اداکار سیف علی خان اور کرینہ کپور کے یہاں رواں سال 21فروری کو دوسرے بیٹے کی پیدائش ہوئی تھی جس کا اصل نام تاحال نہیں بتایا گیا تھا, اداکارہ کی کتاب ‘پریگننسی بائبل’ کی اشاعت کے بعد صارفین کو علم ہوا کہ سیف اور کرینہ کے بیٹے کا نام جہانگیرعلی خان ہے.
سیف اور کرینہ نے اپنے دوسرے بیٹے کے نام کو لے کر سوشل میڈیا پر ہونے والی تنقید پرابھی تک خاموشی اختیار کی ہوئی تھی لیکن اب اس حوالے سے کرینہ کپور کا بیان سامنے آیا ہے.
بھارتی میڈیا کے مطابق ایک انٹرویو دیتے ہوئے کرینہ کپور نے اس معاملے پر بات کرتے ہوئے کہا کہ میں مثبت سوچ کی حامل انسان ہوں اور خوشیاں اور مثبت سوچ پھیلانا چاہتی ہوں۔ ہماری زندگیوں میں منفی سوچوں اور باتوں کے لیے کوئی جگہ نہیں ہے.
کرینہ نے مزید کہا دیکھو کووڈ 19 وبائی بیماری نے کیا کیاہے، اس نے دنیا کو قریب کردیا ہے، ہم سب کو یہی سوچنا چاہئے، جب ان سے پوچھا گیا کہ وہ منفی سوچوں اور تنقیدوں سے کیسے نمٹتی ہیں؟ اس سوال کے جواب میں کرینہ نے کہا منفی خیالات اور تنقید سے بچنے کے لیے مجھے اب مراقبہ شروع کرنا ہے۔
واضح رہے کہ تنقید سے بچنے کے لیے سیف اور کرینہ نے اپنے دوسرے بیٹے کا نام کئی ماہ تک لوگوں سے چھپائے رکھا تھا۔ بعدازاں جولائی میں یہ بات عام ہوئی کہ سیف کرینہ نے اپنے دوسرے بیٹے کا نام ’جے‘ رکھا ہے۔ بہرحال حال ہی میں ان کے دوسرے بیٹے کا پورا نام منظر عام پر آیا ہے جو کہ جہانگیر علی خان ہے۔
