گذشتہ برس شروع کی گئی ’ایگزام ریڈی‘ (Exam Ready) مہم کی کامیابی کے پیشِ نظر مختصر دورانیے کی وڈیوز کے مقبول پلیٹ فارم ٹک ٹاک اور ایڈ ٹیک اسٹارٹ اپ ایڈکاسا (Edkasa) نے اسکالرشپ کے پروگرام کا اعلان کیا ہے، جس کے تحت پورے پاکستان میں اٹھارہ ہزار مستحق طلبہ کو آن لائن تعلیمی گرانٹس دی جائیں گی تاکہ وہ معیاری تعلیم تک اپنی رسائی کو بڑھا سکیں
یاد رہے کہ ٹک ٹاک نے ایڈکاسا اور لاہور یونیورسٹی آف مینیجمنٹ سائنسز (LUMS) کے ساتھ گذشتہ برس ستمبر میں اپنی نوعیت کا منفرد ڈجیٹل لرننگ پروگرام شروع کرنے کی غرض سے پورے سال کے لیے تعاون کیا تھا تاکہ ہائی اسکول کے طلبہ کو آن لائن تعلیم اور فاصلاتی تعلیم کی سہولت فراہم کی جا سکے
’ایگزام ریڈی‘ مہم کو لاکھوں پاکستانی طلبہ کے لیے تیار کیا گیا تھا، جس میں کیمسٹری، بائیولوجی، فزکس اور میتھمیٹکس جیسے مضامین پر پانچ سو سے زائد تعلیمی وڈیوز فراہم کی گئی تھیں
ایک بیان کے مطابق ان وڈیوز میں مطالعے کے بارے میں مشورے اور امتحانات میں کامیابی کے لیے گُر بتائے گئے تھے۔ ٹک ٹاک پر یہ وڈیوز فوراً ہی پاکستانی طلبہ میں مقبول ہو گئیں، جنہوں نے اپنے آغاز سے لے کر اب تک 665 ملین ویوز حاصل کیے اور 100 ملین سے زائد وڈیوز تخلیق کی گئیں
پاکستان کے اہم تعلیمی اداروں میں سے ایک لمز (LUMS) کے اشتراک سے یہ دونوں ادارے طلبہ کو ایڈکاسا کے مفت مطالعاتی مواد تک دو ماہ تک رسائی فراہم کر کے اپنی شراکت مزید مضبوط بنائیں گے
ٹک ٹاک میں ہیڈ آف گورنمنٹ ریلیشنز اینڈ پبلک پالیسی برائے مشرق وسطیٰ، ترکیہ، افریقہ، پاکستان اور جنوبی ایشیا فرح توکان کا کہنا ہے ”ٹک ٹاک ایک ایسا پلیٹ فارم ہے جو متعدد کیٹیگریز میں مختلف مواد پیش کرتا ہے اور تعلیم ہمارے لیے کلیدی حیثیت رکھتی ہے“
انہوں نے مزید کہا ”ہم پاکستان میں مستقبل کی نسلوں پر مثبت اثرات مرتب کرنے کے لیے ملک گیر خواندگی کے فروغ میں اپنا کردار ادا کرنے پر خوش ہیں“
ایڈکاسا کے شریک بانی اور چیف ایگزیکٹو آفیسر فہد تنویر کا کہنا تھا ”ہمیں ٹک ٹاک پر سیکھنے کے کونٹینٹ میں بڑے پیمانے پر دلچسپی اور بالخصوص طلبہ کی دلچسپی دیکھ کر بہت خوشی ہوئی ہے۔ پاکستان کو اس قسم کے جدید اور معیاری مواد کی ضرورت ہے، جو ہماری نوجوان آبادی کو باقی دنیا سے مقابلہ کرنے میں مدد فراہم کر سکے“
وظائف، مہم کے آن لائن محرک، ٹک ٹاک کے ساتھ معاہدے میں ایڈکاسا اور لمز کے طے شدہ مشترکہ معیار اور گائیڈلائنز کے مطابق دئیے جائیں گے
یہ وظائف کم مراعات یافتہ کمیونٹیز کے لیے ہیں اور پاکستان بھر کے طلبہ کو دستیاب ہیں۔ ان کا مقصد ان پاکستانی طلبہ تک پہنچنا ہے، جن کے لیے معیاری تعلیم میں رکاوٹیں حائل ہیں
دوسری جانب خبر رساں ادارے اے ایف پی کے مطابق یورپی یونین نے ٹک ٹاک کو خبردار کیا ہے کہ وہ یورپی یونین کے قوانین کا احترام کرے اور یورپی صارفین کے ڈیٹا کی حفاظت کو یقینی بنائے
وڈیو شیئرنگ ایپ کے سی ای او کی برسلز میں اعلیٰ حکام سے ملاقات کے بعد یہ بات سامنے آئی ہے
واضح رہے کہ ٹک ٹاک، جس کی پیرنٹ کمپنی ’بائٹ ڈانس‘ چینی ہے، حالیہ مہینوں میں سخت مغربی جانچ پڑتال کی زد میں آئی ہے کیونکہ بیجنگ کو صارفین کے ڈیٹا تک کتنی رسائی حاصل ہے
ٹک ٹاک کے چیف ایگزیکٹیو شو زی چیو نے پہلی بار یورپی یونین کے نائب صدور مارگریٹ ویسٹیگر اور ویرا جورووا، بلاک کے ہوم افیئرز کمشنر یلوا جوہانسن اور جسٹس کمشنر ڈیڈیئر رینڈرز کے ساتھ باضابطہ بات چیت کی۔
