سندھ کا دارالحکومت کراچی، جہاں ملک کا سب سے بڑا شہر ہونے کا اعزاز رکھتا ہے، وہیں یہاں کا ٹریفک بھی ایک بڑا مسئلہ ہے۔ شہر میں دن بہ دن گاڑیوں کی تعداد بڑھتی جارہی ہے اور ٹریفک پولیس پر بھی اس کا بوجھ بڑھ رہا ہے
ایسی صورتحال میں ایمپریس مارکیٹ کے سگنل پر جب لوگ ’وزیر اعلیٰ سندھ مراد علی شاہ‘ کو ٹریفک کنٹرول کرتے ہوئے دیکھتے ہیں، ایک لمحے کو حیران رہ جاتے ہیں
لیکن یہ نارتھ کراچی کے رہائشی چھپن سالہ زرین خان ہیں، جو سید مراد علی شاہ سے غیر معمولی مشابہت رکھتے ہیں
زرین خان نے بتایا کہ ان کی شکل وزیراعلیٰ سندھ مراد علی شاہ سے مشابہہ ہونے کی وجہ سے وہ شہریوں میں کافی مقبول ہیں
زرین خان پچھلے چار سال سے ایمپریس مارکیٹ کے سگنل پر بغیر کسی معاوضے کے ٹریفک کو بحال رکھنے کی کوشش کر رہے ہیں
زرین خان نے بتایا کہ انہیں بچپن سے ہی لوگوں کی خدمت کرنا اچھا لگتا ہے اور ٹریفک میں پھنسی ایمبولینسوں کو نکالنا، ٹریفک کو بحال کرنا، بزرگوں اور بصارت سے محروم افراد کو سڑک پار کرانے جیسے کاموں سے لوگوں کی خدمت کرکے انہیں خوشی ہوتی ہے
انہوں نے مزید بتایا کہ ابتدا میں جب انہوں نے سگنل پر ٹریفک کو بحال کرنے کا کام شروع کیا تو انہیں کافی مشکلات پیش آئیں کیونکہ جب وہ گاڑیوں کو سگنل پر روکتے ہیں تو یونیفارم نہ ہونے کی وجہ کافی لوگ ان کی بات نہیں مانتے تھے
زرین خان بتاتے ہیں کہ وہ روزانہ شام کو پانچ بجے سے لے کر رات تقریباً دس بجے تک اپنا کام پوری ایمانداری سے سرانجام دیتے ہیں اور سردی ہو یا گرمی، وہ اپنا کام مکمل کرکے ہی گھر جاتے ہیں
انہوں نے متعلقہ حکام سے اپیل کی کہ ان کے معاوضے کا بندوبست کیا جائے تاکہ ان کے گزر بسر میں آسانی ہو
ساتھ ہی انہوں نے شہریوں سے اپیل کی کہ وہ اپنی گاڑیاں احتیاط سے چلائیں، اپنے لائسنس، شناختی کارڈ اور کاغذات ساتھ رکھیں اور ٹریفک پولیس اہلکاروں کے ساتھ تعاون کریں اور ان کی عزت کریں۔
