محکمہ موسمیات نے کہا ہے کہ صوبائی دارالحکومت کراچی سمیت سندھ کے مختلف اضلاع میں 7 اور 8 نومبر کو گرج چمک کے ساتھ ہلکی بارش کا امکان ہے
محکمہ موسمیات کی طرف سے جاری اعلامیے کے مطابق آج شام سے ملک بھر میں مغربی لہر داخل ہونے کا امکان ہے، جس سے سندھ کے مختلف علاقوں میں بارش کا امکان ہے
اعلامیے کے مطابق 7 اور 8 نومبر کو کراچی ڈویژن سمیت جیکب آباد، قمبر شہداد کوٹ، دادو، جامشورو، نوشہرو فیروز، شہید بینظیر آباد، لاڑکانہ، شکارپور، سکھر، خیرپور، کشمور اور گھوٹکی کے اضلاع میں آندھی اور گرج چمک کے ساتھ ہلکی سے درمیانی درجے کی بارش متوقع ہے
بیان میں کہا گیا کہ اس دوران صوبے میں درجہ حرارت 2 سے 4 ڈگری تک گرنے کا امکان ہے
واضح رہے کہ رواں برس سندھ اور بلوچستان میں طوفانی بارشوں کی وجہ سے سیلاب نے تباہی مچا دی تھی جہاں لاکھوں افراد بے گھر، کھڑی فصل تباہ اور ہزاروں کی تعداد میں مویشی بھی ہلاک ہوئے
صوبائی ڈیزاسٹر مینجمنٹ اتھارٹی کے مطابق سندھ بھر میں حالیہ مون سون کی وجہ سے سات سو افراد جاں بحق ہوئے جن میں بچے اور خواتین بھی شامل ہیں
رپورٹ کے مطابق صوبے بھر میں انیس لاکھ کے قریب گھر متاثر ہوئے جس کی وجہ سے ایک کروڑ 23 لاکھ 56 ہزار لوگ متاثر ہوئے ہیں جبکہ تقریباً 38 لاکھ ایکڑ پر کھڑی فصلیں بھی زیر آب چکی ہیں، جس کی وجہ سے کسانوں اور کاشت کاروں کو شدید نقصان کا سامنا کرنا پڑا ہے۔
