گاڑیاں بنانے والی دنیا کی معروف کمپنی بی ایم ڈبلیو نے اب ایک برقی وِنگ سوٹ تیار کیا ہے جسے پہن کر آپ تین سو کلومیٹر فی گھنٹہ کی زبردست رفتار سے پرواز کر سکتے ہیں۔ اسے ڈیزائن ورکس اور مشہور اسکائی ڈائیرور پیٹر سیلزمان کے تعاون سے تیار کیا گیا ہے۔
اس ونگ برقی سوٹ کی تیاری کے لیے بی ایم ڈبلیو نے باقاعدہ ایک نیا ادارہ تشکیل دیا ہے۔ اس طرح کسی مدد کے بغیر انسان کی اڑنے کی ہزاروں سال پرانی خواہش پوری ہونا اب ممکن ہو گیا ہے۔ دلچسپ بات یہ ہے کہ اس کی آزمائش خود پیٹر سیلزمان نے کی ہے۔ اس کی آزمائش گزشتہ تین برس سے آسٹریائی ایلپس کی پہاڑیوں میں جاری تھی
پیٹر سیلزمان نے بی ایم ڈبلیو کمپنی کے ایک اعلامئے میں اپنی کامیابی کا اعلان ان الفاظ کے ساتھ کیا "پرواز آزادی کی بہترین قسم ہے۔ اس سے ہم ان دیکھے مقامات کی سعی کرتے ہیں اور نئے افق دریافت کرتے ہیں۔”
یہ لباس پہن کر وہ ہوائی جہاز سے دس ہزار فٹ کی بلندی سے کودے اور پروں کی طرح تیار کردہ پوشاک کو پہن کر ہوا میں تیرتے رہے۔ اس کے بعد انہوں نے برقی نظام کو چلایا اور اپنی رفتار بڑھا کر تین سو کلومیٹر فی گھنٹہ کی رفتار تک پہنچے
کمپنی کے مطابق عام طور پر وِنگ سوٹ سے ایک سو کلومیٹر فی گھنٹہ کی رفتار تک پہنچا جا سکتا ہے، لیکن اب برقی نظام کی بدولت یہ رفتار گلائیڈنگ سے آگے بڑھ چکی ہے اور وہ برق رفتاری سے طویل فاصلہ طے کرسکتے ہیں۔ اس میں دو عدد کاربن امپیلر یا پنکھے لگے ہیں جو 25 ہزار چکر فی منٹ کے لحاظ سے گھومتے ہیں اور پانچ منٹ میں غیر معمولی طور پر دھکیلنے کی قوت فراہم کرتے ہیں
کمپنی کی طرف سے دعویٰ کیا گیا ہے کہ سوٹ سمیت پورا نظام بہت ہلکا پھلکا ہے اور اسے لے کر آپ پہاڑ پر بھی چڑھ سکتے ہیں.
