سندھ کے جعلی ڈومیسائل پر ملک کا اعلی ترین امتحان پاس کرنے کا انکشاف ہوا ہے، حکومت سندھ نے سی ایس ایس کا امتحان پاس کرنے والے جعلسازوں کےخلاف کارروائی کے لیے فیڈرل پبلک سروس کمیشن سے تفصیلات مانگ لیں
واضح رہے کہ کچھ عرصہ سے سوشل میڈیا پر بھی سندھ کے سنجیدہ حلقوں کی جانب سے سندھ کے جعلی ڈومیسائل پر ملک کا اعلیٰ ترین امتحان پاس کر کے سندھ کے حقوق پر ڈاکہ ڈالنے کے خلاف بھرپور مہم چلائی جا رہی ہے
اس ضمن میں ملنے والی تفصیلات کے مطابق محکمہ داخلہ سندھ نے سیکریٹری فیڈرل پبلک سروس کمیشن کو خط لکھ کر آٹھ مشکوک افراد کے ڈومیسائل، پی آر سی اور قومی شناختی کارڈ کی تفصیلات طلب کی ہیں تاکہ ان دستاویزات کی متعلقہ اضلاع سے تصدیق کروائی جاسکے
خط میں کہا گیا ہے دیگر صوبوں کے افراد کی طرف سے سندھ کے ڈومیسائل اور کوٹے پر فیڈرل پبلک سروس کمیشن کا امتحان پاس کر کے ملازمتیں حاصل کرنے کی اطلاعات ہیں۔ سندھ حکومت نے مشکوک ڈومیسائل پر سی ایس ایس کا امتحان پاس کرنے والے افسران کی فہرست بھی ارسال کی ہے
محکمہ داخلہ سندھ کی جانب سے لکھے گئے خط میں آٹھ مبینہ جعلی ڈومیسائل کےحامل افسران کے نام بھی ارسال کیے ہیں جن کی دستاویزات کی جانچ پڑتال کی جائے گی
علاوہ ازیں صوبہ سندھ میں غیر مقامی افراد کا جعلسازی سے ڈومیسائل بنوانے کے معاملے پر سندھ حکومت نے قوانین مزید سخت کرنے کا فیصلہ کیا ہے اس حوالے سے صوبے بھر سےجاری ڈومیسائل اور پی آر سی کی ازسر نو تحقیقات کرنے کا فیصلہ بھی کیا گیا ہے
فیصلے کے مطابق گزشتہ دس سالوں میں جاری کیے گئے ڈومیسائل پی آر سی کی جانچ پڑتال کرائی جائے گی، اس ضمن میں حکومت سندھ نے صوبے بھر کے تمام ڈپٹی کمشنرز کو خط لکھ کر ڈومیسائل اور پی آرسی کے اجراء سے قبل فیلڈ ویریفکیشن کی ہدایت کی ہے
خط میں کہا گیا ہے کہ ڈومیسائل کے اجراء سے قبل رہائش، تعلیمی اسناد کے ثبوت کی تصدیق کی جائے اور پچھلے دس برسوں میں جعلسازی سے حاصل کیے گئے ڈومیسائل پی آرسیز منسوخ کئیے جائیں.
