ﻣﻮﻻﻧﺎ ﻣﺤﺘﺮﻡ ﻓﻀﻞ ﺍﻟﺮﺣﻤٰﻦ ﻧﮯ ﺑﺠﺎ ﺳﻮﺍﻝ ﺍُﭨﮭﺎﯾﺎ ﮨﮯ ﮐﮧ: ’’ﺗﺤﺮﯾﮏ ﮐﮯ ﺳﻮﺍ ﺭﺍﺳﺘﮧ ﻧﮩﯿﮟ، ﺍﯾﻮﺍﻧﻮﮞ ﻣﯿﮟ ﻟﮍﻧﺎ ﮨﮯ ﺗﻮ ﭘﯽ ﮈﯼ ﺍﯾﻢ ﮐﯿﻮﮞ ﺑﻨﺎﺋﯽ؟‘‘
ﺟﯽ ﮨﺎﮞ! ﺑﻨﺎﺋﯽ ﺗﻮ ﮔﺌﯽ ﺗﮭﯽ 26 ﻧﮑﺎﺗﯽ ﺍﯾﺠﻨﮉﮮ ﭘﺮ، ﺟﺲ ﮐﺎ ﻣﺮﮐﺰﯼ ﮨﺪﻑ ﻣﻘﺘﺪﺭﮦ ﮐﯽ ﺳﯿﺎﺳﺖ ﺳﮯ ﻣﮑﻤﻞ ﺑﯿﺪﺧﻠﯽ ﺍﻭﺭ ﭘﺎﺭﻟﯿﻤﺎﻥ ﮐﯽ ﺣﮑﻤﺮﺍﻧﯽ ﮐﻮ ﯾﻘﯿﻨﯽ ﺑﻨﺎﻧﺎ ﺗﮭﺎ ﮐﮧ 1973 ﮐﮯ ﺍٓﺋﯿﻦ ﮐﯽ ﮨﻤﮧ ﻃﺮﻓﮧ ﺑﺎﻻﺩﺳﺘﯽ ﺑﺤﺎﻝ ﮨﻮ۔
ﯾﻘﯿﻨﺎً ﯾﮧ ﺗﺰﻭﯾﺮﺍﺗﯽ ﮨﺪﻑ ﺑﻮﺭﮊﻭﺍ ﺟﻤﮩﻮﺭﯾﺖ ﮐﮯ ﺩﺍﺋﺮﮮ ﻣﯿﮟ ﮨﻮﺗﮯ ﮨﻮﺋﮯ ﺑﮭﯽ ﺭﯾﺎﺳﺖ ﮐﯽ ﺍﻧﻘﻼﺑﯽ ﮐﺎﯾﺎ ﭘﻠﭧ ﮐﺎ ﻣﺘﻘﺎﺿﯽ ﮨﮯ ﺍﻭﺭ ﺍﺳﮯ ﺍﯾﮏ ﺑﮍﯼ ﻋﻮﺍﻣﯽ ﺗﺤﺮﯾﮏ ﻣﻨﻈﻢ ﮐﺌﮯﺑﻨﺎ ﺣﺎﺻﻞ ﻧﮩﯿﮟ ﮐﯿﺎ ﺟﺎﺳﮑﺘﺎ۔ ﻣﻮﻻﻧﺎ ﮐﻮ ﺍﭘﻨﺎ ﺩﮬﺮﻧﺎ ﻟﭙﯿﭧ ﮐﺮ ﻟﻮﭨﻨﺎ ﭘﮍﺍ ﺗﮭﺎ ﮐﮧ ﺟﻮ ﺍﻣﯿﺪ ﺩﻻﺋﯽ ﮔﺌﯽ ﺗﮭﯽ ﻭﮦ ﺑَﺮ ﻧﮧ ﺍٓﺋﯽ
