دنیا کے اسٹار فٹبالر اور ارجنٹینی فٹبال ٹیم کے کپتان لیونل میسی نے اعلان کیا ہے کہ قطر میں 2022ع کا فٹبال ورلڈ کپ یقینی طور پر ان کے کیریئر کا آخری مقابلہ ہوگا
ای ایس پی این ارجنٹائن سے بات کرتے ہوئے میسی نے کہا ”یہ یقینی طور پر میرا آخری ورلڈکپ ہے۔ میں جسمانی طور پر اچھا محسوس کرتا ہوں۔ میں اس سال ایک بہت اچھا پری سیزن کرنے کے قابل تھا، جو میں پچھلے سال نہیں کر سکا“
پینتیس سالہ میسی کا کہنا تھا ”میں جہاں ہوں، وہاں پہنچنا ضروری تھا۔۔ اچھی ذہنی حالت اور بہت زیادہ امید کے ساتھ!“
لیونل میسی نے 2005ع میں اپنے بین الاقوامی کیریئر کا آغاز کیا اور اس کے بعد سے وہ ارجنٹائن کے لیے 164 مقابلوں میں حصہ لے چکے ہیں اور 90 گول کے ساتھ ملک کے سب سے زیادہ ریکارڈ اسکورر ہیں
2005ع میں ہنگری کے خلاف میچ میں متبادل کھلاڑی کے طور پر میسی کے بین الاقوامی کیریئر کے آغاز کا دورانیہ صرف دو منٹ تک رہا، لیکن انہوں نے فوری طور پر قومی ٹیم کے سیٹ اپ میں اپنے لیے جگہ بنائی اور 2006ع میں اپنے پہلے ورلڈ کپ کے لیے جرمنی کا سفر کیا
انہوں نے جنوبی افریقہ میں 2010 ایڈیشن، 2014 میں برازیل، جہاں ارجنٹائن فائنل تک پہنچا اور روس میں 2018ع میں ٹورنامنٹس کھیلے
میسی اب اپنے پانچویں ورلڈ کپ میں شرکت کرنے والے ہیں، جنہیں انہوں نے یقینی طور پر اپنا آخری ورلڈکپ قرار دیا ہے
پیرس میں ہونے والے انٹرویو میں، جہاں میسی پیرس سینٹ جرمین کے لیے کھیلتے ہیں، انہوں نے اعتراف کیا کہ وہ آنے والے ٹورنامنٹ کے بارے میں پریشان تھے
انہوں نے کہا ”ورلڈکپ کے بارے میں بے چینی اور اعصابی دباؤ موجود ہیں۔ ہم شدت سے اس کے شروع ہونے کا انتظار کر رہے ہیں“
اپنے تازہ انٹرویو میں میسی نے اپنی ٹیم کے حوالے سے کہا ”ہم ایک اچھے لمحے تک پہنچ چکے ہیں، ایک بہت اچھی طرح سے لیس اور بہت مضبوط گروپ کے ساتھ، لیکن کچھ بھی ہوسکتا ہے“
ان کا مزید کہنا تھا ”تمام کھیل بہت مشکل ہیں۔ فیورٹس ہمیشہ وہ نہیں ہوتے ہیں جو جیتتے ہیں یا اس راستے پر چلتے ہیں جس کی ان سے توقع کی جاتی ہے“
ساتھ ہی انہوں نے اپنی ٹیم ارجنٹائن کے حوالے سے کہا: ’لیکن ہم صرف فیورٹ نہیں ہیں، دوسری ٹیمیں بھی ہیں، جو ہم سے اوپر ہیں“
ارجنٹائن کی اپنے تیسرے ورلڈ کپ ٹائٹل کے دفاع کی کوشش، 22 نومبر کو لوسیل میں سعودی عرب کے خلاف میچ سے شروع ہوگی۔ اس سے پہلے میکسیکو اور پولینڈ کے خلاف گروپ سی کے مزید میچز ہوں گے
میسی اکثر سب سے بڑے بین الاقوامی اسٹیج پر ارجنٹائن کے آئیکون ڈیاگو میراڈونا کی تقلید کرنے کے لیے جدوجہد کرتے رہے ہیں
انہوں نے چار سال قبل روس میں صرف ایک بار گول کیا تھا، لیکن امیدیں بہت زیادہ ہیں کہ سات بار کے بیلن ڈی اور فاتح مشرق وسطیٰ میں اپنے آخری ورلڈکپ میں وہی کچھ کر دکھائیں گے، جو انہوں نے گزشتہ کوپا امریکہ کپ میں اپنی ٹیم کو چیمپئن بنانے کی صورت میں کر دکھایا تھا
میسی نے ارجنٹائن کو گذشتہ سال کوپا امریکہ کا تاج پہنایا تھا۔ انہوں نے فائنل میں روایتی حریف برازیل کو شکست دے کر اٹھائیس سالوں میں اپنا پہلا بڑا ٹورنامنٹ ٹائٹل جیتا۔ انہیں بہترین کھلاڑی کا ایوارڈ بھی دیا گیا تھا
قطر میں ممکنہ طور پر میسی اور ان کے دیرینہ حریف سینتیس سالہ کرسٹیانو رونالڈو کے لیے اپنی اپنی ٹیموں کے لیے ورلڈ کپ جیتنے کا آخری موقع ہوگا
میسی نے مارچ میں اعتراف کیا تھا کہ ”مجھے ورلڈ کپ کے بعد بہت سی چیزوں کا ازسرنو جائزہ لینا پڑے گا، چاہے یہ ہمارے لیے اچھا ہو یا نہ ہو۔“
انہوں نے مزید کہا تھا: ”مجھے امید ہے کہ سب اچھا ہو، لیکن بہت سی چیزیں یقینی طور پر تبدیل ہونے جا رہی ہیں۔“
