کیا عام مکھی کی مدد سے، دماغی کینسر کے مریض کی جان بچائی جا سکتی ہے؟ اس بظاہر مضحکہ خیز سوال کا جواب، حیران کن طور پر، ہاں میں ہے۔ اب اس کا مطلب یہ نہیں کہ مکھی منہ سے کھانی پڑے گی۔۔ لیکن اگر کسی برین ٹیومر جیسی صحت کی حالت کے لیے کسی کو دوائیں لینا پڑیں، تو یہ بہت ممکن ہے کہ وہ دوائیں پھل کی مکھیوں کو استعمال کرتے ہوئے کی گئی تحقیق کی مدد سے تیار کی گئی ہوں – وہی چھوٹی مکھیاں، جو موسم گرما میں کھاد کے ڈھیر کے گرد گھومتی دکھائی دیتی ہیں۔
دنیا بھر کے سائنسدان اپنے کام کے لیے پھل کی مکھیوں کا استعمال کرتے ہیں جو کہ عام طور پر ’بنیادی تحقیق‘ کے زمرے میں آتی ہے۔ اس کا مطلب ہے، وہ تحقیق، جو بنیادی طور پر تجسس پر مبنی ہے: اس بارے میں مزید جاننے کی کوشش کرنا کہ دنیا کس طرح بنی نوع انسان کے علم میں اضافے کی خاطر کام کرتی ہے۔
اس آرٹیکل کے آخر میں مختلف بیماریوں کے علاج کی تحقیق کے حوالے سے پھل کی مکھی کے استعمال کی تاریخ اور اہمیت کے بارے میں دلچسپ معلومات کا تذکرہ کریں گے، لیکن سب سے پہلے جانتے ہیں حالیہ تحقیق سے ہونے والی پیش رفت کے بارے میں
نئی تحقیق کے بعد برطانوی سائنسدانوں کا کہنا ہے کہ چھوٹے حشرات دماغ کی رسولیوں کی نشوونما کو روکنے میں مددگار ثابت ہو سکتے ہیں۔ سائنسدانوں کا ماننا ہے کہ پھلوں پر اڑنے والی مکھیاں دماغ کی رسولیوں کو بڑھنے میں روکنے میں مدد دے سکتی ہیں۔
انگلینڈ کی پلمتھ یونیورسٹی کے برین ٹیومر ریسرچ سینٹر آف ایکسیلینس کے ماہرین نے ڈروسوفِلا نامی مکھی کو استعمال کرتے ہوئے رسولی کے بڑھنے کے پہلے مرحلے کے دوران خلیوں کا معائنہ کیا۔
ماہرین کو امید ہے کہ یہ تحقیق گلائیوبلاسٹوما جیسی انتہائی قسم کی رسولیوں سمیت گلائیوما رسولیوں کو مزید سمجھنے میں مدد دے گی۔
برین ٹیومر ریسرچ سینٹر آف ایکسیلینس کے ماہرین ڈروسوفلا نامی عام مکھی کو ماڈل کے طور پر استعمال کرتے ہوئے دماغ کی رسولی کی نشوونما کے پہلے ہی مراحل میں سرطان کے خلیوں کی شناخت اور جانچ کرنے میں کامیاب رہے
ان کی تحقیق گلیوما نامی رسولی کے بارے میں مزید معلومات حاصل کرنے میں مدد کر رہی ہے، جس میں گلیوبلاسٹوما جیسے اگلی اسٹیجز کی رسولیوں کی اقسام شامل ہیں۔
واضح رہے کہ گلیوبلاسٹوما اسٹیج تک کسی مریض کے بچنے کی شرح انتہائی کم ہے اور یہ رسولیاں تیزی سے بڑھتی ہیں اور صحت مند ٹشوز پر حملہ کر کے انہیں تباہ کر دیتی ہیں۔
یہ مرض کسی بھی عمر میں ہو سکتا ہے لیکن معمر افراد میں زیادہ کثرت سے دیکھا گیا ہے۔