ﭘﮭﺮ ﭘﯽ ﮈﯼ ﺍﯾﻢ ﺑﻨﯽ ﺟﺲ ﻣﯿﮟ ﺍﻧﺪﺭ ﺍﻭﺭ ﺑﺎﮨﺮ ﺩﻭﻧﻮﮞ ﻃﺮﺡ ﮐﯽ ﻣﺰﺍﺣﻤﺖ ﭘﮧ ﮐﻢ ﻭ ﺑﯿﺶ ﺑﺪﻟﺘﮯ ﺍﺗﻔﺎﻕ ﮐﮯ ﺑﺎﻭﺟﻮﺩ ﺟﻠﺴﮯ ﺟﻠﻮﺳﻮﮞ ﺳﮯ ﻣﺎﺣﻮﻝ ﮔﺮﻡ ﻭ ﭨﮭﻨﮉﺍ ﮨﻮﺗﺎ ﺭﮨﺎ۔ ﺍﺱ ﺩﻭﺭﺍﻥ ﭘﯽ ﮈﯼ ﺍﯾﻢ، ﻣﺴﻠﻢ ﻟﯿﮓ ﻥ، ﺟﻤﻌﯿﺖ ﻋﻠﻤﺎﺋﮯ ﺍﺳﻼﻡ، ﭘﯿﭙﻠﺰﭘﺎﺭﭨﯽ ﺍﻭﺭ ﺩﯾﮕﺮ ﺟﻤﺎﻋﺘﻮﮞ ﻣﯿﮟ ﻣﺒﺎﺣﺜﮧ ﻭ ﮐﺸﻤﮑﺶ ﭼﻠﺘﯽ ﺭﮨﯽ
ﺣﺮﯾﺖ ﭘﺴﻨﺪﺍﻧﮧ ﻣﺰﺍﺣﻤﺘﯽ ﺭﺍﮦ ﻋﻤﻞ ﺟﺲ ﮐﯽ ﻧﻤﺎﺋﻨﺪﮔﯽ ﻓﻀﻞ ﺍﻟﺮﺣﻤٰﻦ، ﻧﻮﺍﺯ ﺷﺮﯾﻒ ﺍﻭﺭ ﻣﺮﯾﻢ ﻧﻮﺍﺯ ﮐﺮﺗﮯ ﺭﮨﮯ ﮐﮧ ﮐﺴﯽ ﺑﮭﯽ ﻃﺮﺡ ’’ﺳﻠﯿﮑﭩﮉ ﺣﮑﻮﻣﺖ‘‘ ﮐﻮ ﻋﻀﻮ ﻣﻌﻄﻞ ﺑﻨﺎ ﮐﺮ ﺳﯿﺎﺳﯽ ﺑﺮﯾﮏ ﮈﺍﺋﻮﻥ ﮐﮯ ﺫﺭﯾﻌﮧ ﻭﺳﻂ ﻣﺪﺗﯽ ﺍﻧﺘﺨﺎﺑﺎﺕ ﮐﯽ ﺭﺍﮦ ﮨﻤﻮﺍﺭ ﮐﯽ ﺟﺎﺋﮯ ﻟﯿﮑﻦ ﺍﺱ ﮐﺎ ﺻﻔﺘﯽ ﺗﻀﺎﺩ ﯾﮧ ﺗﮭﺎ ﮐﮧ ﻣﺤﺾ ﺳﻠﯿﮑﭩﮉ ﮐﻮ ﮔﺮﺍ ﮐﺮ ﺍﻭﺭ ﺳﯿﺎﺳﯽ ﻧﻈﺎﻡ ﮐﮯ ﺍﻧﮩﺪﺍﻡ ﺳﮯ ﺍٓﭖ ﮐﯿﺴﮯ ﻣﻘﺘﺪﺭﮦ ﮐﯽ ﺣﺎﮐﻤﯿﺖ ﮐﻮ ﺧﺘﻢ ﮐﺮﺳﮑﺘﮯ ﺗﮭﮯ؟
ﺩﺭﯾﮟ ﺍﺛﻨﺎﺀ ﻋﻤﻠﯿﺖ ﭘﺴﻨﺪﺍﻧﮧ ﺩﻭﺳﺮﮮ ﺭﺟﺤﺎﻥ ﺑﯿﺮﻭﻧﯽ ﺩﺑﺎﺋﻮ ﺳﮯ ﭘﺎﺭﻟﯿﻤﻨﭧ ﮐﮯ ﺍﻧﺪﺭ ﺳﮯ ﺗﺒﺪﯾﻠﯽ ﮐﯽ ﺭﺍﮦ ﮨﻤﻮﺍﺭ ﮐﺮﻧﮯ ﮐﺎ ﺣﺎﻣﯽ ﮨﮯ، ﺟﺲ ﮐﮯ ﺑﮍﮮ ﻋﻠﻤﺒﺮﺩﺍﺭ ﺻﺪﺭ ﺍٓﺻﻒ ﻋﻠﯽ ﺯﺭﺩﺍﺭﯼ ﺍﻭﺭ ﻣﯿﺎﮞ ﺷﮩﺒﺎﺯ ﺷﺮﯾﻒ ﮨﯿﮟ، ﺣﺎﻭﯼ ﮨﻮﮔﯿﺎ ﺍﻭﺭ ﻻﻧﮓ ﻣﺎﺭﭺ ﻣﻠﺘﻮﯼ ﮨﻮﺗﺎ ﭼﻼ ﮔﯿﺎ ﺍﻭﺭ ﺍﭘﻮﺯﯾﺸﻦ ﺿﻤﻨﯽ ﺍﻧﺘﺨﺎﺑﺎﺕ ﺍﻭﺭ ﺳﯿﻨﯿﭧ ﮐﮯ ﺍﻟﯿﮑﺸﻦ ﻣﯿﮟ ﻣﺼﺮﻭﻑ ﮨﻮﮔﺌﯽ ﺍﻭﺭ ﺍﺳﮯ ﺍﺱ ﺳﮯ ﮐﺎﻓﯽ ﺗﻘﻮﯾﺖ ﻣﻠﯽ، ﺟﺲ ﮐﮯ ﻧﺘﯿﺠﮯ ﻣﯿﮟ ﺳﮍﮐﯿﮟ ﭨﮭﻨﮉﯼ ﭘﮍﮔﺌﯿﮟ ﺍﻭﺭ ﮐﻮﺭﻭﻧﺎ ﮐﮯ ﺑﺎﻋﺚ ﺳﻮﻧﯽ ﮨﻮﮔﺌﯿﮟ
ﺟﮩﺎﮞ ﺳﯿﺪ ﯾﻮﺳﻒ ﺭﺿﺎ ﮔﯿﻼﻧﯽ ﮐﯽ ﺩﺍﺭﺍﻟﺤﮑﻮﻣﺖ ﺳﮯ ﺳﯿﻨﯿﭧ ﮐﯽ ﺳﯿﭧ ﭘﺮ ﻓﺘﺢ ﺳﮯ ﺣﮑﻮﻣﺖ ﮐﯽ ﺑﮍﯼ ﺳﺒﮑﯽ ﮨﻮﺋﯽ، ﻭﮨﺎﮞ ﭼﯿﺌﺮﻣﯿﻦ ﺳﯿﻨﯿﭧ ﮐﮯ ﺍﻟﯿﮑﺸﻦ ﻣﯿﮟ ﮐﺎﻣﯿﺎﺑﯽ ﮐﮯ ﻧﺎﮐﺎﻣﯽ ﻣﯿﮟ ﺑﺪﻟﻨﮯ ﺳﮯ ﺍﻧﺪﺭ ﺳﮯ ﺗﺒﺪﯾﻠﯽ ﮐﯽ ﺍﻣﯿﺪ ﭘﺮ ﭘﺎﻧﯽ ﭘﮭﺮ ﮔﯿﺎ
ﭘﻨﺠﺎﺏ ﻣﯿﮟ ﭼﻮﮨﺪﺭﯼ ﭘﺮﻭﯾﺰ ﺍﻟﮩٰﯽ ﮐﮯ ﺳﺎﺗﮫ ﻣﻞ ﮐﺮ ﻋﺪﻡ ﺍﻋﺘﻤﺎﺩ ﮐﯽ ﺗﺤﺮﯾﮏ ﻻﻧﮯ ﮐﯽ ﮐﻮﺷﺶ ﮐﻮ ﻣﺴﻠﻢ ﻟﯿﮓ ﻥ ﻧﮯ ﺭﺩ ﮐﺮﺩﯾﺎ، ﺟﺲ ﺳﮯ ﻋﺪﻡ ﺍﻋﺘﻤﺎﺩ ﮐﯽ ﺭﺍﮦ ﺑﻨﺪ ﮨﻮﮔﺌﯽ۔ ﺍﻥ ﺩﻭ ﺭﺍﮨﻮﮞ ﮐﮯ ﻣﺨﻤﺼﮯ ﻣﯿﮟ ﭘﮭﻨﺲ ﮐﺮ ﭘﯽ ﮈﯼ ﺍﯾﻢ ﮐﻮ ﺑﻘﻮﻝ ﺷﺎﻋﺮ
”ﻧﮧ ﺧﺪﺍ ﮨﯽ ﻣﻼ ﻧﮧ ﻭﺻﺎﻝ ﺻﻨﻢ،
