دنیا کی مقبول ترین انسٹنٹ میسیجنگ ایپلیکیشن واٹس ایپ نے ایک میسیج میں دو جی بی مواد بھیجنے کا فیچر متعارف کرا دیا ہے
واٹس ایپ نے رواں ماہ کے آغاز میں ہی میسیج پر ’ایموجیز‘ کے ذریعے ریپلائی کرنے کا فیچر بھی متعارف کرایا تھا، علاوہ ازں میسیجنگ ایپ نے کسی بھی گروپ میں میمبرز کی تعداد بڑھانے کا فیچر بھی متعارف کرایا تھا
اب کمپنی نے میسیج کے ذریعے دو جی بی مواد تک بھیجنے کی اجازت بھی دے دی ہے ، کمپنی نے مذکورہ فیچر کا اعلان گزشتہ ماہ کیا تھا
پاکستان سمیت دنیا بھر کے صارفین میسیجز کے ذریعے دو جی بی کی وڈیو، آڈیو اور ڈاکیومینٹس فائل آسانی سے بھیج سکیں گے
اگر تاحال بعض صارفین میسیجز کے ذریعے دو جی بی تک مواد بھیجنے سے قاصر ہیں، تو انہیں مایوس ہونے کی ضرورت نہیں، جلد ہی ان کے پاس بھی نیا فیچر کام شروع کردے گا
علاوہ ازیں واٹس ایپ انتظامیہ کا کہنا ہے کہ اس بات کو بھی یقینی بنایا جا رہا ہے کہ میسیجز کے ذریعے بھیجے جانے والے مواد کا معیار متاثر نہ ہو
میسیجز کے ذریعے دو جی بی مواد بھیجنے کی اجازت دیے جانے کے بعد اب واٹس ایپ سب سے زیادہ مواد بھیجنے کی اجازت دینے والی اپیلیکیشن بن گئی ہے
حیرانگی کی بات یہ ہے کہ گوگل کی جی میل پر بھی صارفین ایک ای میل کے ذریعے پچیس ایم بی تک مواد بھیج سکتے ہیں، یعنی جی میل صارفین واٹس ایپ کے مقابلے 1900 فیصد کم مواد بھیج سکتے ہیں
یہیں نہیں بلکہ مائیکرو سافٹ کی آؤٹ لک ای میل پر بھی صارفین کو صرف بیس ایم بی مواد بھیجنے کی اجازت ہوتی ہے، یہاں تک کہ انسٹاگرام اور فیسبک بھی میسیجز کے ذریعے دو جی بی مواد بھیجنے کی اجازت نہیں دیتے
واٹس ایپ کی طرح صرف ٹیلی گرام ایپلیکیشن ایک میسیج کے ذریعے دو جی بی مواد بھیجنے کی سہولت فراہم کرتا ہے، اس کے علاوہ باقی تمام ایپس جن میں زوم، اسنیپ چیٹ، اسکائپ، گوگل چیٹ اور لنکڈ ان بھی شامل ہیں، ان میں سے کوئی بھی دو جی بی ڈیٹا شیئر کرنے کی سہولت فراہم نہیں کرتا.
