتیں لیکن وہاں مہنگائی 7.5فیصد تک پہنچ گئی
ان کا کہنا تھا کہ کینیڈا میں تیس سال کے بعد سب سے زیادہ مہنگائی آئی، برطانیہ میں 1992ع کے بعد سب سے زیادہ مہنگائی آئی جبکہ ترکی میں بھی بیس سال بعد سب سے زیادہ مہنگائی ہوئی
اس موقع پر انہوں نے مہنگائی کے حوالے سے سابقہ حکومتوں کے دور کے اعدادوشمار پیش کرتے ہوئے کہا کہ پیپلز پارٹی کے پہلے دور میں 13.9فیصد مہنگائی ہوئی ہے، دو سال تک چلنے والی حکومت کے دوسرے دور میں 8.34فیصد مہنگائی ہوئی، تیسرے دور میں 11.6فیصد اور چوتھے دور میں 13.6 فیصد مہنگائی ہوئی
عمران خان نے کہا کہ مسلم لیگ کے پہلے دور میں 10.08فیصد مہنگائی ہوئی، دوسرے دور میں 7.2فیصد اور تیسرے دور میں 5فیصد مہنگائی تھی حالانکہ ان کے تیسرے دور میں تیل کی قیمتیں سب سے کم تھیں جبکہ تحریک انصاف کے دور حکومت میں 8.3فیصد مہنگائی ہوئی
انہوں نے کہا کہ کورونا کی وجہ سے دنیا بھر میں مہنگائی کے ساتھ افغانستان کا بحران آ گیا اور اب یوکرین آ گیا، اس مشکل وقت میں پاکستان کی شرح نمو 5.6 فیصد تھی، یہ مسلم لیگ(ن) کے آخری دور میں تھی جب انہوں نے خسارہ کر کے اور قرض لے کر جس مقام تک پہنچایا، وہ تحریک انصاف کے تیسرے سال میں 5.6 فیصد تھی اور یہ ہم نہیں بلکہ ورلڈ بینک اس کی تصدیق کررہا ہے
ان کا کہنا تھا کہ ہم نے 31 ارب ڈالر کی ترسیلات زر موصول ہوئیں، ہم نے پاکستان کی تاریخ کی سب سے زیادہ 38 ارب ڈالر کی ایکسپورٹ کیں، ہماری ٹیکس جمع کرنے کی صلاحیت میں کورونا کے باوجود 31 فیصد اضافہ ہوا
ڈیمز
انہوں نے کہا کہ اگر ہم ڈیمز بنالیتے تو پاکستان کو بڑی سستی بجلی ملتی کیونکہ پانی سے بننے بجلی سے ہمیں کوئی فرق نہیں پڑتا کہ باہر مہنگائی ہو یا نہ ہو لیکن پچاس سال میں پاکستان میں کوئی ڈیم نہیں بنا
ان کا کہنا تھا کہ ہم پاکستان میں دس ڈیم بنا رہے ہیں اور اگلے پانچ سے دس سال میں یہ سارے ڈیم بنیں گے اور اس سے اگر باہر قیمتیں اوپر بھی چلی جائیں تو ہم اس سے بچ جائیں گے۔
احساس پروگرام
وزیراعظم نے کہا کہ احساس پروگرام کے تحت ہم 12 ہزار روپے دیتے تھے لیکن اس میں اب 14 ہزار روپے کردیا ہے
انہوں نے کہا کہ جن نوجوانوں نے بی اے کیا ہے اور ان کے پاس نوکری نہیں ہے تو ان کے لیے انٹرشپ دلانے کا فیصلہ کیا ہے اور گریجویٹ کو 30 ہزار روپے کی انٹرن شپ دلوائیں گے تاکہ ان کو پیسہ ملے
اسکالرشپس کے بارے میں انہوں نے بتایا کہ ہم وفاق اور اس کے زیر صوبوں میں 26 لاکھ ہم نے اسکالرشپس دے رہے ہیں اور اس کے لیے 38 ارب روپے خرچ کر رہے ہیں
انہوں نے کہا کہ وزیراعظم کے پورٹل کے اوپر سارا کنٹرول ہوگا، سارے میرٹ پر ہوگا، ہم خود چیک کریں گے اور اس پر ماہرین کی کمیٹی بنائی گئی ہے، کسی کو کوئی مسئلہ ہوگا تو وہ اس پورٹل پر آئے گا
عمران خان نے انفارمیشن ٹیکنالوجی کے شعبے کے لیے بھی مراعات کا اعلان کرتے ہوئے کہا کہ ہم نے ان کو 100 فیصد ٹیکس کی چھوٹ کا دے دی ہے اور غیرملکی زرمبادلہ پر 100فیصد چھوٹ دے دی ہے
انہوں نے مزید کہا کہ ہم نے انفارمیشن ٹیکنالوجی کے تمام اسٹارٹ اپس سے 100فیصد کیپیٹل گینس ٹیکس ختم کردیا ہے
انہوں نے نئی انڈسٹریل پالیسی کا اعلان کرتے ہوئے کہا کہ جو بھی انڈسٹری لگائے گا اس سے کوئی سوال نہیں پوچھے جائیں گے جبکہ بیمار صنعتوں کو ٹیکس میں چھوٹ دیں گے
وزیراعظم نے اوورسیز پاکستانیوں کو بھی اس سلسلے میں حوصلہ افزا خبر سناتے ہوئے کہا کہ اگر وہ پاکستان کی صنعت میں سرمایہ کاری کریں گے یا پاکستانی صنعتکاروں کے ساتھ مشترکہ منصوبے لگائیں گے تو انہیں پانچ سال تک کوئی ٹیکس نہیں دینا ہوگا
انہوں نے کامیاب جوان پروگرام کے تحت نوجوانوں اور کسانوں کو سود کے بغیر قرضے دینے اور گھر بنانے کے خواہشمند انتہائی غریب افراد کو بھی سستا قرض دینے کا اعلان کیا
وزیراعظم کے اہم اعلانات:
• پیٹرول اور بجلی کی قیمت میں بالترتیب 10 اور 5 روپے کمی
• اگلے بجٹ تک پیٹرول اور بجلی کی قیمتوں میں اضافہ نہیں ہوگا
• آئی ٹی کمپنیوں، فری لانسرز، فارن ایکسچینج پر ٹیکس استثنیٰ
• آئی ٹی کے کاروبار کے لیے کیپٹل گین کا استثنیٰ
• گریجویٹس کے لیے انٹرن شپس
• احساس پروگرام میں اضافہ کرکے 12 ہزار سے 14 ہزار روپے مقرر