ﻧﮧ ﺍِﺩﮬﺮ ﮐﮯ ﺭﮨﮯ ﻧﮧ ﺍُﺩﮬﺮ ﮐﮯ ﺭﮨﮯ.‘‘
ﻣﻮﻻﻧﺎ ﻣﺤﺘﺮﻡ ﺑﮩﺖ ﺑﯿﺰﺍﺭ ﮨﻮﮔﺌﮯ ﺍﻭﺭ ﭘﺮﯾﺸﺎﻥ ﺗﮭﮯ ﮐﮧ ﻻﻧﮓ ﻣﺎﺭﭺ ﮐﮯ ﻟﺌﮯ ﮐﺴﯽ ﺑﮍﯼ ﺟﻤﺎﻋﺖ ﮐﯽ ﮐﻮﺋﯽ ﺗﯿﺎﺭﯼ ﻧﮩﯿﮟ، ﮐﮩﯿﮟ ﺍﯾﺴﺎ ﻧﮧ ﮨﻮ ﺍﮐﯿﻠﯽ ﺟﻤﻌﯿﺖ ﻋﻠﻤﺎﺋﮯ ﺍﺳﻼﻡ ﺩﮬﺮﻧﮯ ﻣﯿﮟ ﭘﮭﻨﺲ ﮐﺮ ﺭﮦ ﺟﺎﺋﮯ۔ ﻟﮩٰﺬﺍ، ﻓﻀﻞ ﺍﻟﺮﺣﻤٰﻦ ﻧﮯ ﺗﻤﺎﻡ ﺟﻤﺎﻋﺘﻮﮞ ﮐﻮ ﻻﻧﮓ ﻣﺎﺭﭺ ﺍﻭﺭ ﺩﮬﺮﻧﮯ ﭘﮧ ﺭﺍﺿﯽ ﮐﺮﻧﮯ ﮐﮯ ﺑﻌﺪ ﺍﺳﮯ ﺍﺳﻤﺒﻠﯿﻮﮞ ﺳﮯ ﺍﺳﺘﻌﻔﻮﮞ ﮐﮯ ﺳﺎﺗﮫ ﻧﺘﮭﯽ ﮐﺮ ﮐﮯ ﺍﭘﻨﮯ ﺗﺌﯿﮟ ﺷﻮﮈﺍﺋﻮﻥ ﮐﺎ ﺭﺳﮏ ﻟﮯ ﻟﯿﺎ
ﻧﻈﺎﻡ ﮐﻮ ﮐﺎﻏﺬﯼ ﺍﺳﺘﻌﻔﻮﮞ ﺳﮯ ﭼﭩﮑﯿﻮﮞ ﻣﯿﮟ ﺍُﻟﭩﺎﻧﮯ ﮐﮯ ﺗﺮﭖ ﮐﮯ ﭘﺘﮯ ﮐﺎ ﺑﭽﮕﺎﻧﮧ ﺑﻠﻒ ﭘﯿﭙﻠﺰﭘﺎﺭﭨﯽ ﻧﮯ ﮐﺎﻝ ﮐﺮ ﮐﮯ ﻣﻮﻻﻧﺎ ﺍﻭﺭ ﻣﯿﺎﮞ ﺻﺎﺣﺐ ﮐﯽ ﺍﻧﻘﻼﺑﯽ ﺍﻧﮕﮍﺍﺋﯽ ﮐﺎ ﻣﺰﮦ ﮐﺮﮐﺮﺍ ﮐﺮﺩﯾﺎ ﺟﺲ ﺳﮯ ﺧﻮﺩ ﭘﯽ ﮈﯼ ﺍﯾﻢ ﭨﻮﭨﺘﮯ ﭨﻮﭨﺘﮯ ﺑﻤﺸﮑﻞ ﺑﭻ ﭘﺎﺋﯽ
ﺍﺳﺘﻌﻔﻮﮞ ﭘﮧ ﺗﮑﯿﮧ ﮐﺮﻧﮯ ﻭﺍﻟﮯ ﺑﮭﻮﻝ ﮔﺌﮯ ﮐﮧ ﺍﺳﺘﻌﻔﯽٰ ﻗﺒﻮﻝ ﮨﻮﻧﮯ ﮐﮯ ﺑﻌﺪ ﺍﮔﺮ ﺣﮑﻮﻣﺖ ﻧﮧ ﮔﺮﯼ ﺍﻭﺭ ﺍﺱ ﻧﮯ ﺿﻤﻨﯽ ﺍﻧﺘﺨﺎﺑﺎﺕ ﮐﺎ ﺍﻋﻼﻥ ﮐﺮﺩﯾﺎ ﺗﻮ ﭘﮭﺮ ﭘﯽ ﮈﯼ ﺍﯾﻢ ﮐﯿﺎ ﮐﺮﮮ ﮔﯽ؟ ﮐﯿﺎ 1985ع ﮐﯽ ﻃﺮﺡ ﻣﻨﻔﻌﻞ ﺑﺎﺋﯿﮑﺎﭦ ﮐﺮﻧﮯ ﮐﯽ ﺣﻤﺎﻗﺖ ﮐﺮﮮ ﮔﯽ ﯾﺎ ﭘﮭﺮ ﺍﺱ ﻣﯿﮟ ﺣﺼﮧ ﻟﮯ ﮐﺮ ﺍﭘﻨﯽ ﻧﺸﺴﺘﯿﮟ ﺑﺮﻗﺮﺍﺭ ﺭﮐﮭﻨﮯ ﮐﯽ ﮐﻮﺷﺶ ﻣﯿﮟ ﭘﮭﻨﺲ ﮐﺮ ﺭﮦ ﺟﺎﺋﮯ ﮔﯽ؟
ﺍﮔﺮ ﻣﻮﻻﻧﺎ ﺍﻭﺭ ﻣﯿﺎﮞ ﺻﺎﺣﺐ ﮐﮯ ﺍﺱ ﺍﻧﺪﺍﺯﮮ ﺳﮯ ﺍﺗﻔﺎﻕ ﮐﺮ ﺑﮭﯽ ﻟﯿﺎ ﺟﺎﺋﮯ ﮐﮧ ﺑﮍﯼ ﺗﻌﺪﺍﺩ ﻣﯿﮟ ﺍﺭﺍﮐﯿﻦ ﺍﺳﻤﺒﻠﯽ ﮐﮯ ﺍﺳﺘﻌﻔﻮﮞ ﺳﮯ ﺗﻘﺮﯾﺒﺎً ﺍٓﺩﮬﮯ ﺍﻧﺘﺨﺎﺑﺎﺕ ﮐﺮﻭﺍﻧﺎ ﻣﻤﮑﻦ ﻧﮩﯿﮟ ﮨﻮﮔﺎ ﺍﻭﺭ ﺳﯿﺎﺳﯽ ﻧﻈﺎﻡ ﺩﮬﮍﺍﻡ ﺳﮯ ﻧﯿﭽﮯ ﺍٓﻥ ﮔﺮﮮ ﮔﺎ
ﺍﮔﺮ ﺳﯿﺎﺳﯽ ﻧﻈﺎﻡ ﮐﺎ ﺍﻧﮩﺪﺍﻡ ﻣﻘﺼﺪ ﮨﮯ ﺗﻮ ﺍﺱ ﺳﮯ ﺳﻠﯿﮑﭩﮉ ﺗﻮ ﭼﻼ ﺟﺎﺋﮯ ﮔﺎ ﻟﯿﮑﻦ ﺑﺮﯾﮏ ﮈﺍﺋﻮﻥ ﮐﮯ ﻧﺘﯿﺠﮧ ﻣﯿﮟ ﻣﻮﻻﻧﺎ ﺍﻭﺭ ﻣﯿﺎﮞ ﺻﺎﺣﺐ ﮐﯽ ﻭﮦ ﮐﻮﻧﺴﯽ ﻋﻮﺍﻣﯽ ﻓﻮﺝ ﮨﮯ ﺟﻮ ﺍﻗﺘﺪﺍﺭ ﭘﺮ ﻗﺎﺑﺾ ﮨﻮﮔﯽ؟
ﺍﯾﺴﯽ ﻋﻮﺍﻣﯽ ﻃﺎﻗﺖ ﮐﺎ ﺩﻭﺭ ﺩﻭﺭ ﺗﮏ ﮐﻮﺋﯽ ﻧﺎﻡ ﻭ ﻧﺸﺎﻥ ﻧﮩﯿﮟ، ﺗﻮ ﭘﮭﺮ ﺳﯿﺎﺳﯽ ﺧﻼ ﮐﻮ ﻭﮨﯽ ﭘُﺮ ﮐﺮﯾﮟ ﮔﮯ ﺟﻮ ﮨﻤﯿﺸﮧ ﺳﮯ ﻭﻗﻔﮯ ﻭﻗﻔﮯ ﺳﮯ ’’ ﻣﯿﺮﮮ ﮨﻢ ﻭﻃﻨﻮ ‘‘ ﺳﮯ ﺧﻄﺎﺏ ﮐﺮﺗﮯ ﺍٓﺋﮯ ﮨﯿﮟ۔ ﺗﻮ ﺍﺱ ﺳﮯ ﮐﯿﺎ ﯾﮧ ﻧﺘﯿﺠﮧ ﻧﮑﺎﻻ ﺟﺎﺋﮯ ﮐﮧ ﺍﺳﺘﻌﻔﻮﮞ ﮐﯽ ﺟﮭﻠﮑﯽ ﺩﮐﮭﺎ ﮐﺮ ﺍٓﭖ ﺯﯾﺎﺩﮦ ﺳﮯ ﺯﯾﺎﺩﮦ ﻣﻘﺘﺪﺭﮦ ﮐﯽ ﭘﮭﺮ ﺳﮯ ﮐﮭﻠﯽ ﻭﺍﭘﺴﯽ ﮐﯽ ﺭﺍﮦ ﮨﻤﻮﺍﺭ ﮐﺮﯾﮟ ﮔﮯ
ﺻﺮﻑ ﭘﯽ ﮈﯼ ﺍﯾﻢ ﮐﮯ ﺣﺮﯾﺖ ﻓﮑﺮ ﻭﺍﻟﮯ ﻣﻌﺰﺯ ﺣﻀﺮﺍﺕ ﮨﯽ ﺍﯾﮏ ﺧﺎﻟﯽ ﺧﻮﻟﯽ ﻣﮩﻢ ﺟﻮﺋﯽ ﮐﺎ ﺷﮑﺎﺭ ﻧﮩﯿﮟ۔ ﺑﻠﮑﮧ ﻧﻈﺎﻡ ﮐﮯ ﺍﻧﺪﺭ ﺳﮯ ﺗﺒﺪﯾﻠﯽ ﮐﮯ ﺣﺎﻣﯽ ﻣﻌﺘﺪﻝ ﺣﻀﺮﺍﺕ ﺑﮭﯽ ﺍﺱ ﮐﺞ ﻓﮩﻤﯽ ﮐﺎ ﺷﮑﺎﺭ ﮨﯿﮟ ﮐﮧ ﻭﮦ ﻓﻘﻂ ﻋﻤﺮﺍﻥ ﺧﺎﻥ ﮐﯽ ﭼﮭﭩﯽ ﮐﺮﺍ ﮐﮯ ﻣﻘﺘﺪﺭﮦ ﺳﮯ ﺍﻗﺘﺪﺍﺭ ﮐﮭﯿﻨﭻ ﻟﯿﮟ ﮔﮯ
ﺍﺱ ﻣﻌﺘﺪﻝ ﺭﺟﺤﺎﻥ ﮐﮯ ﻧﻤﺎﺋﻨﺪﮔﺎﻥ ﮐﻮ ﺍٓﺧﺮ ﮐﯿﺎ ﺟﻠﺪﯼ ﮨﮯ ﮐﮧ ﺳﻠﯿﮑﭩﮉ ﺣﮑﻮﻣﺖ ﻓﻮﺭﺍً ﮔﮭﺮ ﭼﻠﯽ ﺟﺎﺋﮯ۔ ﻭﮦ ﮐﯿﻮﮞ ﺭﺍﺋﮯ ﻋﺎﻣﮧ ﮐﯽ ﮐﺎﯾﺎ ﭘﻠﭧ ﮐﺎ ﺍﻭﺭ ﺳﻠﯿﮑﭩﺮﺯ ﮐﮯ ﮐﮭﯿﻞ ﮐﻮ ﻣﺎﺕ ﻣﻠﻨﮯ ﮐﺎ ﺍﻧﺘﻈﺎﺭ ﻧﮩﯿﮟ ﮐﺮﺗﮯ؟ ﺍﮔﺮ ﺍﯾﺴﯽ ﮨﯽ ﺟﻠﺪﯼ ﮨﮯ ﺗﻮ ﭘﮭﺮ ﻭﮦ ﮐﺮﻧﺎ ﮨﻮﮔﺎ ﺟﻮ ﺷﮩﺒﺎﺯ ﺷﺮﯾﻒ ﭼﺎﮨﺘﮯ ﮨﯿﮟ ﮐﮧ ﻣﻘﺘﺪﺭﮦ ﺳﮯ ﻣﮏ ﻣﮑﺎ ﮐﺮﻟﻮ ﺍﻭﺭ ﺳﻠﯿﮑﭩﮉ ﮐﯽ ﺟﮕﮧ ﻟﮯ ﻟﻮ
