ایک نئی تحقیق میں انکشاف کیا گیا ہے کہ برطانیہ کے پچاس علاقے ایسے ہیں، جنہیں موسمیاتی تبدیلیوں کا سب سے زیادہ خطرہ ہے
ان اعداد و شمار کا تعلق برطانیہ کے ان علاقوں سے ہے، جو شدید گرمی، جنگلات میں لگنے والی آگ، سیلاب اور سمندر کی سطح میں اضافے کی وجہ سے سب سے زیادہ متاثر ہو سکتے ہیں
ماحولیات کے متعلق اعداد و شمار فراہم کرنے والے ایکس ڈی آئی سسٹمز کے مطابق گریٹر لندن اور لنکن شائر کا شمار ان علاقوں میں ہوتا ہے، جو ایسے خطرات والے پہلے دس فی صد مقامات میں آتے ہیں
ایکس ڈی آئی کی ’گروس ڈومیسٹک کلائمٹ رسک لسٹ‘ میں ویلز، یارکشائر میں ایسٹ رائڈنگ اور سمرسیٹ بتدریج تیسرے، چوتھے اور پانچویں نمبر پر ہیں
آب و ہوا کی تبدیلی کے نتیجے میں املاک کو نقصان پہنچنے کا سب سے زیادہ امکان سطح سمندر بلند ہونے سے دریاؤں اور ساحلی علاقوں میں آنے والے سیلابوں سے ہے
سب سے زیادہ خطرے والے علاقوں کا اندازہ آب و ہوا کی تبدیلی کی وجہ سے اس علاقے میں عمارتوں کو پہنچنے والے نقصان کی کل یا ’مجموعی‘ سطح سے کیا جاتا ہے۔ یہ پیش گوئی سال 2050ع کے لیے کی گئی
تجزیہ کار پہلے ہی رونما ہونے والے شدید موسمی واقعات اور ہر علاقے پر ان کے اثرات کو بھی دیکھ رہے ہیں
تحقیق میں یہ بھی دیکھا گیا کہ 1990ع اور 2050ع کے درمیان نقصان کا کتنا خطرہ ہے اور کتنا بڑھے گا
مثال کے طور پر ساحلی سیلاب کے خطرے کی وجہ سے گریٹر لندن میں 2050ع تک املاک کو پہنچنے والے نقصان کا خطرہ دو گنا ہو جائے گا
شہر کو سیلاب سے بچانے والے 1982ع سے لگائے گئے تھیمز بیریئر کو بھی اس خدشے کے ساتھ ایک خطرے کے طور پر دیکھا جاتا ہے کہ یہ آخرکار کام کرنا بند کر دے گا
لیکن اسکاٹ لینڈ میں نقصان میں سب سے زیادہ نمایاں اضافہ ہوا ہے، جس سے متعدد کاؤنٹیاں متاثر ہوئی ہیں
توقع ہے کہ اسکاٹ لینڈ کی تمام کاؤنٹیوں میں سے نصف کے لیے 2050ع تک خطرہ دو گنا ہو جائے گا
توقع ہے کہ اسی مدت کے دوران انگلینڈ کی صرف ایک چوتھائی کاؤنٹیوں میں بھی ایسا ہی ہوگا
اسکاٹ لینڈ کے شہر انورنیس کے لیے 1990ع اور 2050ع کے درمیان ماحولیاتی تبدیلی کے نقصان کا خطرہ تین گنا ہونے کی پیش گوئی کی گئی ہے۔ یہ پورے یورپ میں پیش گوئی کا سب سے بڑا اضافہ ہے
سطح سمندر میں اضافے سے ہونے والے ممکنہ نقصان کی وجہ سے سکاٹ لینڈ میں شیٹ لینڈ، راس اور کرومارٹی، آرگیل اور بوٹ اور نیرن میں بھی بڑے اضافے کی پیش گوئی کی گئی ہے
