کیمبرج : ایک نئے سروے میں خبردار کیا گیا ہے کہ بالخصوص چھوٹے بچوں کو اسمارٹ فون اور ٹیبلٹ سے دور رکھیں کیونکہ مسلسل اسکرین تکنے سے ان میں مائیوپیا یعنی دور کی نظر متاثر ہونے کا امکان 80 فیصد تک پہنچ جاتا ہے
موقر طبی تحقیقی جریدے لینسٹ میں شائع ایک رپورٹ میں بتایا گیا ہے کہ کیمبرج میں واقع اینجلیا رسکِن یونیورسٹی نے تین ماہ سے لے کر تینتیس برس تک کے لگ بھگ تین ہزار افراد کا جائزہ لیا ہے۔ انہوں نے ایک سوالنامے میں ان سے اسمارٹ فون یا ٹیبلٹ کی اسکرین دیکھنے کے متعلق سوالات کئے اور بینائی کے ٹیسٹ کئے ہیں
نتائج سے انکشاف ہوا کہ خاص طور پر بچے جب کمپیوٹر اسکرین کے ساتھ ساتھ اسمارٹ فون کا استعمال بھی شروع کردیں، تو دور کی نگاہ کمزور ہونے کا خطرہ 80 فیصد تک بڑھ سکتا ہے، جبکہ صرف اسمارٹ فون یا ٹیبلٹ کا استعمال بڑھ جائے تو اس سے یہ خطرہ دیگر کے مقابلے میں 30 فیصد تک پہنچ جاتا ہے
یاد رہے کہ 2019ع میں عالمی ادارہ برائے صحت نے خبردار کیا تھا کہ دو سال سے کم عمر کے بچوں کے ہاتھ میں فون ہر گز نہ دیا جائے، کیونکہ اس دوران بچوں کی نظر اور بصارت کی تشکیل ہو رہی ہوتی ہے
عالمی ادارہ برائے صحت کی جانب سے خبردار کیا گیا تھا کہ دو سال سے پانچ برس تک کے بچوں کو صرف اور صرف ایک گھنٹے تک ہی اسکرین کے سامنے رکھا جائے۔ اس کی وجہ یہ ہے کہ بصارت کے کئی پہلو پانچ برس تک بنتے رہتے ہیں
لیکن سروے میں معلوم ہوا کہ صرف برطانیہ میں سینساس وائڈ سینٹر کی تحقیق کے مطابق دو ہزار خاندان ایسے تھے، جہاں بچے ایک ہفتے میں 23 گھنٹوں تک اسکرین پر نظریں گاڑے رکھتے تھے
بعد ازاں کووڈ-19 وبا کے دوران بچوں کی تعداد اور ان کے فون تکنے کے اوقات (اسکرین ٹائم) میں اضافہ ہونے لگا۔ اس کی وجہ باہر نکلنے پر پابندی اور دوسری جانب آن لائن تعلیم قرار دی گئی ہے۔ شاید پاکستان میں بھی حالات اس سے مختلف نہیں ہونگے، کیونکہ والدین بچوں کو فوری طور پر اسمارٹ فون تھما کر خود بری الذمہ کر دیتے ہیں
اس تحقیق کے مصنف اور آنکھوں کے ماہر پروفیسر رابرٹ بورن کہتے ہیں کہ ہزاروں بچوں سے حاصل شدہ ڈیٹا سے پتہ چلتا ہے کہ کس طرح اسمارٹ فون اور ٹیبلٹ نہ صرف بچوں کی بصارت کو متاثر کر رہے ہیں، بلکہ نوعمروں میں دور کی نگاہ کمزور کر رہے ہیں.