ﺭﺍﮦِ ﺣﺮﯾﺖ ﻭﺍﻟﻮﮞ ﮐﯽ ﺟﻠﺪﯼ ﻣﯿﮟ ﺑﮭﯽ ﺑﯿﻘﺮﺍﺭﯼ ﮨﮯ ﮐﮧ ﮐﮩﯿﮟ ﭘﺎﻧﯽ ﺳﺮ ﺳﮯ ﻧﮧ ﮔﺰﺭ ﺟﺎﺋﮯ ﺍﻭﺭ ﻣﺼﺎﻟﺤﺘﯽ ﺭﺍﮦ ﻭﺍﻟﻮﮞ ﮐﯽ ﺟﻠﺪ ﺑﺎﺯﯼ ﺍﯾﮏ ﮨﯽ ﺑﺎﺕ ﮐﯽ ﻣﻈﮩﺮ ﮨﮯ۔ ﻓﺮﻕ ﻓﻘﻂ ﯾﮧ ﮨﮯ ﮐﮧ ﺭﺍﮦِ ﺣﺮﯾﺖ ﻭﺍﻟﮯ ﺟﯿﺴﮯ ﮐﯿﺴﮯ ﺳﯿﺎﺳﯽ ﻧﻈﺎﻡ ﮐﺎ ﺩﮬﮍﻥ ﺗﺨﺘﮧ ﮐﺮ ﮐﮯ ﺍﯾﮏ ﻧﯿﺎ ﻣﺎﺭﺷﻞ ﻻ ﻟﮕﻮﺍﻧﺎ ﭼﺎﮨﺘﮯ ﮨﯿﮟ ﺍﻭﺭ ﻣﺼﺎﻟﺤﺘﯽ ﺭﺍﮦ ﻭﺍﻟﮯ ﺳﻠﯿﮑﭩﮉ ﮐﯽ ﺟﮕﮧ ﻟﯿﻨﺎ ﭼﺎﻟﺘﮯ ﮨﯿﮟ
ﺻﺒﺮ ﮐﮯ ﺳﺎﺗﮫ ﺍﯾﮏ ﺣﻘﯿﻘﯽ ﺟﻤﮩﻮﺭﯼ ﻭ ﻋﻮﺍﻣﯽ ﺗﺒﺪﯾﻠﯽ ﮐﮯ ﻟﺌﮯ ﺍﯾﮏ ﻟﻤﺒﯽ ﻋﻮﺍﻣﯽ ﺟﻤﮩﻮﺭﯼ ﺗﺤﺮﯾﮏ ﻣﻨﻈﻢ ﮐﺮﻧﮯ ﮐﯽ ﺑﺠﺎﺋﮯ ﯾﮧ ﭘﺮﺍﻧﺎ ﺭﻭﺍﯾﺘﯽ ﮐﮭﯿﻞ ﮐﮭﯿﻞ ﺭﮨﯽ ﮨﮯ ﺟﺲ ﺳﮯ ﻋﻮﺍﻡ ﮐﯽ ﺯﻧﺪﮔﯽ ﻣﯿﮟ ﮐﻮﺋﯽ ﺑﻨﯿﺎﺩﯼ ﺗﺒﺪﯾﻠﯽ ﺍﻭﺭ ﻧﻈﺎﻡ ﻣﯿﮟ ﮐﻮﺋﯽ ﺻﻔﺘﯽ ﺟﻤﮩﻮﺭﯼ ﺗﺒﺪﯾﻠﯽ ﭘﯿﺪﺍ ﮨﻮﻧﮯ ﮐﻮ نہیں
