فٹبال اسٹار لیونل میسی اور ان کے ارجنٹائن کے ساتھی جمعرات کو قطر میں ورلڈ کپ جیتنے کے بعد اپنا پہلا میچ کھیلیں گے
بیونس آئرس کے یادگار اسٹیڈیم میں سینٹرل امریکن کی نسبتاً کمزور ٹیم پاناما کے خلاف میچ کے تریسٹھ ہزار دستیاب ٹکٹوں کے لیے پندرہ لاکھ سے زائد شائقین نے درخواستیں جمع کروائی ہیں
فٹبال کے دیوانے، ارجنٹائن کے عوام دسمبر میں فرانس کے خلاف پینالٹی شوٹ آؤٹ میں ڈرامائی فتح کے بعد جشن منانے کے لیے لاکھوں کی تعداد میں باہر نکل آئے تھے۔ ایک اندازے کے مطابق ٹرافی پریڈ کے لیے چند روز بعد بیونس آئرس کی سڑکوں پر تقریباً پچاس لاکھ افراد جمع ہوئے
پریڈ کا ہجوم اتنا زیادہ تھا کہ اسے وسطی بیونس آئرس پہنچنے سے بہت پہلے ہی ختم کرنا پڑا کیونکہ یہ پہلے ہی مقررہ وقت سے کئی گھنٹے پیچھے تھی
دوحہ میں ہونے والے فائنل کے بعد لیونل میسی کے بین الاقوامی فٹبال سے ریٹائرمنٹ کی توقع کی جا رہی تھی، جس میں انہوں نے دو گول اور ایک شوٹ آؤٹ اسپاٹ کک اسکور کیا تھا، لیکن پیرس سینٹ جرمین کے فارورڈ کا کہنا تھا کہ وہ مزید آگے بڑھنا چاہتے ہیں تاکہ وہ عالمی چیمپیئن کی حیثیت سے ارجنٹائن کی جرسی پہن سکیں
کوچ لیونل اسکالونی نے منگل کو بتایا ”وہ اچھی فارم میں ہیں، وہ کھیلتے رہنا چاہتے ہیں۔ جب وہ مجھ سے کہیں گے کہ وہ اچھا محسوس نہیں کر رہے تو ہم دیکھیں گے۔ اس وقت وہ قومی ٹیم میں خوش ہیں“
رواں ماہ کے اوائل میں اس امید کو اس وقت قدرے دھچکا لگا تھا جب دو افراد نے میسی کی اہلیہ کے اہل خانہ کی ملکیت ایک بند سپر مارکیٹ پر فائرنگ کی تھی، جس کے بعد انہوں نے سات بار بیلن ڈی اور اعزاز جیتنے والے میسی کو نشانہ بناتے ہوئے ایک خطرناک پیغام چھوڑا تھا
بیونس آئرس سے تقریباً تین سو بیس کلومیٹر شمال میں میسی کے آبائی شہر روزاریو کے میئر پابلو جاو جاوکن کے حوالے سے ہاتھ سے لکھے گئے پیغام میں کہا گیا تھا ”میسی، ہم آپ کا انتظار کر رہے ہیں۔ جاوکن ایک نارکو (منشیات کا بادشاہ) ہے، وہ آپ کا خیال نہیں کرے گا“
تاہم میسی نے اس پر کوئی غیرمعمولی ردعمل نہیں دیا تھا
میسی کے والد جارج میسی نے صحافیوں کو بتایا ”میں نے بیٹے سے بات کی اور اس نے مجھ سے کہا کہ پرسکون رہیں“
اگرچہ اس کا براہِ راست اثر میسی پر نہیں پڑے گا لیکن اس واقعے نے پینتیس سالہ میسی کے آبائی شہر میں بڑھتے ہوئے مسئلے کو اجاگر کیا ہے
روزاریو دریائے پرانا میں واقع ایک بندرگاہ ہے، جو آہستہ آہستہ منشیات کی اسمگلنگ کا مرکز اور ارجنٹائن کا سب سے پرتشدد شہر بن گیا ہے، جہاں 2022ع میں 287 افراد ہلاک ہوئے تھے
ٹیم کی وطن واپسی کے لیے بیونس آئرس میں پارٹی کا ماحول متوقع ہے۔ 83 ہزار کی گنجائش والے اسٹیڈیم میں 20000 مقامات مدعو افراد کے لیے مختص تھے، باقی ٹکٹوں کو فروخت کے دو گھنٹے کے اندر ہی بند کردیا گیا تھا۔ سب سے سستے ٹکٹ کی قیمت 12000 پیسو (60 ڈالر) سے 49000 پیسو (245 ڈالر) تک ہے، جو جنوبی امریکی ملک میں اوسط ماہانہ تنخواہ کے نصف سے زیادہ ہے
ارجنٹائن کی فٹبال فیڈریشن کے صدر کلاڈیو تاپیا نے کہا ہے کہ ان کی تنظیم کو میڈیا کو اجازت نامے کے لیے ایک لاکھ تیس ہزار سے زائد درخواستیں موصول ہوئی ہیں، تاہم اسٹیڈیم میں محض 344 صحافیوں کے لیے گنجائش ہے
انہوں نے کہا ”ہم سب کو ایڈجسٹ کرنے کے قابل ہونا پسند کریں گے، لیکن ہمیں صرف صحافیوں کے لیے دو اسٹیڈیمز کی ضرورت ہوگی“ تاپیا نے کہا کہ ارجنٹائن کے لیے ’یہ مکمل پاگل پن‘ ہے
حکومت کی جانب سے میچ کو آزادانہ طور پر نشر کرنے کے فیصلے کے بعد جو بدقسمت لوگ اسٹیڈیم کے اندر داخل نہیں ہوسکیں گے، وہ کم از کم ٹیلی ویژن پر مفت میں میچ دیکھ سکیں گے
اسکالونی نے ان سے وعدہ کیا کہ ٹیم موقع یا مخالفین سے قطع نظر اپنی کامیابیوں کے بعد پرسکون نہیں رہے گی
ان کا کہنا تھا کہ ہمارا مقصد ایک ہی سطح پر کھیلنا ہے۔ ”اب یہ پہلے سے کہیں زیادہ مشکل ہو جائے گا کیوں کہ ہر کوئی ہمیں ہرانا چاہے گا“
جمعرات کے میچ کے بعد ارجنٹائن اٹھائیسویں میچ میں جزیرے کوراکاو سے سانتیاگو ڈیل ایسٹریرو میں کھیلے گا۔
