خواہ فائدہ مند ہو یا نقصان دہ، عادات ہماری روزمرہ کی زندگی میں گہرائی سے جڑی ہوئی ہیں۔ وہ ہمارے معمولات کا طے کرتی ہیں، ہمارے انتخاب کی رہنمائی کرتی ہیں، اور ہمارے طرز عمل کو مجسم بناتی ہیں۔ جہاں فائدہ مند عادات ہمیں کامیابی کی طرف لے جا سکتی ہیں، وہیں نقصان دہ عادات ہماری ترقی کو روک سکتی ہیں اور ہماری صحت کو منفی طور پر متاثر کر سکتی ہیں۔ لہٰذا، نقصان دہ عادات کو توڑنے اور ان سے سے چھٹکارا پانے کے طریقے کو سمجھنا انتہائی اہمیت کا حامل ہے۔ تاہم، ان عادات کو مؤثر طریقے سے توڑنے کے لیے، ہمیں سطحی کے بجائے تھوڑا گہرائی میں جاکر کوشش کرنی چاہیے اور ان کے زیر اثر نیورو سائنس کو سمجھنا چاہیے
اس مضمون کا مقصد نیورو سائنس کے دلچسپ دائرے اور نقصان دہ عادات کو توڑنے میں اس کے کردار کو تلاش کرنا ہے۔ ہم عادات کے بننے، ان کو توڑنے کے روایتی طریقوں، اور نیورو سائنس کس طرح زیادہ عملی نقطہ نظر پیش کر سکتی ہے، اس پر تبادلہ خیال کریں گے۔ اس سائنس کو سمجھ کر، جو ہماری عادات پر مبنی ہے
عادات کو سمجھنا
عادات خودکار ردعمل یا رویے ہیں، جو ہم نے تجربے سے سیکھے ہیں۔ مثال کے طور پر، سونے سے پہلے دانت صاف کرنا ایک عادت ہے، جو بہت سے لوگوں نے بچپن سے ہی پیدا کی ہے۔ یہ عادات اس وقت بنتی ہیں، جب اعمال کا ایک سلسلہ مخصوص حالات یا محرکات سے وابستہ ہو جاتا ہے۔ جب یہ حالات ہوتے ہیں تو دماغ خود بخود اسی طرح کے اعمال کا سلسلہ شروع کر دیتا ہے
عادت کی تشکیل کی نیورو سائنس
نیوران، دماغ کی بنیادی اکائیاں، عادت کی تشکیل میں اہم کردار ادا کرتی ہیں۔ جب ہم کسی رویے کو دہراتے ہیں، جیسے کہ دباؤ کے وقت سگریٹ پینا، تو اس رویے سے وابستہ نیوران ایک ساتھ متحرک ہو جاتے ہیں، جس سے ایک ٹھوس عصبی راستہ بنتا ہے۔ یہ راستہ تکرار کے ساتھ زیادہ مضبوط اور زیادہ خودکار ہو جاتا ہے، جس سے عادت بن جاتی ہے۔
عادات کو توڑنے/چھٹکارا پانے کے روایتی طریقے
روایتی طور پر، عادات کو توڑنے میں یاد دہانیوں، سزاؤں، یا انعامات کا استعمال شامل ہے، جیسے کہ ہر گھنٹے پانی پینے کے لیے اپنے فون پر یاد دہانی سیٹ کرنا یا ایک ہفتے کی باقاعدہ ورزش کے لیے اپنے آپ کو انعام دینا۔ تاہم، یہ طریقے اکثر طویل مدت میں غیر موثر ثابت ہوتے ہیں، کیونکہ وہ بنیادی اعصابی راستوں پر توجہ نہیں دیتے، جو عادت کو آگے بڑھاتے ہیں۔
عادات کو توڑنے کی نیورو سائنس
نیورو سائنس عادات کو توڑنے کے لیے ایک مختلف نقطہ نظر پیش کرتی ہے۔ اس نقطہ نظر میں بری عادت سے وابستہ ’نیورونل فائرنگ‘ یا عصبی تحرک کے سلسلے میں خلل ڈالنا شامل ہے۔ ایسا کرنے کا ایک مؤثر طریقہ یہ ہے کہ بری عادت کو انجام دینے کے فوراً بعد متبادل رویہ اپنانا۔ مثال کے طور پر، اگر آپ عادتاً دباؤ کے وقت سگریٹ پیتے ہیں، تو اس کے بجائے کوئی پھل کھائیں۔ یہ عمل، جسے طویل مدتی ڈپریشن کہا جاتا ہے، بری عادت سے منسلک اعصابی راستے کو کمزور کرتا ہے اور متبادل رویے سے منسلک راستے کو مضبوط کرتا ہے۔
عادات کو توڑنے میں نیورو سائنس کا عملی اطلاق
نیورو سائنس پر مبنی اس نقطہ نظر کو حقیقی زندگی میں لاگو کرنے میں شعوری طور پر اس بات کو تسلیم کرنا شامل ہے کہ جب ہم نے اتنے عرصے ایک بری عادت کو انجام دیا ہے تو فوری طور پر کسی مثبت یا غیر جانبدارانہ رویے کو بھی اپنا سکتے ہیں۔ مثال کے طور پر، اگر آپ عادتاً صبح سویرے سب سے پہلے سوشل میڈیا چیک کرتے ہیں، تو اسے چند منٹ کے مراقبہ یا کتاب پڑھنے سے بدلنے کی کوشش کریں۔ وقت گزرنے کے ساتھ، یہ مشق بری عادت سے منسلک ’نیورونل فائرنگ‘ یا عصبی تحرک کے سلسلے میں خلل ڈال سکتی ہے، جس سے اسے توڑنا آسان ہو جاتا ہے۔
