ایکسیمس فور دنیا کی سب سے باکفایت کار ہے جو چمچہ بھر پیٹرول سے بننے والی برقی توانائی سے 75 کلومیٹر تک کا فاصلہ طے کرنے کی صلاحیت رکھتی ہے
اس کا مطلب یہ ہے کہ یہ کار ایک لیٹر پیٹرول کے برابر برقی توانائی سے نصف دنیا کا چکر لگا سکتی ہے، یہی وجہ ہے کہ ااے دنیا کی سب سے باکفایت ریل کار قرار دیا گیا ہے
ایکسیمس فور نامی کار برقی قوت سے چلتی ہے اور ہر طرح سے ماحول دوست ہے۔ یہ کار سویڈن کے علاقے ڈیلسبو الیکٹرک مقابلے میں اول نمبر پر آئی ہے اور ایک نیا عالمی ریکارڈ بھی قائم کر چکی ہے
واضح رہے کہ ہر سال ڈیلسبو الیکٹرک کار کے مقابلے میں طلبا و طالبات اپنی ماحول دوست اور توانائی کے لحاظ سے باکفایت سواریاں پیش کرتے ہیں۔ تمام ایجادات کی مشترکہ بات یہ ہوتی ہے کہ یہ ریلوے ٹریک پر چل سکیں. مقابلے کی شرط ایک ایسی گاڑی کی تیاری ہے جو اوسط 50 کلو گرام وزنی چھ مسافروں کو بٹھا کر پٹڑیوں پر 3.36 کلومیٹر کا فاصلہ طے کر سکے
اس بار ایکسیمس فور نے توانائی کی جو کفایت دکھائی ہے، وہ687 MPGe ہے، یعنی ’ فی گیلن پیٹرول پر طے کی جانے والا فاصلہ جو میل میں ظاہر کیا جائے۔‘ اس طرح 687 MPGe عام زبان میں 0.34 لیٹر فی 100 کلومیٹر ہوگا
اس حیرت انگیز سواری کو ڈیلارنا اور چامرز یونیورسٹی کے سائنسدانوں نے تیار کیا ہے۔ یہ کار مقابلے کے تمام معیارات پر تو پورا اتری ہی، لیکن نظری طور پر یہ ایک لیٹر پر دس ہزار کلومیٹر کا فاصلہ طے کر سکنے کی صلاحیت کی بھی حامل ٹھہری
ایکسیمِس فور ایئروڈائنامک اصول کے تحت بنائی گئی ہے اور انتہائی ہلکی پھلکی ہے ۔ اس میں ہلکے ترین طیاروں کا مٹیریئل استعمال ہوا ہے اور کار کو طیاروں کی افادیت جانچنے کے لیے مخصوص ہوائی ٹنل میں بھی ٹیسٹ کیا گیا ہے.