اس مرض کی علامات میں سر درد جو بد سے بدتر ہوتا جاتا ہے، متلی اور الٹیاں، دھندلا پن یا دہرا دکھائی دینا اور دورے شامل ہیں۔
یورپین مالیکولر بائیولوجی آرگنائزیشن کے سائنسی جریدے ’ای ایم بی او رپورٹس‘ میں شائع ہونے والی نئی تحقیق کی قیادت کرنے والی ڈاکٹر کلاڈیا باروس کا کہنا ہے کہ ان کی ٹیم نے ’ریڈینگ‘ پراسس (readying processes) دریافت کیے ہیں، جو رسولی کی تشکیل اور اس کے بڑھنے میں مدد کے یے اہم ہو سکتے ہیں۔
انہوں نے کہا ”تحقیق اس بات کو سمجھنے میں مددگار ہے کہ دماغ کے ٹیومر کیسے بن سکتے ہیں اور اس نے گلیوما ٹیومر کے مریضوں کے علاج کے لیے نئی ممکنہ ادویات کے اہداف کو تلاش کرنے کے لیے تحقیق کی راہیں کھول دی ہیں۔“
ان کے مطابق ”عام مکھی ’ڈروسوفلا‘ کو ماڈل کے طور پر استعمال کرتے ہوئے ہم دماغ کے اندر برین ٹیومر کی تشکیل کے ابتدائی مراحل میں ہی خلیوں کی شناخت اور جانچ کرنے میں کامیاب ہوئے ہیں۔ ان خلیات میں عام خلیوں کے مقابلے میں ان کے میٹابولک اور پروٹین کے توازن میں سب سے زیادہ نمایاں فرق ہوتا ہے۔“
برین ٹیومر ریسرچ چیریٹی میں ریسرچ، پالیسی اور انوویشن ڈائریکٹر ڈاکٹر کیرن نوبل نے کہا ”اب بھی بہت زیادہ کام کرنا باقی ہے لیکن یہ ابتدائی نتائج اہم ہیں، کیونکہ مزید تحقیقات کے ساتھ یہ ہمیں نئے علاج تیار کرنے میں مدد دے سکتے ہیں، جو ٹیومر کے خلیوں کو زیادہ موثر طریقے سے نشانہ بناتے ہوئے مریضوں کے علاج کو بہتر بنائے گا۔“
جنوب مغربی لندن کے رہائشی ریکروٹمینٹ کنسلٹنٹ اور پارٹ ٹائم موسیقار سیم سوریا کمار میں دوروں میں مبتلا ہونے کے بعد ابتدائی اسٹیج کے کے گلیوما کی تشخیص ہوئی۔
اڑتیس سالہ سوریا کمار میں ٹیومر کی نگرانی کی جا رہی تھی، لیکن گذشتہ جولائی میں کیے گئے اسکین سے معلوم ہوا کہ یہ بڑھ گیا ہے۔
اب وہ کیموتھراپی سے گزر رہے ہیں اور پہلے ہی سرجری اور ریڈیو تھراپی کرا چکے ہیں۔
دو بچوں کے والد سوریا کمار نے کہا ”یہ سوچ کر حیرت ہوتی ہے کہ فروٹ فلائی جیسی چھوٹی حشرات میرے جیسے ٹیومر کے بارے میں ہماری معلومات کو بہتر بنانے اور اور اس کے بہترین علاج میں مدد کر سکتی ہے۔
ان کے بقول: ”یہ واقعی دلچسپ خبر ہے اور اس تحقیق میں زیادہ سرمایہ کاری کی ضرورت کو واضح کرتی ہے تاکہ ہمیں جلد علاج تلاش کرنے کے اپنے مقصد تک پہنچنے میں مدد مل سکے۔“
مختلف بیماریوں کے علاج کی تحقیق اور مکھیوں کی اہمیت
