جب تین عام کویلوں کے ساتھ ”اونون“ کویل کو گزشتہ جون میں منگولیا کے خورخ پہاڑوں سے روانہ کیا گیا، تو کسی کو بھی توقع نہیں تھی کہ وہ جنوبی افریقہ تک کا 26،000 کلومیٹر کا سفر کرے گا!!
گزشتہ جون میں جب اونون منگولیا میں وادی خورخ کی گھومتی ہوئی پہاڑیوں کے اوپر سے اترا تو محققین کو اندازہ نہیں تھا کہ وہ اسے دوبارہ زندہ دیکھ بھی پائیں گے یا نہیں۔
ایک مشرقی کویل اور تین دیگر عام کویلوں کے ساتھ ، ہر ایک چھوٹے سے ٹریکنگ ڈیوائس سے لیس ، وہ جنوبی افریقہ کے ایک غیریقینی سفر پر جانے والے تھے۔
پچھلے مہینے ، وہ واحد پرندہ تھا جو اپنے ٹریکر کے ساتھ محفوظ طریقے سے واپس لوٹا.
برٹش ٹرسٹ فار آرنیتھولوجی کے سینئر ریسرچ ایکولوجسٹ ڈاکٹر کرس ہیوسن کا کہنا ہے کہ "یہ ایک حیرت انگیز طور پر طویل ہجرت ہے ، اونون کا چھبیس ہزار کلومیٹر دور کا سفر کسی بھی زمینی پرندے کے ریکارڈ کردہ طویل ترین سفروں میں سے ایک ہے۔”
اونون نے نہ صرف تحفظ پسندوں کو حیران کیا، بلکہ پوری دنیا میں سوشل میڈیا کی توجہ بھی اپنی جانب کھینچ لی۔ چونکہ کورونا وائرس لاک ڈاؤن نے دنیا کو گھروں تک محدود کر دیا تھا، ایسے میں شائقین نے ”منگولیا کوکو پروجیکٹ“ کی آن لائن اپ ڈیٹس میں بہت زیادہ دلچسپی کا اظہار کیا ، وہ اونون کو سمندروں پر گھومتے ہوئے دیکھ کر حیرت زدہ رہ گئے، جس نے 16 ممالک میں 27 بارڈر کراسنگ کیے.
وہ 27 مئی کو ہندوستان ، کینیا اور سویڈن میں میڈیا سلیبریٹی بن کر واپس منگولیا لوٹا ، وہ ٹیلی ویژن پر نمودار ہوا اور اخبار کی سرخیاں پر چھا گیا۔
محققین اب اس سفر کے اعداد و شمار کا مطالعہ کر رہے ہیں کہ وہ کویل کیوں سفر کرتے ہیں ، اور وہ آب و ہوا کے بحران سے کیسے متاثر ہو سکتے ہیں۔
ہیوسن ، جنہوں نے منگولیا کے وائلڈ لائف سائنس اور کنزرویشن سینٹر کے ساتھ اس منصوبے پر کام کیا ، تسلیم کرتے ہیں کہ انہیں یقین نہیں تھا کہ کویل اتنے ماہر ہجرت کرنے والے ہیں۔ وہ کہتے ہیں "اگرچہ ان کے اچھے لمبے پر ہیں ، لیکن جب وہ افزائش گاہ کے ارد گرد اڑتے ہیں تو وہ دوسرے پرندوں کے مقابلے میں قدرے بھدے نظر آتے ہیں ،”
درحقیقت ، اونون جیسے کویل ، جو کیٹرپلر کی تلاش میں ہجرت کرتے ہیں ، جو ان کا پسندیدہ کھانا ہے ، وہ تیزی سے سفر کرتے ہیں۔ ٹیل ونڈس کا استعمال کرتے ہوئے ، وہ ایک ہفتے کے لئے ایک دن میں 1000 کلومیٹر سے زیادہ تک فاصلہ طے کر سکتے ہیں۔
کیٹرپلر موسم گرما میں دھوپ والی اور گیلی جگہوں پر سب سے زیادہ پائے جاتے ہیں، یہ کھینٹی پہاڑی سلسلے کے جنوب مشرق میں ، وادی خورخ میں بہت زیادہ ہیں۔ جیسے جیسے موسم بدلتا ہے وہ مونسون کے موسم کے لیے بھارت جاتے ہیں ، اور پھر ہوا بدلتے ہی مشرقی افریقہ چلے جاتے ہیں۔
