سان فرانسسكو : فیسبک نے آخرکار اپنی اسمارٹ عینک پیش کردی ہے، جسے مشہور لگژری عینک ساز کمپنی رے بین نے اپنے اسٹور پر رکھا ہے
عینک کی دونوں جانب 5 میگا پکسل کیمرے نصب ہیں، جنہیں ایک ساتھ استعمال کرتے ہوئے تصاویر اور وڈیوز بنائی جاسکتی ہیں۔ دوکیمروں کی بدولت اب صارفین تھری ڈی تصاویر اور وڈیو تیار کرسکتے ہیں۔ اس میں موجود طاقتور اسپیکر سے موسیقی سنی جا سکتی ہے جبکہ اس عینک سے فون کال کرنا اور وصول کرنا بھی ممکن ہے
لیکن اسے چلانے کے لیے اینڈروئڈ یا آئی او ایس ایپ اور ڈیوائس (فون یا ٹیبلٹ) درکار ہوگی۔ تمام خوبیوں کے باوجود یہ عینک صرف 50 گرام وزنی ہے اور قیمت 299 ڈالر کے لگ بھگ رکھی گئی ہے۔ اس قیمت کا مقصد زیادہ سے زیادہ صارفین کو راغب کرنا ہے
دلچسپ بات یہ ہے کہ اس کا کیس خالص چمڑے کا ہے، لیکن اس میں عینک رکھ کر اسے چارج کیا جاسکتا ہے اور بیٹری پورے دن چل سکتی ہے۔ دیکھنے پر یہ فیشن اور اسٹائل سے بھرا دھوپ کا جشمہ لگتا ہے لیکن کئی بٹنوں سے آپ میڈیا ریکارڈنگ یا فون کال وصول کرسکتے ہیں
وڈیو ریکارڈنگ کی صورت میں ایک سفید ایل ای ڈی روشن ہوجاتی ہے جس کے بعد آپ کے دوست وڈیو کے لیے تیار ہو سکتے ہیں
لوگوں کی اکثریت کا خیال تھا کہ اس میں ڈجیٹل آگمینٹڈ ریئلٹی کا آپشن ہوگا لیکن ایسا نہیں ہے ۔ یہی وجہ ہے کہ اس کی قیمت کم ہے اور عینک کے اندر کسی قسم کا کوئی ڈسپلے موجود نہیں، اور سادہ ڈسپلے بھی نہیں کہ جس سے آپ وڈیو وغیرہ دیکھ سکیں
رے بین نے کہا ہے کہ اس اسمارٹ ڈجیٹل چشمے کی بدولت اب فون کو ایک نیا روپ دینا ممکن ہوجائے گا.