مکھیاں کینسر کا علاج تلاش کرنے میں ہماری مدد کیسے کر سکتے ہیں؟ پھلوں کی مکھیوں کو 20 ویں صدی کے آغاز سے انسانی حیاتیات کو سمجھنے کے لیے ایک تحقیقی ماڈل کے طور پر استعمال کیا جاتا رہا ہے، جب چند علمبردار سائنسدانوں نے ایک سستے اور آسان تحقیقی آلے کے طور پر مکھیوں کی بہت بڑی صلاحیت کو محسوس کیا۔ ان سائنسدانوں میں سے ایک، تھامس ہنٹ مورگن، نے 1933 کا نوبل انعام برائے فزیالوجی یا میڈیسن جیتا، جس نے مکھیوں کا استعمال کرتے ہوئے یہ دریافت کیا کہ وراثتی مواد (جسے اب ہم جین کہتے ہیں) ہر خلیے میں کروموسوم نامی ڈھانچے پر لے جایا جاتا ہے۔ تھامس ہنٹ مورگن پہلے سائنسدان ضرور تھے، لیکن کسی بھی طرح سے آخری نہیں، جنہوں نے پھلوں کی مکھیوں پر اپنے کام کو اس اعلیٰ ترین اعزاز کے ساتھ پہچانا۔
یقیناً مکھیوں اور انسانوں میں بہت سے فرق ہیں – کم از کم یہ حقیقت نہیں کہ مکھیوں کے پر اور چھ ٹانگیں ہوتی ہیں! لیکن بنیادی حیاتیاتی عمل کے لحاظ سے، مکھیاں (اور درحقیقت تمام جانور) انسانوں سے بہت ملتے جلتے ہیں۔ لہٰذا اگر ہم یہ جان سکتے ہیں کہ ایک بنیادی حیاتیاتی عمل مکھی میں کیسے کام کرتا ہے، تو امکان یہ ہے کہ یہ انسانوں میں بالکل اسی طرح کام کرتا ہے۔ مکھیاں رکھنے اور افزائش کے لیے نسبتاً سستی ہیں۔ ان کا زندگی کا ایک مختصر دور ہے، جس کا مطلب ہے کہ تجربات انسانوں کے قریبی رشتہ داروں جیسے چوہوں کے مقابلے میں بہت تیزی سے کیے جا سکتے ہیں۔ اور سالوں کے دوران سائنسدانوں نے تجربات کی سہولت کے لیے مکھیوں کو جینیاتی طور پر جوڑ توڑ کے تمام طریقے تیار کیے ہیں۔
مکھیوں کا ایک اور فائدہ یہ ہے کہ وہ انسانوں کے ’آسان‘ ماڈل ہیں: اکثر انسانوں کے پاس ایک جین کے کئی مختلف ورژن ہوتے ہیں، جب کہ مکھی میں عام طور پر صرف ایک جین ہوتا ہے، جس سے اس جین کے کام کو کھولنا بہت آسان ہو جاتا ہے۔ یہ تمام خصوصیات مل کر انسانوں میں حیاتیاتی عمل کے بارے میں جاننے کے لیے مکھی کو ایک انتہائی پرکشش نقطہِ آغاز بناتی ہیں۔
یہ ’دلچسپی سے چلنے والی‘ بنیادی سائنس انسانوں کے لیے ٹھوس فوائد کا باعث بن سکتی ہے جسے ‘SMAC mimetics’ نامی ٹارگٹڈ کینسر مخالف دوائی کی ایک نئی کلاس سے دیکھا جا سکتا ہے۔ تقریباً 15 سال پہلے پھلوں کی مکھیوں پر کی جانے والی تحقیق میں ایسے پروٹین کی نشاندہی کی گئی تھی، جو سیل میں خارج ہونے پر سیل کے مرنے کا سبب بنتے ہیں۔ اس نے انسانوں میں مساوی پروٹین کی کامیاب تلاش کا اشارہ کیا، جسے انہوں نے SMAC کا نام دیا… اور جیسا کہ نام سے ظاہر ہے، SMAC mimetic ادویات کی اس نئی کلاس کو SMAC کی نقل کرنے اور اس طرح کینسر کے خلیوں کو مارنے کے لیے ڈیزائن کیا گیا ہے۔ یہ دوائیں، جو کئی فارماسیوٹیکل کمپنیوں کے ذریعہ تیار کی جا رہی ہیں، بعض صورتوں میں دوسرے مرحلے کے کلینکل ٹرائلز تک پہنچ چکی ہیں اور روایتی اینٹی کینسر ادویات کے مقابلے میں کم ضمنی اثرات کے ساتھ موثر علاج کے طور پر بہت امید افزا نظر آ رہی ہیں۔
