جب سے ارب پتی ایلون مسک نے شارٹ میسج سروس ٹویٹر کو خریدا ہے، ان پر دباؤ بھی بڑھتا جا رہا ہے۔ اب اس کا اثر ایلون مسک کی دولت اور جائیداد پر بھی پڑ رہا ہے اور وہ دنیا کے امیر ترین شخص نہیں رہے
تجزیہ کاروں کے مطابق ٹیسلا کے باس ایلون مسک پر سرمایہ کاروں کا اعتماد کم ہو رہا ہے اور یہ چیز ٹیسلا کے حصص کو بھی متاثر کر رہی ہے۔ منگل کو ٹیسلا کے شئیرز میں پانچ فیصد سے بھی زائد کی کمی ہوئی ہے اور اس طرح اس کمپنی کا ایک شیئر تقریبا 158 ڈالر کا ہو گیا ہے، جو گزشتہ دو برسوں کی کم ترین سطح ہے
حیران کن بات یہ ہے کہ امریکہ میں افراطِ زر میں کمی ہوئی ہے اور گزشتہ روز امریکی ٹیکنالوجی انڈیکس ’نیس ڈیک‘ بھی اوپر گیا ہے لیکن ٹیسلا شیئرز پر اس کا اثر منفی انداز میں پڑا ہے۔ رواں برس کے آغاز پر ٹیسلا کے ایک شئیر کی قیمت تقریباً چار سو ڈالر تھی
بروکر ٹرپل ڈی ٹریڈنگ کے تجزیہ کار ڈینس ڈک کہتے ہیں ”سرمایہ کاروں کو ڈر ہے کہ مسک کی ٹویٹس ٹیسلا برانڈ کو نقصان پہنچائیں گی۔“ ایک اسٹاک مارکیٹر نے تبصرہ کرتے ہوئے لکھا ہے ”بہت سے لوگ ٹیسلا سے دوری اختیار کر رہے ہیں کیونکہ وہ سی ای او کے پیغام کی توثیق نہیں کرنا چاہتے‘‘۔ ویلتھ مینیجنگ کمپنی ڈکوٹا ویلتھ کے پورٹ فولیو مینیجر رابرٹ پاولک کے مطابق، ”جب سے مسک نے ‘بے ڈھنگے‘ انداز سے ٹویٹر کمپنی خریدی ہے، تب سے ٹیسلا اسٹاک دباؤ کا شکار ہے۔“
بہرحال اس تمام تر صورتحال کا اثر اب مسک کے ذاتی پیسے کے ذخیرے پر بھی پڑا ہے۔ الیکٹرک کاریں اور خلائی راکٹ بنانے والی کمپنی کے ساتھ ساتھ ٹویٹر کے سربراہ ایلون مسک دنیا کے امیر ترین افراد کی درجہ بندی میں دوسرے نمبر پر آگئے ہیں۔ بلومبرگ بلینیئرز اور فوربز دونوں ہی کی درجہ بندی میں گزشتہ برس ایلون مسک پہلے نمبر پر تھے اور اب دوسرے نمبر پر آ گئے ہیں
دنیا کے امیر ترین افراد کی درجہ بندی میں اب پہلے نمبر پر فرانسیسی بیرنہار آرنو ہیں
بلومبرگ کے اندازوں کے مطابق جنوری سے اب تک مسک کی نجی دولت ایک سو بلین ڈالر کم ہو گئی ہے اور اب ان کے پاس تقریبا 163.6 بلین ڈالر باقی رہ گئے ہیں۔ دوسری جانب بیرنہار آرنو کی دولت کا تخمینہ تقریبا 170,8 ارب ڈالر لگایا گیا ہے
واضح رہے کہ 73 سالہ بیرنہار آرنو فرانسیسی لگژری ایمپائر ‘ایل وی ایم ایچ‘ کے چیئرمین ہیں، جس میں ‘ڈیور‘ اور ‘لوئی ویٹوں‘ جیسے فیشن آئیکن اور ‘موئتے شادوں‘ جیسے شیمپین برانڈز شامل ہیں۔
