مضر صحت خوراک، نشہ، غیر متحرک لائف اسٹائل اور دیگر کئی وجوہات کی بنا پر دنیا بھر میں لوگوں کی بڑی تعداد دل کے مختلف عارضوں میں مبتلا ہے۔ عارضے کی شدید کیفیت یعنی ہارٹ فیل یا انتہائی کمزوری کی صورت میں زندگی بچانے کا انحصار اکثر دل کا عطیہ ملنے پر ہوتا ہے، جو کہ بہت ہی زیادہ مشکل ہے، لیکن اب، جب تک دل کا عطیہ نہیں مل جاتا اس وقت تک کے لیے ماہرین نے ایک جدید ترین مصنوعی دل بنا لیا ہے، جس کی فروخت اسی سال شروع ہوجائے گی
یہ مصنوعی دل فرانسیسی کمپنی کارمٹ کی طرف سے بنایا گیا ہے، جو مصنوعی قلب سازی میں کئی عشروں کا تجربہ رکھتی ہے۔ اس سے قبل یہ فرم سینکڑوں لوگوں کو مصنوعی دل لگا چکی ہے، لیکن اس بار اس کمپنی کی طرف سے کی گئی یہ نئی ایجاد ’ایسن‘ بہت جدید ہے۔ قوی امید کی جا رہی ہے کہ اس سال کے وسط تک یورپ میں اس کی فروخت شروع ہو جائے گی
یہ مصنوعی دل، جس کا نام "ایسن” رکھا گیا ہے، 900 گرام وزنی ہے، جس میں بہت نفیس سینسر اور حیاتیاتی مٹیریل استعمال کیا گیا ہے۔ اس میں چار والو لگے ہیں جو خون کی آمدورفت کو ممکن بناتے ہیں۔ دو وینٹریکل ہیں جن میں ایک میں خون اور دوسرے میں مائع ہے جو دل چلانے کے لیے بہت ضروری ہے۔ یہ پورا حصہ حیاتیاتی مٹیریئل سے بنا ہے، جو انسانی قلب سے قریب تر ہے
دو عدد مائیکرو پمپ ہیں جو خون کی روانی سے دل کی دھڑکن جیسا عمل پیدا کرتے ہیں۔ اس کے علاوہ لاتعداد سینسر، پروسیسر اور سرکٹ نصب ہیں ۔ ان کا کام یہ ہے کہ مریض کی بدلتی ہوئی کیفیات کے لحاظ سے دل کو چلاتے ہیں اور یوں مصنوعی دل بہت حد تک قدرتی انداز میں کام کرتا ہے
ہر سال ہارٹ فیلیئر سے کم سے کم تین کروڑ لوگ زندگی کی بازی ہار جاتے ہیں اور دل کے عطیے کے منتظر مریض دل پکڑے پکڑے اس دنیا س رخصت ہوجاتے ہیں۔ اسی لیے مصنوعی قلب ان کے لیے کسی نعمت سے کم نہیں
اسی کمپنی نے 2015ع میں ایک مریض کو مصنوعی قلب لگایا تو اس نے کہا کہ وہ بہت اچھا محسوس کر رہے ہیں. ایک اور 69 سالہ مریض نے بتایا کہ مصنوعی دل لگانے کے بعد وہ دن میں کئی مرتبہ چلتے اور پھرتے ہیں۔ 15 سے 20 دفعہ اٹھتے اور بیٹھتے ہیں لیکن انہیں کوئی تکلیف نہیں اور وہ بالکل تندرست ہیں
کارمٹ کے مطابق یہ دل مکمل طور پر خودکار ہے لیکن اسے چلانے کے لیے ایک بیٹری اور دیگر آلات اٹھانے پڑتے ہیں جن کا وزن 5 کلو گرام ہے.
