کئی لوگوں کو مختلف وجوہات کی بنا پر نئے ماحول میں نئے لوگوں سے بات کرتے ہوئے ہچکچاہٹ ہوتی ہے اور وہ اسسے کتراتے ہیں، یہ ایک ایسا مسئلہ ہے جو جس کی وجہ سے یہ لوگ زندگی میں پیچھے رہ جاتے ہیں۔ لیکن اگر انہی افراد کو ان کا ڈجیٹل ہمزاد یا ان سے مشابہہ ماڈل کو پراعتماد دکھایا جائے تو اس سے ان کی جھجک ختم کرنے میں بہت مدد مل سکتی ہے
ایک نئے تجربے میں لوگوں سے گفتگو میں مشکلات محسوس کرنے والے ایسے ہی خواتین و حضرات کو انہی کے جیسا ماڈل یا اوتار دکھایا گیا، جو تمام لوگوں سے پر اعتماد انداز میں گفتگو کرتا ہے. لوگوں نے اپنے ہی ڈجیٹل کلون کو پراعتماد انداز میں مضبوط باڈی لینگویج کے ساتھ بات کرتے ہوئے دیکھا تو انہوں نے فوری طور پر اس کا اثر بھی لیا
اس سلسلے میں سوئزرلینڈ میں یونیورسٹی آف لاؤزین کی ماریان شمٹ مسٹ اور ان کی ٹیم نے 76 افراد کو ایک مطالعے کا حصہ بنایا۔ ان میں اکثریت انڈر گریجویٹ طلبا و طالبات کی تھی اور خواتین کی تعداد 33 فیصد تھی
ان سے کہا گیا کہ وہ فرضی سامعین کے سامنے تین تین منٹ کی تقریر کریں۔ یہ وڈیو ریکارڈ کی گئی اور اس کے بعد تمام شرکا کو ان سے ملتے جلتے یا غیرمشابہہ کمپیوٹرکردار دکھائے گئے، جو بہت پراعتماد لہجے میں گفتگو کرتے دکھائی دیئے۔ اس کے بعد تمام شرکا کو دوبارہ تین منٹ کی تقریر کرنے کو کہا گیا
اس تحقیق کے نتائج پرغور کرنے سے معلوم ہوا کہ اس وڈیو کا فرق مرد شرکا میں غیر معمولی طور پر نمایاں ہوا۔ مردوں میں شامل ایسے افراد بھی تھے جو عوامی گفتگو میں نہ بولنے کے احساس میں مبتلا تھے۔ جب انہوں نے اپنے ڈجیٹل جڑواں کو پراعتماد دیکھا تو مجموعی طور پر ان کی کارکردگی 22 فیصد بہتر ہوئی۔ اس طرح کئی شرکا میں خود اعتمادی بھی نوٹ کی گئی
ان میں سے جن لوگوں نے ہوبہو اپنے ماڈلوں کو دیکھا تھا، ان میں دیگر کے مقابلے میں زیادہ اعتماد نوٹ کیا گیا
اس تجربے کی روح رواں ڈاکٹر ماریان نے کہا کہ اگرآپ شرمیلے ہیں اور سمجھتے ہیں کہ آپ لوگوں کے سامنے تقریر نہیں کر سکتے، تو آپ خود کو دیکھ کر اپنے آپ کو بہتر بنا سکتے ہیں۔ جب آپ اپنا ڈجیٹل اوتار دیکھ کر اس سے سیکھتے ہیں تو اس سے ذہنی تناؤ دور ہوتا ہے اور اپنے رویے کو بہتر طور پر تصور کر سکتے ہیں۔ اس وڈیو میں آپ خود کو ہاتھ ہلاتا دیکھ سکتے ہیں، جو آپ عام انداز میں نہیں کرتے تو اس سے خود اعتمادی بڑھتی ہے
لیکن حیرت انگیز طور پر جب خواتین کو ان کے ڈجیٹل کلون دکھائے گئے، تو اس سے ان پر کوئی مثبت اثر نہیں ہوا۔ اگلی تحقیق میں اس کی وجوہ جاننے کی کوشش کی جائے گی
ماہرین نے کہا ہے کہ ڈجیٹل ماڈلوں کی بنیاد پر لوگوں اور بالخصوص طالب علموں کو تربیت دے کر بہت سے فوائد سمیٹے جا سکتے ہیں اور انہیں پر اعتماد بنایا جا سکتا ہے.
