لاہور : ایف آئی اے میں بھرتی کے لیے اعلیٰ تعلیم یافتہ بے روزگاروں نے صرف پانچ روزکے دوران 6 لاکھ درخواستیں جمع کروا دی ہیں، جبکہ درخواستیں جمع کروانے کی آخری تاریخ 14جون ہے
چند روز قبل ایف آئی اے میں مختلف کیٹگریوں میں گریڈ 1 سے 15 تک کے لئے 11سو 40 اسامیوں کی بھرتی کا شیڈول جاری ہوا، صرف پانچ روز میں ہی ایف آئی اے کو 6 لاکھ درخواستیں موصول ہوئی ہیں۔ ابھی درخواستیں جمع کروانے کی تاریخ میں کئی روز باقی ہیں اور اندازہ لگایا جارہا ہے کہ محکمہ کو 25 لاکھ کے قریب درخواستیں موصول ہوں گی جو کہ ایف آئی اے کی تاریخ میں بھی ایک ریکارڈ ہوگا۔ اس سے قبل اتنی بڑی تعداد میں درخواستیں کبھی موصول نہیں ہوئی ہیں
ایف آئی اے میں جونیئر کلرک کے لئے 24 اسامیاں، نائب قاصد کے لئے 50 ، ڈسپیج رائیڈر کے لئے 4 ، لوئر ڈویژن کلرک کے لئے 34 ، چوکیدارکے لئے 14 ، اسٹینو ٹائپ کے لئے 45، کانسٹیبل کے لئے 596، کک کے لئے 3 ، سویئپر کے لئے 25، اسسٹنٹ کے لئے 17، کانسٹیبل ڈرائیورکے لئے41، اسسٹنٹ سب انسپکٹر کے لئے211، ڈرائیور کے لئے 11 اور سب انسپکٹر کے لئے 65 اسامیاں جاری کی گئی ہیں
تمام درخواست گزاروں سے تحریری امتحان لیا جائے گا اور کامیاب ہونے والے امیدواروں کو ہی بعدازاں انٹرویو کے لئے بلوایا جائے گا.
مذکورہ بالا تناسب دیکھ کر پاکستان میں بڑھتی ہوئی بے روزگاری کا اندازہ لگانا مشکل نہیں ہے.
