نروس نائنٹیز کسی بھی بیٹر کے لیے ڈراؤنے خواب سے کم نہیں۔ اور ایسا گیند باز جو انہیں ننانوے کے اسکور پر پویلین کو چلتا کر دے، انہیں زندگی بھر نہیں بھولتا
اگر انٹرنیشنل کرکٹ میں سب سے زیادہ بیٹرز کو 99 رنز پر آؤٹ کرنے والے بولر کی بات کی جائے تو وہ ویسٹ انڈیز کے روی رامپال ہیں، جنہوں نے اپنے کیریئر میں چار بیٹرز کو تب آؤٹ کیا، جب وہ اپنی سینچری سے محض ایک رن کی دوری پر تھے
کرکٹ کی کوریج کرنے والی ویب سائٹ ’کرک انفو‘ کے مطابق روی رامپال اپنے کیریئر میں بھارت کے وراٹ کوہلی، انگلینڈ کے جوز بٹلر، سری لنکا کے کوشل پریرا اور انگلینڈ کے ایلکس ہیلز کو 99 رنز پر آؤٹ کر چکے ہیں
سنہ 2013ع میں بھارت کے دورے کے دوران دوسرے ون ڈے انٹرنیشنل میں روی رامپال نے وشاکا پٹنم میں وراٹ کوہلی کو 99 رنز پر آؤٹ کیا تھا اور ویسٹ انڈیز کی ٹیم یہ میچ دو وکٹوں سے جیت گئی تھی
مارچ 2014ع میں انگلینڈ کے جوز بٹلر ویسٹ انڈیز کے دورے کے دوران سیریز کے تیسرے ون ڈے میچ میں روی رامپال کی گیند پر 99 رنز پر آؤٹ ہوئے تھے
سنہ 2015ع میں سری لنکا کے خلاف کولمبو کے کرکٹ گراؤنڈ میں ون ڈے میچ کے دوران روی رامپال نے سری لنکن اوپنر کوشل پریرا کو 99 رنز پر آؤٹ کیا تھا۔ یہ میچ سری لنکا کی ٹیم آٹھ وکٹوں سے جیت گئی تھی
اس سے قبل 2012ع میں انگلینڈ کے ہوم گراؤنڈ پر کھیلے گئے ایک ٹی ٹوینٹی انٹرنیشنل میچ میں روی رامپال الیکس ہلیز کو 99 رنز پر آؤٹ کر چکے ہیں
روی رامپال سے قبل جنوبی افریقہ کے سابق فاسٹ بولر ایلن ڈونلڈ ٹیسٹ میچوں میں پاکستان کے سلیم ملک اور نیوزی لینڈ کے اسٹیفن فلیمنگ کو 99 رنز پر آؤٹ کر چکے ہیں
بھارت کے سابق کرکٹر مدن لال نے ایک ون ڈے میچ میں ایلن لیمب اور ٹیسٹ میچ میں پاکستان کے جاوید میانداد کو 99 رنز پر آؤٹ کیا تھا
اس فہرست میں پاکستان کے سابق فاسٹ بولر عمر گل بھی شامل ہیں، جنہوں نے اپنے انٹرنیشنل کیریئر میں دو بیٹرز کو 99 رنز پر پویلین واپس بھیجا تھا
’گل ڈوزر‘ کہلانے والے پاکستانی بولر نے ایک ٹیسٹ میچ میں بھارت کے عظیم بلے باز سچن تنڈولکر اور ون ڈے میچ میں نیوزی لینڈ کے سابق کپتان ڈینیل ویٹوری کو 99 رنز پر آؤٹ کیا تھا۔
