ایک پینتیس سالہ شخص دس سالوں کے دوران کم از کم پندرہ خواتین سے شادی کرتا ہے، تاکہ وہ ان کے زیورات، رقم اور جائیداد لے کر فرار ہو جائے۔ وہ ڈاکٹر یا انجینئر ہونے کا بہانہ کرتا ہے، ان میں سے ہر ایک سے رابطہ کرنے کے لیے متعدد فون استعمال کرتا ہے، اور یہاں تک کہ ’شادیوں‘ میں اپنے خاندان کے افراد کا کردار ادا کرنے کے لیے وہ اداکاروں کی خدمات بھی حاصل کرتا ہے
نہیں، یہ آنے والی نیٹ فلکس فلم کا پلاٹ نہیں ہے۔ یہ اصل میں ہوا ہے
بھارتی پولیس نے کبھی انجنیئر اور کبھی ڈاکٹر کا روپ دھار کر پندرہ مختلف طلاق یافتہ اور زائد العمر امیر خواتین سے شادی کرنے والے ایک ’سدا بہار دولہے‘ کو دھر لیا ہے
بھارتی میڈیا کے مطابق ریاست کرناٹکا کے شہر بنگلورو کی پولیس نے میسور کی رہائشی خاتون ہیملتا کی فریاد پر کارروائی کرتے ہوئے اس دھوکے باز شخص کو بنگلورو سے گرفتار کیا
دھوکے باز شخص کے خلاف ان کی پینتالیس سالہ سافٹ ویئر انجنیئر اہلیہ ہیملتا نے بلیک میلنگ اور دھوکے دہی کا مقدمہ دائر کیا، جس میں انہوں نے بتایا کہ وہ شخص ان سے پچیس لاکھ روپے تک کی رقم بٹور چکا ہے
خاتون سے مذکورہ شخص نے رواں برس جنوری میں ریاست آندھرا پردیش میں شادی کی تھی اور خود کو ایک ڈاکٹر بتایا تھا اور اب وہ اہلیہ سے نیا کلینک بنانے کے بہانے پیسے لے رہا تھا
ان کی شکایت کے مطابق ”وہ تین دن بعد گھر واپس آیا اور اپنا کلینک شروع کرنے کے لیے دس لاکھ روپے قرض کا مطالبہ کیا، اور پیسے نہ دینے کی صورت میں مجھے جان سے مارنے کی دھمکی دی، دو دن بعد وہ پندرہ لاکھ روپے لے کر گھر سے چلا گیا، جو میرے والدین نے مجھے گھریلو سامان اور بیس تولہ سونا خریدنے کے لیے دیے تھے“
ان کی شکایت کی بنیاد پر، مہیش کو پکڑنے کے لیے ایک ٹیم تشکیل دی گئی، لیکن پولیس اہلکار کے مطابق، اس کا سراغ لگانا کوئی آسان کام نہیں تھا
کویمپو نگر کی سب انسپکٹر رادھا ایم نے بتایا کہ مہیش کے والدین اور دو بھائی بنگلورو کے بنشنکری میں رہتے ہیں، لیکن وہ پچھلے سات سالوں سے ان سے الگ ہے
ایس آئی رادھا نے کہا، ”اس کے پاس اپنا کوئی گھر نہیں ہے، لیکن اس کے پاس دو کاریں ہیں۔ وہ اپنے شکار سے ملنے والے پیسوں سے ایک ہوٹل سے دوسرے ہوٹل جاتا ہے۔ اس نے پرتعیش زندگی گزاری“
اہلکار نے کہا کہ پہلی خاتون جن سے اس نے شادی کی تھی، جس کے بارے میں وہ جانتے ہیں، نے اس کے فرار ہونے کے بعد 2013 میں بنگلور میں اس کے خلاف شکایت درج کروائی تھی۔ ایک ایف آئی آر درج کی گئی تھی لیکن تفتیش ختم ہو گئی کیونکہ پولیس کو کوئی سراغ نہیں مل سکا
