پاکستان اور برطانیہ کے مابین مجرموں کی حوالگی کا معاہدہ طے پاگیا

پاکستان اور برطانیہ کے درمیان بڑا معاہدہ طے پا گیا ہے، جس کے تحت غیر ملکی مجرموں اور امیگریشن قوانین کی خلاف ورزی کرتے ہوئے فرار ہونے والے مجرموں کو برطانیہ سے پاکستان واپس لایا جا سکے گا

برطانیہ میں مقیم امیگریشن قانون کے ماہر محمد امجد نے اس معاہدے کو پاکستان کے لیے انتہائی منفی اور دھچکا قرار دیا ہے

برطانیہ کی ہوم سیکریٹری پریتی پٹیل نے ٹوئٹر پر جاری اپنے ایک بیان میں اس پیشرفت کو سراہتے ہوئے کہا ”مجھے فخر ہے کہ میں نے اپنے پاکستانی دوستوں کے ساتھ غیر ملکی مجرموں اور امیگریشن قوانین کی خلاف ورزی کرنے والے مجرموں کو برطانیہ سے پاکستان واپس منتقل کے لیے ایک تاریخی معاہدے پر دستخط کیے ہیں“

پریتی پٹیل نے مزید کہا کہ یہ معاہدہ ہمارے ’نیو پلان فار امیگرشن ان ایکشن‘ کی عملی شکل ہے

انہوں نے مزید کہا کہ خطرناک غیر ملکی مجرموں اور امیگریشن قوانین کی خلاف ورزی کرنے والوں کو برطانیہ میں رہنے کا کوئی حق نہیں ہے اور مجھے ایسے لوگوں کو برطانیہ سے بے دخل کرنے میں کوئی شرمندگی نہیں ہے

سیکریٹری داخلہ کی جانب سے جاری کردہ بیان میں کہا گیا ہے کہ برطانیہ میں بہت سے ایسے لوگ موجود ہیں، جو ہمارے قوانین کا غلط استعمال کرتے ہیں اور ہمارے قوانین سے کھلواڑ کرتے ہیں جب کہ ہم انہیں بے دخل نہیں کر سکتے

بیان میں مزید کہا گیا ہے کہ نیو پلان فار امیگرشن ان ایکشن معاہدہ، جس پر اپنے پاکستانی دوستوں کے ساتھ دستخط کرنے پر مجھے فخر ہے، حکومت کی جانب سے سنجیدہ اقدامات کو ظاہر کرتا ہے

پریتی پٹیل نے کہا کہ ہمارا نیا بارڈرز ایکٹ اس سلسلے میں مزید سہولت فراہم کرے گا اور آخری لمحات پر کی جانے والی اپیلوں کے سلسلے کو ختم کرنے میں مدد کرے گا، جو ایسے افراد کی ملک سے بے دخلی میں تاخیر کا باعث بنتا ہے

دوسری جانب، اس سلسلے میں پاکستانی ہائی کمیشن کی طرف سے جاری کردہ ایک بیان میں کہا گیا ہے کہ یہ معاہدہ اس معاہدے کی تجدید اور تازہ ترین صورتحال ہے جس میں اکتوبر 2009ع میں دو طرفہ طور پر طے کیا گیا تھا کہ پاکستان اور یورپی ممالک بغیر اجازت کے قیام پذیر افراد کو ملک سے بے دخل کریں گے

یورپی یونین سے برطانیہ کی علیحدگی کے بعد اس دوطرفہ معاہدے کی تجدید کی ضرورت تھی

اعلامیے کے ساتھ سماجی رابطے کی ویب سائٹ ٹوئٹر پر شیئر کی گئی ایک تصویر میں پریتی پٹیل کو سیکریٹری داخلہ یوسف نسیم کھوکھر کے ساتھ دستخط کی تقریب میں دکھایا گیا ہے

اعلامیے میں کہا گیا ہے کہ سیکریٹری داخلہ نے یوسف نسیم کھوکھر اور برطانیہ میں پاکستانی ہائی کمشنر معظم احمد خان سے دوطرفہ معاہدے پر دستخط کرنے کے لیے ملاقات کی

نئے معاہدے کے تحت، مجرموں، ناکام پناہ گزینوں اور امیگریشن قوانین کی خلاف ورزی کرنے والے مجرموں سمیت برطانیہ میں قیام کا قانونی حق نہ رکھنے والے پاکستانی شہریوں کو مبینہ طور پر بے دخل کردیا جائے گا

جاری بیان میں مزید کہا گیا ہے کہ پاکستانی شہری انگلینڈ اور ویلز کی جیلوں میں غیر ملکی مجرموں کی ساتویں بڑی تعداد ہیں جو کہ غیر ملکی شہریوں کی مجموعی آبادی کا تقریباً 3 فیصد بنتا ہے

بیان میں مزید کہا گیا ہے کہ یہ معاہدہ غیر قانونی ہجرت کے مسئلے سے نمٹنے کے لیے دونوں ممالک کے عزم کا مظہر ہے اور اس سے دونوں ممالک کو لاحق ہونے والے بڑے خطرات کی نشاندہی کرتا ہے

اعلامیے کے مطابق اس معاہدے کے تحت برطانیہ اور پاکستان کے درمیان قانون کے نفاذ کے سلسلے میں جاری تعاون کو مزید بہتر بنانے اور بڑھانے میں مدد ملے گی

اگرچہ پاکستان برسوں سے برطانیہ کے ساتھ تحویل مجرمان کے معاہدے کا مطالبہ کر رہا ہے لیکن یہ معاہدہ پاکستان کے مطالبات کو پورا نہیں کرتا

کچھ وکلا اس معاہدے کو پاکستان کے لیے ایک دھچکا قرار دے رہے ہیں، معاہدے کے تحت اب برطانیہ سے جلاوطن مجرموں کی آمد ہوگی، جن میں وہ مجرم بھی شامل ہیں جو اس سے قبل کبھی پاکستان نہیں آئے

برطانیہ میں مقیم امیگریشن قانون کے ماہر محمد امجد کا کہنا ہے کہ یہ معاہدہ پاکستان کے لیے بہت منفی ہے، گزشتہ سال، پاکستانی حکومت کو یہ معاہدے پیش کیا گیا تھا جس پر اس نے دستخط کرنے سے انکار کر دیا تھا

انہوں نے مزید کہا کہ معاہدے کے تحت سنگین جرائم میں ملوث مجرموں کو اہم معلومات کے اشتراک کے بغیر پاکستان کے حوالے کیا جائے گا، اس سے پاکستان کے لیے بڑے مسائل پیدا ہوں گے۔