ﺍﯾﺴﮯ ﻣﯿﮟ ﻣﻮﻻﻧﺎ ﻣﺤﺘﺮﻡ ﮐﻮ ﻧﻮﺍﺑﺰﺍﺩﮦ ﻧﺼﺮﷲ ﺧﺎﻥ ﮐﯽ ﺍﺗﺤﺎﺩﻭﮞ ﮐﮯ ﺣﻮﺍﻟﮯ ﺳﮯ ﻟﭽﮏ ﺍﻭﺭ ﺗﺪﺑﯿﺮﯼ ﮨﻨﺮﻣﻨﺪﯼ ﯾﺎﺩ ﺩﻻﻧﺎ ﭼﺎﮨﻮﮞ ﮔﺎ۔ ﺍﺗﺤﺎﺩ ﺑﻨﺎﻧﺎ ﻣﺸﮑﻞ ﮨﮯ ( ﺟﻮ ﺑﻦ ﮔﯿﺎ ) ﺍﻭﺭ ﺍﺳﮯ ﻗﺎﺋﻢ ﺭﮐﮭﻨﺎ ﺍﻭﺭ ﺍٓﮔﮯ ﺑﮍﮬﺎﻧﺎ ﺍﻭﺭ ﺑﮭﯽ ﻣﺸﮑﻞ ﮨﮯ
ﻣﯿﮟ ﺍﻧﮩﯿﮟ ﯾﮧ ﺑﮭﯽ ﯾﺎﺩ ﺩﻻﻧﺎ ﭼﺎﮨﻮﮞ ﮔﺎ ﮐﮧ ﻭﮦ ﭼﺎﺭﭨﺮ ﮐﮩﺎﮞ ﮨﮯ ﺟﺲ ﮐﺎ ﮐﮧ ﺍٓﭖ ﻧﮯ ﺍﮮ ﭘﯽ ﺳﯽ ﻣﯿﮟ ﻭﻋﺪﮦ ﮐﯿﺎ ﺗﮭﺎ۔ ’’ ﺍﺱ ﮐﻮ ﻻﺅ ﺍﺱ ﮐﻮ ﻧﮑﺎﻟﻮ ‘‘ ﮐﯽ ﭼﺎﻟﻮ ﺳﯿﺎﺳﺖ ﺑﮯ ﻣﻌﻨﯽ ﮨﻮﮔﺌﯽ ﮨﮯ۔ ﻋﻮﺍﻡ ﺣﻘﯿﻘﯽ، ﺳﻤﺎﺟﯽ ﻭ ﺳﯿﺎﺳﯽ ﻭ ﻣﻌﺎﺷﯽ ﺗﺒﺪﯾﻠﯽ ﺍﻭﺭ ﺗﻤﺎﻡ ﺗﺮ ﺍﻧﺴﺎﻧﯽ ﺣﻘﻮﻕ ﭼﺎﮨﺘﮯ ﮨﯿﮟ، ﻭﻓﺎﻗﯽ ﺍﮐﺎﺋﯿﺎﮞ ﺣﻘﯿﻘﯽ ﻣﺴﺎﻭﯾﺎﻧﮧ ﺷﺮﮐﺖ ﭼﺎﮨﺘﯽ ﮨﯿﮟ
ﺧﻮﺍﺗﯿﻦ ﺍﻭﺭ ﺍﻗﻠﯿﺘﯿﮟ ﻣﺴﺎﻭﯼ ﺍﻧﺴﺎﻧﯽ ﺣﻘﻮﻕ ﮐﯽ ﻃﻠﺒﮕﺎﺭ ﮨﯿﮟ۔ ﺍﯾﮏ ﻭﺳﯿﻊ ﺗﺮ ﻃﻮﯾﻞ ﻣﺪﺗﯽ ﯾﺎ 10 ﺑﺮﺱ ﮐﮯ ﺍﯾﺠﻨﮉﮮ ﭘﺮ ﭘﯽ ﮈﯼ ﺍﯾﻢ ﺍﯾﮏ ﻋﻮﺍﻣﯽ ﻭ ﺟﻤﮩﻮﺭﯼ ﻣﺸﺘﺮﮐﮧ ﭘﻠﯿﭧ ﻓﺎﺭﻡ ﻣﯿﮟ ﺑﺪﻟﯿﮟ ﺍﻭﺭ ﺍﯾﮏ ﺩﮨﺎﺋﯽ ﮐﮯ ﻟﺌﮯ ﻗﻮﻣﯽ ﺣﮑﻮﻣﺖ ﮐﮯ ﻗﯿﺎﻡ ﮐﺎ ﭘﺮﻭﮔﺮﺍﻡ ﻟﮯ ﮐﺮ ﻋﻮﺍﻡ ﮐﮯ ﭘﺎﺱ ﺟﺎﺋﯿﮟ.
بشکریہ روزنامہ جنگ