اور اب تک، اس کے خلاف کوئی دوسری شکایت نہیں آئی تھی، اب پچھلا شکایت کنندہ بھی اپنا شکار ہونے کا دعویٰ کرتے ہوئے سامنے آیا ہے
پولیس اہلکار نے بتایا کہ اس نے جن خواتین سے شادی کی تھی، ان میں سے ایک ڈاکٹر تھیں اور اس نے مبینہ طور پر ان کی کلینک کو بطور ‘ڈاکٹر’ اپنی تصاویر لینے کے لیے استعمال کیا تھا، تاکہ وہ ان تصاویر کا استعمال کرتے ہوئے دوسری خواتین کو پھنسا سکے
اپنے تازہ شکار کی شکایت کے مطابق، مہیش اسے میسور میں اپنے گھر اور ایک عمارت میں لے گیا، جس کے لیے کا دعویٰ تھا کہ وہ اپنا کلینک شروع کر رہا ہے
ایس آئی رادھا نے مزید کہا کہ مہیش نے شادیوں میں اپنے خاندان اور دوست ہونے کا بہانہ کرنے کے لیے لوگوں کو تین ہزار سے دس ہزار روپے ادا کیے تھے
انہوں نے مزید کہا، ”وہ زیادہ تر خواتین کو بتاتا ہے کہ اس کے والدین کا انتقال ہو گیا ہے۔ وہ لوگوں کو اپنے بھائی، کزن، یا دوست بنانے کے لیے ملازم رکھتا ہے۔ اس کی طرف سے صرف پانچ چھ لوگ شادیوں میں شریک ہوتے ہیں“
ایس آئی رادھا نے بتایا کہ شادی کے بعد، مہیش نے اپنی ‘بیویوں’ کے ساتھ صرف تین سے چار دن گزارے، اور وہ زیادہ تر کرائے کے گھروں میں رہا
ایس آئی رادھا کے مطابق ”وہ انہیں یہ کہہ کر چھوڑ دیتا کہ اسے کسی دوسری جگہ سرجری کرنے کے لیے جانا ہے، اس لیے وہ پریشان نہ ہوں۔ وہ ان سے کہتا کہ وہ کام میں مصروف ہوں گے، اس لیے انہیں اسے فون نہیں کرنا چاہیے، اور وہ جب وہ فارغ ہوں گے تو انہیں کال کریں گے. بعد میں، وہ انہیں بتاتا کہ وہ کہیں کسی قانونی معاملے میں الجھا ہوا ہے اور اگر پولیس ان سے رابطہ کرتی ہے، تو وہ انہیں بتا دیں کہ وہ نہیں جانتے کہ وہ کہاں ہے“
لیکن مہیش نے مبینہ طور پر اس بات کو یقینی بنایا کہ اس نے فرار ہونے سے پہلے خواتین کے زیورات لے لیے یا ان کی جائیداد پر قبضہ کر لیا۔ ایس آئی نے کہا، ”تازہ ترین شکایت کنندہ سمیت تین خواتین سے، اس نے سونا، رقم یا جائیداد میں تین کروڑ روپے سے زیادہ کی چوری کی ہے“
تازہ ترین شکایت کنندہ کے مطابق، مہیش ان کی شادی کے تین دن بعد یہ کہہ کر گھر سے چلا گیا کہ اسے سرجری کرنی ہے
پولیس اہلکار نے مزید بتایا کہ مہیش نے مبینہ طور پر اپنے ہر ٹارگٹ کے لیے ایک فون اور ایک سم کا استعمال کیا اور انہیں کسی دوسرے مقصد کے لیے استعمال نہیں کیا۔ وہ فرار ہونے کے بعد فون بند کر دیتا تھا
اس لیے پولیس کو مہیش کو پکڑنے کے لیے خاصی جدوجہد کرنی پڑی
پولیس کے مطابق ”تازہ ترین شکایت موصول ہونے کے بعد، ہم نے اس کے سی ڈی آر (کال ریکارڈ ڈیٹا) اور مقام کی جانچ کرنا شروع کردی۔ اس نے جتنے بھی پتے بتائے تھے وہ جعلی تھے۔ اس نے اپنے نام کے ساتھ کوئی سم کارڈ نہیں لیا – سوائے ایک کے۔ ہم نے اسے اسی سم کے ذریعے ٹریس کیا“
