امریکی ریئل اسٹیٹ کمپنی زیلو نے ایک ایسا چیٹ جی پی ٹی پلگ اِن لانچ کرنے کا اعلان کیا ہے، جس سے صارفین گھر خریدنے یا کرائے پر حاصل کرنے کے لیے مدد لے سکیں گے
یہ پلگ اِن اس حوالے سے صارفین کو مصنوعی ذہانت کے چیٹ بوٹ کے ساتھ بات چیت کرنے میں مدد کرے گا کہ وہ کس قسم کی پراپرٹی خریدنا یا کرائے پر لینا چاہتے ہیں اور ساتھ ہی انہیں مقام اور قیمت بھی بتائے گا
ان معلومات کی مدد سے چیٹ بوٹ زیلو کے ڈیٹا بیس کو دیکھے گا اور صارفین کو گھروں کے متعلق معلومات فراہم کرے گا
ایک مثال دیتے ہوئے زیلو نے بتایا ”اگر کوئی صارف سیئٹل میں آٹھ لاکھ ڈالر سے کم قیمت کے دو بیڈروم اور دو باتھ روم والے ٹاؤن ہاؤسز ڈھونڈتا ہے تو اے آئی چیٹ بوٹ زیلو کے ڈیٹا بیس سے متعلقہ معلومات فراہم کرے گا“
تاہم کمپنی کا کہنا ہے کہ یہ ایپلیکیشن صارف کے طور پر کام نہیں کرے گی، جیسا کہ وہاں جانے کے لیے شیڈول بنانا یا کسی ایجنٹ سے رابطہ کرنا
کمپنی نے ایک بیان میں کہا ”آپ چاہے گھر خریدنا، کرائے پر لینا یا صرف پراپرٹی دیکھنا چاہتے ہوں، آپ مخصوص پراپرٹی لسٹنگ کے بارے میں پوچھ سکتے ہیں یا اپنی دلچسپی کے گھروں کے متعلق بتا بھی سکتے ہیں“
کمپنی کے مطابق توقع ہے کہ پلگ اِن ابتدائی طور پر دو مئی سے چیٹ جی پی ٹی کے منتخب صارفین کے لیے دستیاب ہوگا اور وسیع تر رسائی مستقبل میں متوقع ہے
زیلو نے کہا کہ پلگ اِن فی الحال ابتدائی آزمائشی مرحلے میں ہے، جو اس کی ٹیم کو اوپن اے آئی کے ساتھ کام کرنے میں مدد دے گا تاکہ تجربے کو بہتر سے بنایا جا سکے
زیلو کے سی ٹی او ڈیوڈ بیٹل نے ایک بیان میں کہا ”جنریٹیو اے آئی سے لوگوں کا معلومات تلاش کرنے کا طریقہ بدل رہا ہے۔ ہم اس کی بے پناہ صلاحیت کو سمجھتے ہیں اور ہم مستقبل میں اوپن اے آئی ٹیکنالوجی کے ساتھ مزید تکنیکی جدت طرازی کو فروغ دینے کے منتظر ہیں“
ریئل سٹیٹ فرم نے مزید کہا ”نیا زیلو چیٹ جی پی ٹی پلگ اِن اس بات کی تازہ ترین مثال ہے کہ ہم معلومات کو اَن لاک کرنے اور اپنے صارفین کو بااختیار بنانے میں مدد کے لیے ٹیکنالوجی کا استعمال کر رہے ہیں۔ چاہے وہ اپنا گھر خرید رہے ہوں، کرائے پر لے رہے ہوں یا فروخت کر رہے ہوں“
اس میں کہا گیا ہے کہ چیٹ بوٹ کے جوابات محدود ہیں اور زیلو کی ڈیٹا پالیسیوں سے مطابقت رکھتے ہیں، تاہم ریئل اسٹیٹ فرم کا کہنا ہے کہ وہ اس بات کو کنٹرول نہیں کر سکتی کہ چیٹ جی پی ٹی سمیت دیگر لوگ ڈیٹا کا استعمال کیسے کرتے ہیں۔
