یہ تو عام اور معلوم بات ہے کہ مناسب خوراک، بہتر نیند اور روزانہ کی ورزش سے ہماری صحت پر مثبت اثرات مرتب ہوتے ہیں، لیکن کیا آپ جانتے ہیں کہ ’تحریر‘ کے بھی ایسے ہی اثرات جسم پر مرتب ہوتے ہیں، جو ورزش کرنے یا بہتر نیند کے بعد حاصل ہوتے ہیں
جی ہاں، ماہرین اور محققین نے لکھنے کی عادت کو انسانی صحت کے لیے مفید قرار دیا ہے، خاص طور پر ادب اور اشعار لکھنے سے انسانی صحت پر کافی مفید اثرات مرتب ہوتے ہیں
ماہرین کا کہنا ہے کہ یہ بات مشاہدے میں آئی ہے کہ شعرا اور ادیبوں کی زندگی دیگر افراد سے زیادہ پرسکون اور طویل ہوتی ہے
’ریڈرز ڈائجسٹ‘ کے مطابق ماہرین کا کہنا ہے کہ ’کورٹیسول‘ ہارمون ہی جسم انسانی پر مثبت اثرات مرتب کرنے کا باعث ہے۔ جب کوئی شخص ذہنی تناؤ میں ہوتا ہے تو اس کی صحت پر منفی اثرات مرتب ہوتے ہیں جس کی وجہ سے غدود میں ’ایڈرینل‘ نامی مواد پیدا ہوتا ہے، جس کی کثرت سے پیٹ کی چربی میں اضافہ ہوتا ہے۔علاوہ ازیں جلد کی خشکی بھی بڑھ جاتی ہے
یہ بات سامنے آئی ہے کہ ادیب اور شاعر جب اپنی تخلیق میں مصروف ہوتے ہیں تو ان میں اس مضر ہارمون کے اخراج میں نمایاں کمی ہوتی ہے، جس سے انہیں ذہنی راحت ملتی ہے اور اس کے اثرات جسم پر بھی مرتب ہوتے ہیں
ماہرین کہتے ہیں ”جب آپ قلم ہاتھ میں لے کر اپنے افکار و خیالات کو کاغذ پر منتقل کرتے ہیں تو گویا یہ ایسا ہی ہے جیسے کہ آپ نے ہاتھ میں سوئی پکڑی ہوئی ہو جو دکھائی نہیں دیتی، آپ اپنے ذہن سے نکلنے والے غیرمرئی دھاگے کو سوئی میں پروتے ہوئے افکار کو سیتے ہیں، جس سے آپ کو ذہنی سکون ملتا ہے۔ یہ عمل بلکل ایسے ہی ہے جیسا کہ آپ کو اپنے کپڑوں کی الماری میں رکھے بے ترتیب کپڑوں کو مرتب کرنے کے بعد سکون کا احساس ہوتا ہے۔“
تحقیقی رپورٹ میں کہا گیا ہے ”جب انسان اپنے خیالات کو ضابطہ تحریر میں لاتا ہے تو وہ قدرے پرسکون ہو جاتا ہے، جس سے اسے تازگی کا احساس بھی ہوتا ہے جو اس کی صحت کے لیے بھی مفید ثابت ہوتا ہے“
رپورٹ کے آخر میں اس بات کی تصدیق کی گئی کہ لکھاریوں کی زندگی زیادہ پرلطف اور پرسکون ہوتی ہے کیونکہ وہ زیادہ تر ذہنی خلفشار میں مبتلا نہیں رہتے۔ اپنی سوچوں کو ایک رخ دیتے ہیں اور انہیں صفحہ قرطاس پر مرتب کر دیتے ہیں جو ان کی تخلیق ہوتی ہے۔ اس کے باعث وہ سکون حاصل کرتے ہیں۔