آخر کار پولیس نے کارروائی کرتے ہوئے دھوکے باز شخص پینتیس سالہ مہیش کے بی نائک کو گرفتار کیا اور تفتیش کی تو معلوم ہوا کہ سدا بہار دولہا موصوف 2014 سے اب تک سات سال میں بھارت کی مختلف ریاستوں کی پندرہ خواتین سے شادی کر چکا ہے اور بعض بیگمات سے اس کے چار بچے بھی ہیں
پولیس کے مطابق ملزم نے شادی کے لیے بنائی جانے والی ویب سائٹس پر اپنا اکاؤنٹ بنا کر خود کو انجنیئر اور ڈاکٹر ظاہر کیا اور انہوں نے انہی ویب سائٹس سے پندرہ خواتین کو تلاش کر کے شادی کی
پولیس کے مطابق تفتیش سے معلوم ہوا کہ ملزم زیادہ تعلیم یافتہ نہیں، انہوں نے محض پانچویں تک تعلیم حاصل کر رکھی ہے، لیکن انہوں نے خواتین کو یقین دلانے کے لیے کرناٹکا میں ایک جعلی کلینک بنا کر وہاں جعلی نرس کو ملازمت پر بھی رکھا
پولیس نے بتایا کہ ملزم نے خود کو کبھی ڈاکٹر تو کبھی انجنیئر بتا کر طلاق یافتہ اور زائد العمر ایسی خواتین سے شادی کی، جو خود مختار اور پیسے کمانے والی تھیں
پولیس کے مطابق ملزم نے خواتین کے خود مختار اور امیر ہونے کا فائدہ اٹھایا اور ان سے شادی کرنے کے بعد ان سے ملنا جلنا کم کر دیا
پولیس کا کہنا تھا کہ ملزم سے شادی کرنے والی بعض خواتین کو شوہر کی اصلیت کا علم بھی ہوا، تاہم انہوں نے شرمندگی کے احساس سے اس کے خلاف کوئی قانونی کارروائی نہیں کی اور نہ ہی کسی کو اپنے ساتھ ہونے والے دھوکے سے متعلق بتایا
پولیس کو معلوم ہوا کہ ملزم سے زیادہ تر شادی کرنے والی خواتین نے ان سے کبھی خرچے کے لیے پیسے تک نہیں مانگے اور ملزم نے ان سب کو دھوکے میں رکھا
تاہم کچھ خواتین خوش قسمت تھیں یا شاید عقلمند، جو اس چال باز شخص سے بچ گئیں، چونکہ وہ خود کو ڈاکٹر یا انجینئر ظاہر کرتا تھا، اس لیے انگریزی میں اس کی مہارت کی کمی نے متعدد خواتین میں شکوک و شبہات کو جنم دیا جن سے اس نے ازدواجی سائٹس پر بات کی، جس کی وجہ سے انہوں نے اس کی تجویز کو مسترد کر دیا
مہیش کو کرناٹک کے تماکورو میں گرفتار کیا گیا تھا اور اس پر تعزیرات ہند (آئی پی سی) کی دفعہ 420 (دھوکہ دہی اور بے ایمانی سے جائیداد کی ترسیل)، 406 (مجرمانہ اعتماد کی خلاف ورزی)، 506 (مجرمانہ دھمکی) اور 380 (چوری) کے تحت چارج کیا گیا ہے۔ پولیس کے مطابق وہ فی الحال عدالتی تحویل میں ہے۔
شادی کے لیے بنائی جانے والی ویب سائٹس کو استعمال کر کے مختلف ریاستوں کی پندرہ خواتین سے شادی کرنے والے ملزم کی کہانی سامنے آنے کے بعد کئی بھارت میں لوگوں کی ایک بڑی تعداد نے ایسی ویب سائٹس کے تصدیقی عمل پر بھی سوالات اٹھائے ہیں۔
