احساس انڈرگریجویٹ اسکالرشپ پروگرام کے لئے درخواستوں کی وصولی کی تاریخ میں 30 نومبر تک توسیع کردی گئی ہے
احساس پروگرام کے حکام کے مطابق وزیر اعظم کی معاون خصوصی ڈاکٹر ثانیہ نشتر نے سال 21-2020 کے لئے درخواستیں جمع کروانے کے لئے آخری تاریخ میں توسیع کا اعلان کیا ہے، اب یہ درخواستیں 30 نومبر 2020ع تک جمع کروائی جا سکتی ہیں
اس سے قبل ، اسکالرشپ کی درخواستیں آن لائن جمع کروانے کی آخری تاریخ 30 اکتوبر ، 2020 مقرر کی گئی تھی
حکام کے مطابق ملک کی متعدد سرکاری یونیورسٹیوں میں داخلے میں کووڈ-19 کی وجہ سے تاخیر کے پیش نظر احساس اسکالرشپ درخواستوں کی آخری تاریخ میں توسیع کی گئی ہے تاکہ زیادہ سے زیادہ انڈرگریجویٹ طلباء کو اس اسکالرشپ کے لئے موقع فراہم کیا جا سکے۔
5 ستمبر 2020ع کو آن لائن ایپلیکیشن پورٹل دوبارہ کھولنے کے بعد سے اب تک سسٹم میں 30،000 درخواستیں موصول ہوچکی ہیں
جاری کردہ اعلامیے میں کہا گیا ہے کہ احساس انڈر گریجویٹ اسکالرشپ موجودہ حکومت کا ایک اہم پروگرام ہے جس کا مقصد کم آمدنی والے گھرانوں سے تعلق رکھنے والے طلباء کو اپنی تعلیم کے دوران وظائف مہیا کرنا ہے۔ ہائر ایجوکیشن کمیشن کے ذریعہ تسلیم شدہ پبلک سیکٹر کی 125 یونیورسٹیاں اس پروگرام کا حصہ ہیں۔
احساس انڈرگریجویٹ اسکالرشپ کم آمدنی والے ایسے خاندانوں سے تعلق رکھنے والے طلباء کی انڈرگریجویٹ تعلیم میں مدد فراہم کرتی ہے، جن کی ماہانہ آمدنی 45،000 روپے سے کم ہو. اہل طلبہ اپنی درخواست اس پورٹل کے ذریعے آن لائن جمع کر سکتے ہیں ۔
