اگرچہ انسٹاگرام پہلے ہی ایک مقبول سوشل نیٹ ورک ہے جسے دنیا بھر میں ایک ارب سے بھی زائد لوگ استعمال کر رہے ہیں ، لیکن ٹک ٹاک کی بڑھتی ہوئی مقبولیت نے اب فیس بک کی ملکیتی ایپ کو فوٹو شیئرنگ سے باہر نکل کر سوچنے پر مجبور کر دیا ہے
انسٹاگرام کے سربراہ ایڈم موسیری نے ایک وڈیو میں بتایا کہ لوگ انسٹاگرام کو تفریح کے لیے استعمال کررہے ہیں اس لیے اب کمپنی کی جانب سے کریٹیرز، وڈیو، شاپنگ اور مسیجنگ پر مبنی فیچرز پر توجہ مرکوز کی جارہی ہے
انہوں نے ٹک ٹاک اور یوٹیوب کے پھیلاؤ کو بھی تسلیم کرتے ہوئے کہا ہے کہ کمپنی دونوں کو ٹکر دینا چاہتی ہے، اس کے لیے ابتدائی تجربے کے طور پر انسٹاگرام کی جانب سے فیڈ میں تبدیلیاں لاتے ہوئے انٹرسٹس یا ٹاپکس ریکمینڈیشنز میں اضافہ کیا جائے گا، جن کو وہ ایپ میں فالو نہیں کررہے ہوں گے
حال ہی میں ایپ میں صارفین کی ٹائم لائن پر مختلف موضوعات پر سجیشنز میں اضافے کو ٹیسٹ کیا گیا اور آپ پر چھوڑا گیا کہ ان موضوعات میں سے کس پر آپ زیادہ یا کم مواد کو دیکھنا چاہتے ہیں
یہ ٹک ٹاک کے انٹرسٹ بیسڈ الگورتھم پر مبنی فیچر جیسا محسوس ہوتا ہے جس میں لوگوں کو ایک وڈیو دکھا کر ان کی دلچسپی کا اندازہ لگایا جاتا ہے اور اگر وڈیو زیادہ پسند کی جاتی ہے تو اس سے ملتے جلتے مواد کو زیادہ دکھایا جاتا ہے اب انسٹاگرام بھی اسی طرح لوگوں کی توجہ حاصل کرنے کی خواہشمند ہے اور آپ کو دلچسپیوں کے حوالے سے کچھ کنٹرول بھی دیا جارہا ہے
انسٹاگرام میں ایک اور بڑی تبدیلی وڈیو ہے اور آئی جی ٹی وی میں کچھ خاص کامیابی نہ ملنے پر ایڈم موسیری کا کہنا تھا کہ اب فل اسکرین موبائل فرسٹ وڈیو پر کام کیا جائے گا، فی الحال یہ تو واضح نہیں کہ یہ آئی جی ٹی وی سے کس حد تک مختلف ہوگا مگر ہوسکتا ہے کہ یوٹیوب سے ملتا جلتا تجربہ ہو
اسی طرح انسٹاگرام کے بڑے منصوبے کا تیسرا حصہ کریٹیرز سے متعلق ہے اور اس حوالے سے ایکسکیلوزو اسٹوریز نامی فیچر پر کام کیا جارہا ہے، جو سبسکرائپشن بیسڈ ہوگا
کمپنی کی جانب سے میسجنگ پر بھی اب زیادہ توجہ مرکوز کی جارہی ہے اور اس سے دوستوں اور کریٹیرز سے زیادہ چیٹ کرنے میں مدد مل سکے گی
گزشتہ سال انسٹاگرام ڈائریکٹ میسج اور فیس بک میسنجر کو مدغم کرنے کے عمل کا آغاز ہوا تھا اور یہ سلسلہ جاری ہے اور اب واٹس ایپ کو بھی اس کا حصہ بنایا جائے گا
جہاں تک شاپنگ کی بات ہے تو فیس بک کی جانب سے اس پر کافی عرصے سے بھرپور کام کیا جارہا ہے اور انسٹاگرام میں اس کا تجربہ مزید بہتر بنایا جارہا ہے
یاد رہے کمپنی کی جانب سے نئے شاپ بٹن کا ٹیسٹ گزشتہ سال ہوم اسکرین پر شروع کیا گیا تھا اور اب اشتہارات کو بڑھایا جارہا ہے
دوسری جانب مئی میں بلومبرگ کی ایک رپورٹ میں اشارہ دیا گیا تھا کہ ٹک ٹاک بھی ایپ کے اندر شاپنگ متعارف کرائے جانے کی تیاری کر رہا ہے.