عالمی سطح پر چین، انڈیا اور امریکہ میں موسمیاتی تبدیلیوں کی وجہ سے ہونے والے نقصانات میں سب سے زیادہ اضافہ متوقع ہے
موسمیاتی تبدیلی سے ہونے والے نقصانات سے سب سے زیادہ متاثر ہونے والی دنیا کی بیس ریاستوں اور صوبوں میں سے سولہ صرف چین میں ہیں
ایکس ڈی آئی کے مطابق دنیا بھر میں سب سے زیادہ خطرے والے علاقوں میں سے بہت سے وہ بھی ہیں، جن کی آبادی سب سے زیادہ ہے۔ ان میں سے بہت سے عالمی معیشت میں بھی اہم ہیں
ایکس ڈی آئی کے سی ای او روہن ہمڈن نے کہا ”کمپنیوں، حکومتوں اور سرمایہ کاروں کے لیے یہ ضروری ہے کہ وہ ماحولیاتی خطرے کے مالی اور معاشی مضمرات کو سمجھیں اور اس خطرے کو اپنی فیصلہ سازی میں اہمیت دیں، اس سے پہلے کہ یہ اخراجات مالیاتی ٹپنگ پوائنٹس سے آگے بڑھ جائیں“
ذیل میں ماحولیاتی تبدیلی سے سب سے زیادہ متاثر ہونے والے برطانیہ کے دس علاقوں کا ذکر کیا گیا ہے۔ خیال رہے کہ نقصان کے خطرے میں دکھایا گیا فیصد اضافہ 1950 سے 2050 تک کے عرصے کا ہے
1۔ لنکن شائر
عالمی درجہ بندی: 184
نقصان کے خطرے میں اضافہ: 102 فیصد
2۔ گریٹر لندن
عالمی درجہ بندی – 263
نقصان کے خطرے میں اضافہ: 92 فیصد
3۔ ویلز
عالمی درجہ بندی: 298
نقصان کے خطرے میں اضافہ: 144فیصد
4۔ یارکشائر کی ایسٹ رائڈنگ
عالمی درجہ بندی: 323
نقصان کے خطرے میں اضافہ: 88 فیصد
5۔ سمرسیٹ
عالمی درجہ بندی: 458
نقصان کے خطرے میں اضافہ: 92 فیصد
6۔ کیمبرج شائر
عالمی درجہ بندی: 508
نقصان کے خطرے میں اضافہ: 100 فیصد
7۔ نورفوک
عالمی درجہ بندی: 537
نقصان کے خطرے میں اضافہ: 102 فیصد
8۔ کینٹ
عالمی درجہ بندی:561
نقصان کے خطرے میں اضافہ: 110 فیصد
9۔ ایسیکس
عالمی درجہ بندی: 577
نقصان کے خطرے میں اضافہ: 93 فیصد
10۔ لنکاشائر
عالمی درجہ بندی: 614
نقصان کے خطرے میں اضافہ:
134 فیصد
ان کے علاوہ شدید خطرات میں گھرے علاقوں میں شمالی آئرلینڈ، مرسی سائیڈ، گریٹر مانچسٹر، ہیمپشائر، ساؤتھ یارکشائر، برسٹل، چیشائر، ویسٹ مڈلینڈز، گلوسٹر شائر، ڈیون، نارتھ یارکشائر، ایسٹ سسیکس، ویسٹ سسیکس، ویسٹ یارکشائر، سوفولک، سرے، برکشائر، ڈرہم، لیسٹر شائر، ناٹنگھم شائر، ٹائین اینڈ ویئر، سٹافورڈ شائر، ڈربی شائر، ورسیسٹر شائر، ہرٹ فورڈ شائر، بکنگھم شائر، گلاسگو شہر، بیڈ فورڈ شائر، نارتھمپٹن شائر، ایئرشائر اور آران، کمبریا، الٹا پن، واروک شائر، آکسفورڈ شائر، ولٹ شائر، ڈورسیٹ، کارن وال، ہیرفورڈ شائر، اسٹرلنگ اور فالکرک اور نارتھمبرلینڈ شامل ہیں ۔
