فرانسیسی فٹبالر کلین مباپے پرتگال کے کپتان کرسٹیانو رونالڈو کو پیچھے چھوڑ کر ورلڈکپ کی تاریخ میں سب سے زیادہ گولوں میں میسی سے ہمسری کرنے والے کھلاڑی بن گئے ہیں
اتوار کو فیفا فٹبال ورلڈ کپ کے راؤنڈ آف 16 (پری کوارٹر فائنلز) میں فرانس نے پولینڈ کو ایک کے مقابلے میں تین گول سے شکست دی اور اس میچ میں دو گول کلین مباپے نے کیے
تیئیس سالہ کلین مباپے کا یہ دوسرا ورلڈ کپ ہے اور وہ اب تک 9 گول اسکور کر چکے ہیں، جبکہ کرسٹیانو رونالڈو اب تک پانچ ورلڈکپ میں آٹھ گول اسکور کرسکے ہیں۔ ارجنٹائن کے لیونل میسی بھی اپنا پانچواں ورلڈ کپ کھیل رہے ہیں اور ان کے گول کی تعداد بھی 9 ہے
فرانسیسی فٹ بالر عمر میں رونالڈو سے چودہ اور میسی سے بارہ سال چھوٹے ہیں
صرف یہی نہیں کلین مباپے نے برازیل کے فٹبال گریٹ پیلے کو بھی پیچھے چھوڑ دیا ہے۔ انہوں نے چوبیس برس کی عمر تک پہنچنے سے پہلے ورلڈکپ میں آٹھ سے زائد گول کر لیے ہیں
پیلے اس وقت کینسر کے خلاف جنگ لڑ رہے ہیں اور ہسپتال میں زیر علاج ہیں اور ان کے لاکھوں پرستاروں کی طرح کلین مباپے بھی ان کی صحتیابی کے لیے دعا گو ہیں
ورلڈکپ کے کوراٹر فائنل میں فرانس کا مقابلہ 11 دسمبر کو انگلینڈ سے ہوگا، جس نے اتوار کی رات صفر کے مقابلے میں سینیگال کو تین گول سے ہرایا تھا
ابھی فرانس اور انگلینڈ کے درمیان کوارٹر فائنل چھ دن دور ہیں لیکن مباپے نے انگلینڈ کے لیے خطرے کی گھنٹی بجا دی ہے
یہی وجہ ہے کہ انگلینڈ کے فٹبال فین اپنے کھلاڑیوں کو کلین مباپے سے بچ کر رہنے کا مشورہ دے رہے ہیں۔ ایک فٹبال فین نے اپنی ٹویٹ میں لکھا ’انگلینڈ کو اپنی واپسی کا ٹکٹ بُک کروا لینا چاہیے کیونکہ اس دفاع کے خلاف مباپے سارے ریکارڈ توڑنے والے ہیں۔‘
فرینکلن لیونارڈ نے فرانس اور انگلینڈ کے کوارٹر فائنل پر تبصرہ کرتے ہوئے لکھا ’کلین مباپے سے پسندیدہ انگلینڈ کی ٹیم کو دہشت زدہ ہوتے دیکھنا خاصا تکلیف دہ ہوگا۔‘
خیال رہے 2018 میں روس میں کھیلا جانے والا ورلڈکپ بھی فرانس نے جیتا تھا اور اس ورلڈکپ میں کلین مباپے نے چار گول اسکور کیے تھے۔
