امریکی شہری نے پاکستان سمیت چار ملکوں کو نوادرات واپس کر دیے

برطانوی اخبار دی گارڈین نے اپنی رپورٹ میں کہا ہے کہ امریکی شہری نے پاکستان سمیت چار ملکوں کو انیس نوادرات واپس کر دیے ہیں

برطانوی اخبار ’دی گارڈین‘ کی رپورٹ میں بتایا گیا کہ جان گوم پرٹس نے خبر پڑھنے کے بعد چوری شدہ نوادرات واپس کرنے کا فیصلہ کیا، انہیں اَسی ہزار پاؤنڈ کی یہ چیزیں ورثے میں اپنی دادی سے ملی تھیں، اور ان کا ذریعہ غیر قانونی کھدائی ہو سکتی ہے کیونکہ ان کو حاصل کرنے کی کوئی تاریخ موجود نہیں ہے

رپورٹ میں مزید بتایا گیا ہے کہ وہ پاکستان، اٹلی، یونان اور قبرص کو نوادرات واپس کرکے چیزوں کو قانونی اور اخلاقی طور ٹھیک کرنا چاہتے ہیں، انہوں نے اپنے بہن، بھائیوں کی رضامندی کے بعد یہ چیزیں واپس کی ہیں

تاہم واپس کیے گئے نوادارت کے بارے میں مزید تفصیلات نہیں بتائی گئیں

دی گارڈین کی رپورٹ کے مطا بق انہوں نے کہا کہ یہ کرنا ٹھیک لگتا ہے، میں نے اس حوالے سے اسٹوری پڑھی تھی، ہمارے پاس ڈھائی ہزار سال پرانے نوادرات ہیں، ہمیں دیکھنا چاہیے کہ کیا ہم یہ واپس کر سکتے ہیں یا نہیں

تاہم، رپورٹ میں بتایا گیا کہ انہیں نوادرات واپس کرنے کے طریقہ کار کے حوالے سے کوئی اندازہ نہیں تھا، انہوں نے کیمبرج یونیورسٹی کے پروفیسر کرسٹوس تسیروگانیز سے رابطہ کیا، جو آثار قدیمہ کے ماہر ہیں

اس حوالے سے پروفیسر کرسٹوس تسیروگانیز نے کہا کہ انہوں نے مجھ سے رابطہ کر کے مشورہ طلب کیا، رپورٹ میں مزید کہا گیا کہ پروفیسر نے جان گوم پرٹس کو مشورہ دیا کہ متعلقہ ممالک کے سفارت خانوں سے رابطہ کرکے ان چیزوں کو ان کے حوالے کر دیں

رپورٹ میں بتایا گیا کہ ان ممالک نے اس عمل کو سراہا اور جان گوم پرٹس اور پروفیسر کرسٹوس تسیروگانیز کا شکریہ ادا کیا

گزشتہ مہینے امریکی حکومت نے چھیالیس نوادرات پاکستان کو واپس کر دیے تھے، جس میں بدھ مت سے تعلق رکھنے والا فن پارہ بھی شامل تھا، جس کی قیمت گیارہ لاکھ ڈالر ہے، جسے اسلام آباد میوزیم میں رکھ دیا گیا ہے

واضح رہے کہ 1980ع کی دہائی میں پاکستان کے گندھارا علاقے میں ایک نامعلوم آثار قدیمہ کے مقام سے بدھا (بدھ پادھا) کے کشان دور کے قدموں کے نشانات چوری کرکے امریکا اسمگل کیے گئے تھے۔