جنرل باجوہ کو خط لکھ کر فوجی افسران کو بغاوت پر اکسانے کے جرم میں کمپیوٹر انجنیئر کو پانچ برس قید

نیوز ڈیسک

راولپنڈی : جنرل باجوہ کو تنقیدی خط لکھنے والے کمپیوٹر انجنیئر کو فوجی افسران کو بغاوت پر اکسانے کے جرم میں پانچ برس قید کی سزا سنائی گئی ہے

سزا پانے والے کمپیوٹر انجنیئر نے جنرل قمر جاوید باجوہ کو تحریر کیے گئے خط میں مبینہ طور پر اُن کی مدت ملازمت میں توسیع ملنے اور فوج کی پالیسوں پر ناپسندیدگی کا اظہار کرتے ہوئے انھیں مستعفی ہونے کو کہا تھا

بری فوج کے سربراہ جنرل قمر جاوید باجوہ کو ملازمت میں توسیع پر تنقیدی خط لکھنے اور اسے دیگر فوجی جرنیلوں کو بھی بھیجنے کے معاملے میں پاکستانی فوج کے ایک ریٹائرڈ میجر جنرل کے بیٹے کو پانچ برس قید بامشقت کی سزا سنائی گئی ہے

عسکری ذرائع کے مطابق ملزم حسن عسکری کے خلاف فیلڈ جنرل کورٹ مارشل کی کارروائی گوجرانوالہ چھاؤنی میں کی گئی

ذرائع کا کہنا ہے کہ انہیں یہ سزا فوجی افسران کو بغاوت پر اکسانے کے جرم پر دی گئی ہے. سزا سنائے جانے کے بعد مجرم حسن عسکری کو ساہیوال میں واقع ہائی سکیورٹی جیل منتقل کیا گیا ہے

حسن عسکری کے خلاف تعزیرات پاکستان کی دفعہ 131 کے تحت مقدمہ درج کیا گیا تھا جو فوج کے کسی بھی افسر یا اہلکار کو بغاوت پر اُکسانے کے زمرے میں آتا ہے

اس حوالے سے درج ہونے والی ایف آئی آر میں اس بات کا بھی ذکر کیا گیا ہے کہ ملزم حسن عسکری نے اپنے خطوط میں فوج کی اعلیٰ قیادت کے خلاف غیر قانونی ریمارکس بھی دیے جس سے ظاہر ہوتا ہے کہ ملزم کا تعلق ملک دشمن عناصر سے ہے جو پاکستانی فوج میں انارکی پھیلانا چاہتے ہیں

فوجی عدالت سے انہیں یہ سزا جولائی 2021 میں سنائی گئی تھی، لیکن اس بارے میں تفصیلات حسن عسکری کے والد کی جانب سے حال ہی میں لاہور ہائی کورٹ پنڈی بینچ میں اپنے بیٹے کی ساہیوال جیل سے راولپنڈی کی اڈیالہ جیل میں منتقلی کی درخواست میں سامنے آئی ہیں. جس پر عدالت نے فیلڈ جنرل کورٹ مارشل سمیت تمام متعلقہ فریقین کو نوٹس جاری کر دیا ہے

حسن عسکری پر الزام تھا کہ انہوں نے گذشتہ برس ستمبر میں جنرل قمر جاوید باجوہ کو خط لکھا کیا تھا. اپنے خط میں انہوں نے مبینہ طور پر اُن کی مدت ملازمت میں توسیع ملنے اور فوج کی پالیسوں پر ناپسندیدگی کا اظہار کرتے ہوئے انہیں مستعفی ہونے کو کہا تھا۔ جبکہ ساتھ ہی انہوں نے اس خط کی نقول پاکستانی فوج کے متعدد جرنیلوں کو بھی ارسال کی تھیں

مجرم حسن عسکری کے والد میجر جنرل ریٹائرڈ ظفر مہدی عسکری کی جانب سے اس درخواست میں کہا گیا ہے کہ انہیں معلوم ہوا ہے کہ ان کے بیٹے پر مقدمہ گوجرانوالہ چھاؤنی میں چلا ہے، جہاں فیلڈ جنرل کورٹ مارشل نے انہیں مجرم قرار دیتے ہوئے پانچ سال قید کی سزا سنائی ہے

درخواست میں یہ بھی دعویٰ کیا گیا ہے کہ حسن عسکری کو سزا سنائے جانے کے بعد ان کے اہل خانہ کو کئی ہفتے تک اس بارے میں اندھیرے میں رکھا گیا، جبکہ درخواست گزار کی بیٹی نے متعدد بار جنرل ہیڈکوارٹرز سے بھی رابطہ کیا، لیکن وہاں سے کوئی جواب موصول نہیں ہوا

درخواست گزار کے مطابق اس کے علاوہ جیگ برانچ میں تعینات بریگیڈیئر وسیم سے بھی رابطہ کیا گیا، تو انہوں نے بتایا کہ حسن عسکری کو ساہیوال کی ہائی سکیورٹی جیل میں رکھا گیا ہے اور جیل حکام نے متعدد بار رابطہ کرنے کے باوجود صرف ایک مرتبہ انہیں حسن عسکری سے ملنے کی اجازت دی ہے

