نوابشاہ : بورڈ آف انٹرمیڈیٹ اینڈ سیکنڈری ایجوکیشن نوابشاہ نے پہلی مرتبہ میٹرک اور انٹر کے سالانہ امتحانات منعقد کرانے کی تیاری مکمل کرلی
تفصیلات کے مطابق بورڈ آف انٹرمیڈیٹ اینڈ سیکنڈری ایجوکیشن نوابشاہ اپنے قیام کے پانچ سال بعد پہلی مرتبہ میٹرک اور انٹر کے ایک لاکھ 26 ہزار 215 طلباء کا امتحانات لے گا، جس کے لئے تیاریاں مکمل کر لی گئی ہیں. بورڈ نے میٹرک کے 133 اور انٹر کے لئے 77 امتحانی مراکز کا انتخاب بھی کرلیا ہے
نوابشاہ تعلیمی بورڈ کا قیام 2016ء میں عمل میں آیا تھا، تاہم اس دوران بورڈ کے کئی چیئرمین رہے لیکن کوئی چیئرمین سالانہ امتحانات نہیں کرا سکا، مگر اب موجودہ چیئرمین ڈاکٹر محمد فاروق کے دور میں نوابشاہ بورڈ پہلی مرتبہ امتحان کرانے کے لئے تیار ہے
بورڈ کے چیئرمین ڈاکٹر محمد فاروق نے بتایا کہ نوابشاہ تعلیمی بورڈ کی حدود میں سکھر بورڈ سے ضلع نوشہرو فیروز کے تعلیمی ادارے، میرپورخاص بورڈ سے سانگھڑ کے تعلیمی ادارے اور حیدر آباد بورڈ سے نوابشاہ کے تعلیمی ادارے شامل ہوئے ہیں
انہوں نے کہا کہ اس وقت بورڈ سے 113 سرکاری و نجی کالجز جبکہ 430 سرکاری و نجی اسکولز الحاق شدہ ہیں. فی الحال یہ بورڈ صرف 09 مستقل ملازمین کے ساتھ کام کررہا ہے جو مختلف بورڈز سے آئے ہیں جبکہ بورڈ میں آئی بی اے سکھر کے ذریعے بھرتیاں آخری مراحل پر ہیں اور امتحان شروع ہونے سے پہلے ہی اس کو حتمی شکل دی جائے گی اور کچھ اعلیٰ گریڈ 17اور 18کی اسامیوں کو پہلے ہی مناسب امیدواروں کی سفارش کرنے کے لئے سندھ پبلک سروس کمیشن کو بھجوا دیا گیا ہے
انہوں نے کہا کہ امیدواروں اور امتحانی مراکز کا قیام آخری مراحل میں ہے اور ایچ ایس ایس سی کے لئے رول نمبروں کی الاٹمنٹ بھی آخری مرحلے میں ہے، اگر اس مرحلے میں کوئی انتظامی تبدیلی ہوئی تو امتحانات متاثر ہوں گے اور طلبہ اور اساتذہ پریشان ہوجائیں گے، نئے بورڈ کا دوسرا بجٹ جون میں پیش کیا جائے گا۔
ڈاکٹر فاروق نے کہا کہ بورڈ کی عمارت (کمپلیکس) کے لئے 8 ایکڑ زمین حکومت سے مل چکی ہے اور بورڈ کمپلیکس کے لئے نئی ترقیاتی اسکیم کو اے ڈی پی کی نئی فہرست میں شامل کیا جارہا ہے۔