عادات کو توڑنے کے 10 نکات
عادت کی شناخت کریں: بری عادت کو توڑنے کا پہلا قدم اس کی شناخت کرنا ہے۔ اپنے اعمال سے آگاہ رہیں اور پہچانیں کہ آپ کون سے طرز عمل کو تبدیل کرنا چاہتے ہیں۔
محرک کو سمجھیں: ہر عادت کسی نہ کسی واقعے سے متحرک ہوتی ہے۔ مثال کے طور پر، تناؤ آپ کو غیر صحت بخش نمکین کھانے پر اکسا سکتا ہے۔ اس بات کی نشاندہی کریں کہ آپ کی بری عادت کو کیا متحرک کرتا ہے۔
متبادل رویے کا انتخاب کریں: ایک مثبت یا غیر جانبدارانہ رویہ تلاش کریں، جو آپ کسی بری عادت کے بجائے اپنا سکتے ہیں۔ یقینی بنائیں کہ یہ ایسی چیز ہو، جس سے آپ لطف اندوز ہوں، تاکہ آپ خود کو اسے کرنے کی ترغیب دے سکیں۔
چھوٹی شروعات کریں: اپنی زندگی کو راتوں رات تبدیل کرنے کی کوشش نہ کریں۔ چھوٹی تبدیلیوں کے ساتھ شروع کریں اور آہستہ آہستہ بڑی تبدیلیوں تک پہنچیں۔
ذہن سازی کی مشق کریں: لمحہ موجود میں خود کو شعوری طور پر حاضر رکھیں۔ جب آپ بری عادت میں شامل ہونے کی خواہش محسوس کریں تو رک جائیں اور شعوری طور پر اس کی بجائے متبادل رویہ اختیار کرنے کا انتخاب کریں۔
مستقل مزاج رہیں: مستقل مزاجی نئی عادات کی تشکیل میں اہم ہے۔ اس بات کو یقینی بنائیں کہ جب بھی ’ٹرگر‘ واقع ہوتا ہے، یعنی بری عادت کو پورا کرنے کی شدید خواہش جاگتی ہے تو متبادل رویے میں مشغول ہو جائیں۔
کامیابی کا تصور کریں: تصور ایک طاقتور ٹول ہو سکتا ہے۔ اپنے آپ کو بری عادت کی بجائے متبادل رویے میں کامیابی کے ساتھ شامل ہونے کا تصور کریں۔
مدد حاصل کریں: دوستوں، خاندان، یا کسی پیشہ ور سے مدد حاصل کرنے میں ہچکچاہٹ محسوس نہ کریں۔ وہ آپ کی حوصلہ افزائی کر سکتے ہیں اور آپ کو ذمہ دار بنا سکتے ہیں۔
اپنے آپ کو انعام دیں: جب آپ کامیابی سے بری عادت سے بچتے ہیں اور متبادل رویے میں مشغول ہوجاتے ہیں تو اپنے آپ کو انعام دیں۔ یہ جاری رکھنے کی ترغیب کے طور پر کام کر سکتا ہے۔
صبر کریں: عادات بدلنے میں وقت لگتا ہے۔ اگر آپ کو فوری نتائج نظر نہیں آتے ہیں تو مایوس نہ ہوں۔ اسے جاری رکھیں؛ وقت گزرنے کے ساتھ، آپ کو بری عادت سے بچنا آسان ہو جائے گا۔
نتیجہ
بری عادتوں کو توڑنا ایک چیلنج ہے جس کا ہم میں سے بہت سے لوگوں کو سامنا ہے۔ روایتی طریقے، اگرچہ کسی حد تک مددگار ہوتے ہیں، اکثر طویل مدتی حل فراہم کرنے میں ناکام رہتے ہیں۔ تاہم، ہم اپنی عادات کے پس پردہ نیورو سائنس کو سمجھ کر زیادہ عملی انداز اپنا سکتے ہیں۔ یہ نقطہ نظر، طویل مدتی ڈپریشن کے تصور سے جڑا ہوا ہے، ہمیں بری عادات سے منسلک اعصابی راستوں میں خلل ڈالنے اور ان کی جگہ مزید مثبت طرز عمل اختیار کرنے کی اجازت دیتا ہے۔ یہ ایک آسان سفر نہیں ہے، لیکن شعوری کوشش اور سمجھ بوجھ سے بری عادتوں کو توڑنے میں کامیابی حاصل کی جا سکتی ہے۔ لہٰذا، اگلی بار جب آپ خود کو اس سگریٹ تک پہنچتے ہوئے پائیں گے، جب آپ تناؤ کا شکار ہوں گے یا صبح سویرے سوشل میڈیا کو سب سے پہلے چیک کریں گے، تبدیلی کے رویے کی طاقت اور اس کی پشت پناہی کرنے والی سائنس کو یاد رکھیں۔ نیورو سائنس کی طاقت کو بروئے کار لائیں، ان بری عادات کو توڑیں، اور صحت مند زندگی کا آغاز کریں
حوالہ: نیو ٹریڈر یو
ترجمہ: امر گل.
