ٹماٹر کی پیداور میں کمی اور سپلائی چین میں خلل کا باعث بننے والے کئی عوامل اور کی وجہ سے بھارت کے کئی حصوں میں ٹماٹر کی قیمتیں مسلسل بلند ترین سطح پر ہیں۔
اگرچہ ٹماٹر کی قیمتوں میں اضافہ صارفین کی جیبیں خالی کر رہا ہے، لیکن ٹماٹر کی قیمت میں اضافہ کئی کسانوں کا بھلا کر گیا ہے
مہاراشٹر کے ضلع پونے سے تعلق رکھنے والے تکارام بھگوجی گیاکر نے ٹماٹر کاشت کیے تھے اور جس وقت اس کی فصل تیار ہوئی، اس وقت بازار میں ٹماٹر نہیں مل رہے تھے
جب بیوپاریوں کو علم ہوا کہ ان کے پاس وافر ٹماٹر موجود ہیں تو ان سے رابطہ کیا گیا، تاہم تکارام نے صورت حال کی نزاکت کو بھانپتے ہوئے بڑے نپے تلے انداز میں اپنا مال فروخت کرنا شروع کیا
انہوں نے ٹماٹروں کے تیرہ ہزار کریٹ تقریباً دو کروڑ بھارتی روپے میں بیچے، جو پاکستانی کرنسی کے حساب سے پونے سات کروڑ سے زائد بنتے ہیں
تکارام کے پاس اٹھارہ ایکڑ زرعی زمین موجود ہے، جس میں سے انہوں نے بارہ ایکڑ پر ٹماٹر کاشت کیا تھا، جس میں ان کے بیٹے ایشور گیاکر اور بہو سونالی نے بھی ان کی بہت مدد کی تھی
کاشت کار خاندان کے افراد کا کہنا ہے کہ ٹماٹر لگانے سے قبل انہوں نے اچھی کھاد اور دوسری ادویات کے بارے میں تمام معلومات حاصل کیں اور ماہرین کے مشوروں پر عمل کرتے ہوئے ٹماٹر کاشت کیا
خاندان کے مطابق ’ہماری اس محنت کا صلہ ایک اچھی فصل میں سامنے آیا۔‘
چونکہ اس وقت ملک میں ٹماٹر کی طلب بہت زیادہ ہے اس لیے ایک کریٹ میں انہیں اکیس سو بھارتی روپے کا فائدہ ہوا اور ناراینگنی میں جمعے کو ایک روز میں ہی ان کے نو سو کریٹ فروخت ہوئے اور چند گھنٹے بعد گھر لوٹتے ہوئے ان کے پاس اٹھارہ لاکھ سے زائد روپے آ گئے تھے
اگلے چند روز میں انہوں نے ایک کریٹ ایک ہزار سے ڈھائی ہزار روپے کے عوض فروخت کیا
اس طرح پونے کے شہر جُنر میں چند ایسے دیگر کاشت کار بھی سامنے آئے ہیں جو ٹماٹر فروخت کر کے کروڑ پتی بن گئے ہیں
انڈیا کے اس علاقے میں صرف ایک ماہ کے دوران 80 کروڑ روپے کے ٹماٹر فروخت ہوئے ہیں، جس سے 100 سے زائد خواتین کو روزگار کے مواقع بھی ملے
اپنی فصل کے حوالے سے تکارام کا کہنا ہے کہ ان کی بہو سونالی بوائی میں مدد دینے کے علاوہ کٹائی اور پیکنگ کا کام بھی کیا جبکہ فروخت کے حوالے سے تمام امور ان کے بیٹے ایشور نے انجام دیے
ان کے مطابق ’ہم سب کی تین ماہ کی محنت کا صلہ بہت اچھی شکل میں ملا ہے، جس پر بہت خوش ہیں۔‘
ناراینگجنی میں قائم ایگریکلچرل پروڈیوس مارکیٹ کمیٹی کا کہنا ہے کہ ٹماٹر تاریخ کی بلند ترین قیمت پر فروخت ہوئے اور ایک کریٹ (20 کلوگرام) کی قیمت ڈھائی سے تین ہزار روپے تک گئی اور فی کلو قیمت 125 سے 140 تک پہنچی
ٹماٹر کی وجہ سے کروڑ پتی بنے کا سلسلہ صرف مہاراشٹر تک محدود نہیں رہا بلکہ کرناٹک سے تعلق رکھنے والے ایک کاشت خاندان کی قیمت بھی خوب چمکی اور اس نے بھی ٹماٹروں کے 2000 ہزار کریٹ بیچ کر ایک روز میں 80 لاکھ روپے کمائے
کسانوں کے خاندان کی سربراہی پربھاکر گپتا اور ان کے بھائی کرتے ہیں، جو گزشتہ چالیس سالوں سے اپنے چالیس ایکڑ فارم پر ٹماٹر اگا کر روزی کما رہے ہیں۔ تاہم، انہوں نے پہلے کبھی ٹماٹر پر ایسا سودا نہیں کیا تھا
بھارت کے کئی شہروں میں ٹماٹر کی قیمتیں بہت سوں کے لیے تشویش کا باعث بن گئی ہیں، کیونکہ کئی بڑے باکس چینز اور میک ڈونلڈز اور برگر کنگ جیسے ریستوراں نے بھی ٹماٹروں کو اپنی ریسیپیز سے نکالنا شروع کر دیا کیونکہ قیمتیں بڑھ رہی ہیں۔