یہ آسان سفر نہیں ہے۔ چار دوسرے پرندے جو اونون کی طرح ایک ہی وقت میں روانہ ہوئے تھے، واپس نہیں لوٹے۔ ان کے بارے میں کوئی معلومات نہیں ہے – ان کے ٹریکر ناکارہ ہو سکتے ہیں یا پھر وہ مر چکے ہیں۔ خیال کیا جاتا ہے کہ ان میں سے ایک ، بایان ، صومالیہ سے صرف سات دنوں میں 7،200 کلومیٹر کی پرواز کے بعد ، چین کے صوبہ یُنان میں مر گیا تھا۔
جیسا کہ محققین ایشیا بھر سے کویلوں کی پرواز کے راستوں کا موازنہ کرتے ہیں ، وہ اس بات کی تلاش کر رہے ہیں کہ اونون اور اس کے ساتھی اس طرح کے مہاکاوی سفروں کا انتخاب کیوں کرتے ہیں۔ ہیوسن کا کہنا ہے کہ وہ خط استوا کے جنوب میں ایشیا یا آسٹریلیا میں ممکنہ طور پر سردیوں میں جا سکتے ہیں ، لیکن وہ ایسا نہیں کرتے ہیں۔ شاید جزوی طور پر حریف پرجاتیوں ، مشرقی کویل کی موجودگی کی وجہ سے ایسا ہوتا ہو.
انہوں نے مزید کہا کہ بہت لمبا سفر شاید اس سے کہیں زیادہ آسان ہے جتنا کہ دکھائی دے رہا ہے، کیونکہ راستے میں کیٹرپلر کی بہت زیادہ فراہمی ہے۔ "اگر آپ وہاں پہنچ کر فراوانی سے کھانا حاصل کر رہے ہیں تو توانائی کے لحاظ سے یہ کوئی مہنگی چیز نہیں ہے۔” اس سے یہ سوالات اٹھتے ہیں کہ اگر عالمی حرارتی یا دیگر خطرات خوراک کی دستیابی کو متاثر کرتے ہیں تو کویل اس کا انتظام کیسے کر سکتے ہیں۔
منگولیا کے وائلڈ لائف سائنس اینڈ کنزرویشن سینٹر کے نیامبائر بٹبائر کا کہنا ہے کہ "اگر ان کی اسٹاپ اوور سائٹیں کھو گئیں تو وہ بڑی پریشانی کا شکار ہوں گے ، اس منصوبے نے اہم فلائی ویز اور ان علاقوں میں جہاں پرندے آرام کرتے اور خوراک حاصل کرتے ہیں، ان کی حفاظت کے بارے میں آگاہی پیدا کی ہے”
منگولیا میں ، صوبہ Khentii کے اسکولوں نے اس منصوبے میں حصہ لیا ہے ، پرندوں کے نام رکھنے میں مدد کی ہے اور ان کے سفر کو قریب سے دیکھا ہے۔
اونون ، جس کا نام ایک مقامی دریا کے نام پر رکھا گیا ہے ، نے ہندوستان میں سوشل میڈیا استعمال کرنے والوں کی بھی بہت زیادہ توجہ مبذول کرائی ہے ، ویب سائٹ اور ٹویٹر اکاؤنٹ برڈنگ بیجنگ کے ذریعے کویل کے سفر کو دستاویزی طور پر پیش کرنے والے ٹیری ٹاؤنشینڈ نے بتایا کہ ٹویٹر پر صارفین نے سفر کے بارے میں سوالات کی بھرمار کر دی: "کیا کویل پانی پر رک سکتے ہیں؟” (وہ صرف ایک سمندری گزرگاہ کے دوران رک سکتے ہیں اگر کوئی جزیرہ ہو) اور "وہ کتنی دیر تک رکتے ہیں؟” (کچھ گھنٹوں سے چند دنوں تک.. کچھ بھی)
وادی خورخ کی سرسبز پہاڑیوں اور گندم کے کھیتوں میں ، اونون پھر زندگی کے ساتھ آگے بڑھ رہا ہے۔ منگولیا کوکو پروجیکٹ حکام کا کہنا ہے "اس کے پاس ضائع کرنے کے لیے وقت نہیں ہے، کیونکہ اسے اپنا مسکن بسانے اور نسل بڑھانے کی ضرورت ہے.”
یہ بھی پڑھئیے:
