دنیا کی مقبول ترین شارٹ وڈیو شیئرنگ ایپلیکیشن ٹک ٹاک نے پلیٹ فارم پر پیسے کمانے کا نیا طریقہ کار متعارف کرایا ہے، جسے سب سے آسان طریقہ کہا جا رہا ہے
ٹک ٹاک نے اپنی بلاگ پوسٹ میں بتایا ہے کہ جلد ہی صارفین پلیٹ فارم پر ’کریئیٹو چیلنج‘ نامی ایک نیا فیچر دیکھ سکیں گے،جس کے ذریعے صارفین کو پیسے کمانے کا موقع فراہم کیا جائے گا
مذکورہ فیچر کے تحت اٹھارہ سال سے زائد عمر کے وہ ٹک ٹاک صارفین، جن کے فالوورز پچاس ہزار سے زیادہ ہوں گے، وہ کسی بھی کمپنی کے لیے ایک تشہیری وڈیو بنا کر اس سے پیسے کما سکیں گے
مذکورہ فیچر کے تحت متعدد برانڈز ’کریئیٹو چیلنج‘ نامی چینل میں ٹک ٹاکرز کو تشہیری یا پروموشنل وڈیو بنانے کا چیلنج دیں گے، وہ اپنی تمام شرائط کو پوسٹ کرکے اپنا زیادہ سے زیادہ بجٹ بھی شیئر کر دیں گے
ٹک ٹاکرز مذکورہ فیچر پر جا کر اپنی پسند کے برانڈ کے چیلنج کو دیکھ کر ان کی شرائط کے مطابق وڈیو بنا کر انہیں سینڈ کر دیں گے اور برانڈ کو جس کانٹینٹ کریئیٹرز کی وڈیو پسند آئے گی، اسے نوٹیفکیشن کے ذریعے آگاہ کیا جائے گا
کسی بھی برانڈ کے چیلنج کو قبول کرنے اور اسے مکمل کرنے کے لیے ٹک ٹاکرز کے پاس سات دن کا وقت ہوگا اور وہ اپنی وڈیوز کریئیٹو چیلنج کے ذریعے ہی برانڈز کے انباکس میں ڈال دیں گے
برانڈز اپنی پسند کے مطابق کسی بھی کانٹینٹ کریئیٹرز کی وڈیو کو پسند کر سکتے ہیں، ان کے پاس اختیار ہوگا کہ وہ ایک سے زائد وڈیوز کو بھی منتخب کر سکتے ہیں
وڈیوز کو برانڈز کی جانب سے منتخب کیے جانے کے بعد ٹک ٹاکر کو نوٹیفکیشن کے ذریعے آگاہ کر دیا جائے گا اور اسے تشہیری وڈیو کی رقم بھی بتائی جائے گی
اس فیچر کی سب سے اہم بات یہ ہے کہ کسی بھی ٹک ٹاکر کو تیار کی گئی تشہیری وڈیو اپنی پروفائیل پر شیئر نہیں کرنی پڑے گی بلکہ پلیٹ فارم از خود سے ’فار یو‘ ٹیب میں شامل کردے گا
یوں اشتہارات سے پیسے کمانے کے باوجود کسی بھی ٹک ٹاکر کو کوئی بھی تشہیری وڈیو اپنی پروفائیل پر لگانے سے بھی آزادی مل جائے گی۔ آسان الفاظ میں بات کی جائے تو ٹک ٹاکر کا کام کسی پروڈکٹ کے لیے صرف اشتہاری وڈیو بنانا ہوگا
