اندھیرے میں اپنی محبوبہ سے ملنے کے لیے کئی بار پورے گاؤں کی بجلی کاٹنے والے ’عاشق‘ کو بالآخر گاؤں کے لوگوں نے دھر لیا
نیوز 18 کی ایک رپورٹ کے مطابق بھارتی ریاست بہار کے ضلع پورنیہ کے گاؤں گنیش پور کی بجلی اکثر بند ہوجاتی تھی، جس پر مقامی لوگ پریشان تھے کیونکہ پورا گاؤں اندھیرے میں ڈوب جاتا
اس دوران گاؤں والوں نے ایک خاص بات یہ بھی نوٹ کی گئی کہ ہر شام کو ہی دو تین گھنٹے کے لیے ایک مخصوص وقت پر بجلی بند ہوجاتی تھی جبکہ قریبی علاقے کی بجلی بحال رہتی
معاملے میں الیکٹریشن کے ملوث ہونے کا شک گزرنے پر گاؤں والوں نے معاملے کی تہہ تک پہنچنے کا منصوبہ بنایا جو کافی فلمی سا لگتا ہے
طے پایا کہ معاملے کی تہہ تک پہنچنے کے لئے بجلی جاتے ہی چپکے سے باہر نکل کر دیکھا جائے اور کوئی مشکوک شخص نظر آئے تو اسے دھر لیا جائے
منصوبے کے مطابق بجلی منقطع ہونے پر کچھ لوگ چھپتے چھپاتے باہر نکلے، جنہیں ایک شخص سرکاری اسکول میں داخل ہوتا دکھائی دیا، وہ چپکے سے پیچھے گئے تو حیران رہ گئے
اسکول کے اندر داخل ہونے والا شخص الیکٹریشن تھا، جبکہ وہاں اس کی گرل فرینڈ بھی موجود تھی. اس شخص کو پکڑ کر پورے گاؤں میں پھرایا گیا
اس دوران انہوں نے بجلی کاٹنے کا اعتراف کرتے ہوئے کہا کہ اس کا مقصد یہ تھا کہ وہ اندھیرے کا فائدہ اٹھا کر اپنی گرل فرینڈ سے ملے اور جب بھی وہ ایسا کرتا، بجلی بند کر دیتا
صورت حال اس وقت مزید فلمی ہو گئی جب گاؤں والوں نے دونوں کو پولیس کے حوالے کرنے بجائے دونوں کی شادی کرانے کا اعلان کردیا
تقریب میں شامل ایک شخص نے بتایا کہ تھوڑی دیر بعد ہی گاؤں کے سرپنچ اور کونسل ارکان کی موجودگی میں شادی کر دی گئی
اس طرح بجلی کاٹنے اور چوری چھپے گرل فرینڈ سے ملنے کی سزا کے طور پر ان دونوں کی شادی کرا دی گئی
معاملے کے حوالے سے مقامی پولیس اسٹیشن کے انچارج وکاس کمار آزاد کا کہنا ہے کہ ان کو اس واقعے کا علم ہے مگر ابھی تک اس سے متعلق کوئی شکایت سامنے نہیں آئی ہے.