درخواست کے مطابق حسن عسکری کو اپنے وکیل سے ملنے کی بھی اجازت نہیں دی جا رہی۔ تاہم عسکری ذرائع نے اس کی تردید کرتے ہوئے کہا ہے کہ مجرم کو اپنا وکیل کرنے کی بھی اجازت دی گئی تھی جو ان کے اہل خانہ نے خود مقرر کیا تھا۔ اس کے علاوہ ان کے اہل خانہ ان سے اس ’گیسٹ ہاؤس‘ میں بھی ملتے رہے جہاں انہیں رکھا گیا تھا

اس درخواست میں اس بات کا بھی ذکر کیا گیا ہے کہ درخواست گزار نے اگست میں انسانی حقوق کی وزارت کو ایک خط لکھا تھا، جس میں کہا گیا تھا کہ چونکہ حسن عسکری کے والدین اسلام آباد میں رہتے ہیں اس لیے مجرم کو قریبی جیل یعنی راولپنڈی کی اڈیالہ جیل منتقل کر دیا جائے، کیونکہ مجرم کے والدین بوڑھے ہو چکے ہیں جبکہ مجرم کی والدہ شدید بیمار ہیں اور ہفتے میں تین دن ان کے ڈائلیسز ہوتے ہیں

اس کے علاوہ درخواست گزار یعنی میجر جنرل ریٹائرڈ ظفر مہدی نے کہا ہے کہ محکمہ جیل خانہ جات پنجاب کے سربراہ کو اس بارے میں خط لکھا گیا، لیکن وہاں سے کوئی جواب موصول نہیں ہوا

درخواست گزار کا موقف ہے کہ محکمہ جیل خانہ جات کے پاس یہ اختیار ہے کہ وہ کسی بھی قیدی کو صوبے کی حدود میں واقع کسی بھی جیل میں منتقل کر سکتے ہیں

عسکری ذرائع کا کہنا ہے کہ اس کیس میں آئین پاکستان کی روح کے مطابق تمام قانونی تقاضے پورے کیے گئے، جو ایک مقدمے کو منصفانہ طور پر چلانے کے لیے ضروری ہیں۔ یہ معاملہ ابھی اعلیٰ عدلیہ کے سامنے زیرسماعت بھی ہے اس لیے فی الحال اس معاملے پر زیادہ بات مناسب نہیں ہے

رواں برس جنوری میں یہ معاملہ اسلام آباد ہائی کورٹ میں آیا تھا تو عدالت نے بغاوت کے مقدمے کی سماعت اِن کیمرہ کرنے کا حکم دیا تھا اور پھر کورٹ مارشل رکوانے سے متعلق درخواست یہ کہہ کر نمٹا دی تھی کہ اس کا فیصلہ متعلقہ فوجی حکام ہی کریں گے کہ آیا سویلین کا کورٹ مارشل ہو سکتا ہے یا نہیں

سماعت کے دوران پاکستان کی فوج کے ایڈجوٹینٹ جنرل نے حسن عسکری کو تحویل میں لیے جانے کو جائز قرار دیتے ہوئے کہا تھا کہ ان پر پاکستانی فوج میں بغاوت اور فوجی افسران کو اپنی کمانڈ کے خلاف اُکسانے جیسے سنگین الزامات ہیں جن کی تحقیقات کی جا رہی ہیں

جسٹس محسن اختر کیانی کی سربراہی میں سنگل بینچ کے فیصلے کے خلاف میجر جنرل ریٹائرڈ ظفر مہدی نے اسلام آباد ہائیکورٹ میں انٹراکورٹ اپیل بھی دائر کر رکھی ہے جو ابھی تک سماعت کے لیے مقرر نہیں ہوئی

تعزیرات پاکستان کی دفعہ131 کیا ہے؟

پاکستانی فوج کے ریٹائرڈ میجر جنرل کے بیٹے کے خلاف جو مقدمہ درج کیا گیا تھا وہ تعزیرات پاکستان کی دفعہ 131 کے تحت تھا۔ تعزیرات پاکستان کی اس دفعہ کے تحت اگر کسی شخص پر مسلح افواج کے کسی اہلکار کو بغاوت پر اُکسانے کا جرم ثابت ہو جائے تو اس کی سزا موت ہے۔ اس کے علاوہ اس قانون کے تحت مجرم کو عمر قید یا دس سال قید اور جرمانے کی سزا بھی ہو سکتی ہے۔ ایسے جرم کا ارتکاب کرنے والے شخص کا کورٹ مارشل کیا جاتا ہے۔

آرمی ایکٹ کا سیکشن 31-ڈی

آرمی ایکٹ کے سیکشن 31 -ڈی کے تحت صرف کوئی فوجی اہلکار یا افسر ایسے مقدمے میں ملوث پایا جائے تو اس کا کورٹ مارشل ہو سکتا ہے جبکہ سویلین یعنی عام شہری پر اس قانون کا اطلاق نہیں ہوتا

اس کے برعکس آرمی ایکٹ کی شق 2 ون ڈی کے تحت کسی بھی سویلین کا معاملہ 31 ڈی میں لا کر اس کا کورٹ مارشل کیا جا سکتا ہے لیکن اس کے لیے پہلے اس سویلین کے خلاف کسی تھانے میں مقدمہ کے اندارج اور مجسٹریٹ کی اجازت ضروری ہے.

Related Articles

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button
Close
Close