سری لنکا میں فوجی ڈاکٹروں نے ایک باسٹھ سالہ ریٹائرڈ فوجی کے گردے سے ’دنیا کی سب سے بڑی‘ پتھری نکالی ہے۔ اس سے پہلے یہ ریکارڈ ایک پاکستانی مریض کے پاس تھا
ڈاکٹروں کے مطابق یہ پتھری سابق سارجنٹ کینسٹس کونگے کے گردے سے نکالی گئی
حیران کن طور پر پتھری کا وزن 801 گرام تھا، جو ایک اوسط مرد کے گردے کے وزن سے بھی پانچ گنا زیادہ ہے
کینسٹس کونگے کے گردے کی پتھری کی لمبائی 13.37 سینٹی میٹر (5.26 انچ) تھی، جبکہ ایک اوسط گردے کی لمبائی تقریباً دس سے بارہ سینٹی میٹر ہوتی ہے
سری لنکن فوج نے ایک بیان میں کہا ہے ”کولمبو کے عسکری ہسپتال میں یکم جون کو ایک بڑی سرجری کے ذریعے گردے کی سب سے بڑی اور بھاری پتھری نکالی گئی“
کینسٹس کونگے نے مقامی سورنواہنی ٹی وی کو بتایا کہ انہیں 2020 سے پیٹ میں درد تھا اور ادویات کھانے سے آرام نہیں آ رہا تھا
انہوں نے کہا ”حال ہی میں اسکین کے بعد مجھے سرجری کرانے کے لیے کہا گیا تھا۔ اب میں بالکل ٹھیک محسوس کر رہا ہوں“
فوجی سرجن ستھرشن نے کہا ”ہمارے لیے سب سے اہم بات یہ ہے کہ اس پتھری کے باوجود گردے معمول کے مطابق کام کر رہے ہیں“
گنیز ورلڈ ریکارڈ کے مطابق، دنیا کا سب سے بڑا گردے کا پتھر، تقریباً 13 سینٹی میٹر، 2004 میں بھارت میں پایا گیا تھا، جب کہ سب سے بھاری گردے کی پتھری، جس کا وزن 620 گرام تھا، 2008 میں پاکستان میں رپورٹ ہوا تھا۔ اس طرح سری لنکا کے اس کیس نے ان دونوں کو پیچھے چھوڑ دیا ہے،
گنیز ورلڈ ریکارڈز کی جانب سے تسلیم کیے جانے کے بعد حکام نے بدھ کو اس بات کا اعلان کیا
یاد رہے کہ تین ماہ قبل بھارت کی ریاست تیلنگانا کے ضلع کریم نگر میں ڈاکٹروں نے کامیاب آپریشن کر کے 75 سالہ رام ریڈی کے گردے سے تین سو پتھریاں نکالی تھیں
گردے میں پتھری ہونا عام سی بات ہے لیکن اتنی بڑی تعداد میں انسانی جسم میں پتھروں کا ہونا ڈاکٹروں کے لیے ایک چیلنج بن جاتا ہے
ڈاکٹروں کا کہنا ہے کہ زیادہ درجہ حرارت کی وجہ سے پانی کی کمی گردے میں پتھری کی وجہ ہو سکتی ہے
واضح رہے کہ پتھری اس وقت بنتی ہے، جب معدنیات اور نمکیات گردے میں کرسٹلائز ہوتے ہیں کیونکہ یہ خون کو فلٹر کرتا ہے۔ پتھریاں گزرنے سے تکلیف دہ درد ہو سکتا ہے ، اگر وہ بہت بڑی ہوں اور پھنس جائیں تو سرجری کی ضرورت ہوتی ہے۔
