امریکی ملٹی نیشنل کمپنی جانسن اینڈ جانسن نے اعلان کیا ہے کہ وہ 2023 میں بچوں کے ٹیلکم پاؤڈر جانسن بے بی پاؤڈر کی دنیا بھر میں فروخت بند کر دے گی
خبر رساں ادارے روئٹرز کے مطابق کمپنی نے یہ اعلان جمعرات کو کیا
صارفین کے تحفظ کے حوالے سے دائر کیے گئے مقدمات کے بعد امریکہ میں 2020ع میں جانسن بے بی پاؤڈر کی فروخت روک دی گئی تھی، جس کے دو سال سے زیادہ عرصے کے بعد اب اسے دنیا بھر میں بند کرنے کا فیصلہ کیا گیا ہے
کمپنی نے کہا ہے ”عالمگیر جائزے کے حصے کے طور پر ہم نے مکمل طور پر مکئی کے نشاستے کی مدد سے پاؤڈر بنانے کا تجارتی فیصلہ کیا ہے“
کمپنی نے مزید کہا کہ مکئی کے نشاستے سے تیار کیا جانے والا بے بی پاؤڈر پہلے ہی دنیا بھر میں فروخت کیا جا رہا ہے
پاؤڈر سے کینسر: جانسن اینڈ جانسن کے خلاف دوارب ڈالر ہرجانہ برقرار
واضح رہے کہ جانسن اینڈ جانسن نے 2020ع میں اعلان کیا تھا کہ وہ امریکہ اور کینیڈا میں اپنے ٹیلکم بے بی پاؤڈر کی فروخت بند کر دے گی کیوں کہ متعدد قانونی مشکلات کے پیش نظر اس پروڈکٹ کے محفوظ ہونے کے حوالے سے، بقول کمپنی ’غلط معلومات‘ کی وجہ سے اس کی مانگ میں کمی آئی
کمپنی کو صارفین اور کینسر کے مرض میں مبتلا ہونے کے بعد زندہ بچ جانے والوں کی جانب سے تقریباً اڑتیس ہزار مقدمات کا سامنا ہے، جن میں دعویٰ کیا گیا ہے کہ جانسن اینڈ جانسن کی ٹیلکم مصنوعات کینسر کا سبب بنیں، کیوں کہ ان میں ایسبیسٹس شامل ہوتا ہے، جو کینسر کا سبب بننے کے لیے مشہور ہے
کمپنی نے ان الزامات کی تردید کرتے ہوئے کہا کہ کئی دہائیوں کی سائنسی جانچ اور ریگولیٹری منظوریوں نے اس کے ٹیلکم پاؤڈر کو محفوظ اور ایسبیسٹس سے پاک قرار دیا۔ جمعرات کو جب کمپنی نے اپنے بے بی پاؤڈر کی فروخت بند کرنے کا اعلان کیا تو تب بھی اس کی طرف سے یہ بیان دہرایا گیا۔