مکھیوں کو اطلاقی تحقیق کے لیے بھی استعمال کیا جا سکتا ہے۔ مثال کے طور پر، نیویارک میں محققین نے ایک سے زیادہ اینڈوکرائن نیوپلاسیا ٹائپ 2 (MEN2) کے لیے ایک فلائی ماڈل تیار کیا ہے – طبی عوارض کا ایک گروپ جو اینڈوکرائن ٹشوز جیسے تھائیرائڈ گلینڈ میں ٹیومر کا سبب بنتا ہے۔ ان محققین نے جو کچھ کیا، وہ یہ تھا کہ MEN2 کے زیادہ تر معاملات کے لیے ذمہ دار جین کے کینسر پیدا کرنے والے ورژن کو ’اظہار‘ کرنا، یا آن کرنا تھا۔ اہم بات یہ ہے کہ انہوں نے ایسا صرف آنکھ میں کیا، جس سے مکھیوں کو جنم دیا گیا جو کہ صحت مند ہیں، لیکن ان کی آنکھ آسانی سے نظر آنے والی ‘کھردری’ خراب شکل والی ہے۔ اس ماڈل کو تیار کرنے کے بعد، محققین نے ان مکھیوں کو vandetanib نامی دوا کھلائی اور پتہ چلا کہ یہ ان کی آنکھوں کو زیادہ عام شکل کی طرف لوٹا دیتی ہے – یہ تجویز کرتی ہے کہ یہ دوا MEN2 کے لیے ایک اچھا علاج ہو سکتی ہے۔ دس سال سے بھی کم عرصے کے بعد، وینڈیٹینیب فیز III کے کلینیکل ٹرائلز میں ہے اور MEN2 کے لیے پہلی کیموتھراپیٹک دوا بننے کی بڑی صلاحیت ظاہر کر رہی ہے۔ ابھی حال ہی میں، اس تحقیقی ٹیم نے MEN2 کے لیے اور بھی زیادہ مؤثر علاج کی کوشش کرنے اور ان کی شناخت کرنے کے لیے، معلوم ادویات کے ایک پینل کو اسکرین کرنے کے لیے اپنے نقطہ نظر کو بڑھایا ہے۔
تو یہ صرف کینسر کی تحقیق نہیں ہے، جس میں مکھیاں ہماری مدد کر سکتی ہیں۔ پھلوں کی مکھیوں پر تحقیق نے متعدد انسانی بیماریوں پر روشنی ڈالنے میں مدد کی ہے جن میں ذیابیطس، پارکنسنز کی بیماری، نشوونما کے نقائص، الزائمر کی بیماری، دل کی بیماری، مرگی، دمہ… فہرست بڑھتی جارہی ہے، ہو سکتا ہے کہ بنیادی تحقیق بیماری کے لیے نئے علاج فراہم کرنے پر مرکوز نہ ہو، لیکن آپ کیا معلوم کہ اس کے نتیجے میں سامنے آنے والا نیا علم مستقبل میں کتنا اہم ثابت ہو سکتا ہے۔
اس لیے اگلی بار جب آپ کسی پھل کی مکھی کو اپنے اپنے ارد گرد پریشان کن انداز میں بھنبھناتے ہوئے دیکھیں تو اس عظیم کام کے بارے میں سوچیں جو اس کے کزنز پوری دنیا کی ریسرچ لیبز میں کر رہے ہیں!
ترجمہ و ترتیب: امر گل
