اگرچہ مقبول سوشل میڈیا ایپ ٹک ٹاک کی مقبولیت کا راز اس کی چند سیکنڈ کی وڈیوز ہیں، لیکن اب کمپنی نے طویل وڈیوز پوسٹ کرنے کی سہولت متعارف کرادی ہے
مقبول ویڈیو شیئرنگ ایپ میں اب تمام صارفین تین منٹ تک کی وڈیو پوسٹ کرسکیں گے
واضح رہے کہ اب تک ٹک ٹاک میں ایک منٹ سے زیادہ طویل پوسٹ نہیں کی جاسکتی تھی مگر اب یہ دورانیہ تین منٹ کا کردیا گیا ہے
اس فیچر کی آزمائش دسمبر 2020ع سے جاری تھی اور اس کا مقصد صارفین کو زیادہ سہولت فراہم کرنا ہے
طویل وڈیوز سے ٹک ٹاکرز کو وہ مواد زیادہ بہتر بنانے میں مدد ملے گی جو محدود وقت کے باعث زیادہ متاثرکن نہیں ہوتا
مصدقہ اطلاعات کے مطابق طویل وڈیوز کا فیچر آنے والے ہفتوں میں صارفین کو دستیاب ہوگا
چند سیکنڈز کی پرمزاح یا دلچسپ وڈیوز اور ان کو آسانی سے فلپ کرکے دوسری دیکھنا صارفین کے دلوں میں جگہ بناگیا تھا۔ اب دیکھنا ہے کہ اس کے مقابلے میں 3 منٹ طویل وڈیوز کا تجربہ کس حد تک کامیاب ہوتا ہے، یہ تو آنے والا وقت ہی بتائے جگا، مگر بظاہر یہ یوٹیوب کی نقل محسوس ہوتا ہے
آپ کو یاد ہوگا کہ شروع میں یوٹیوب کی وڈیوز بھی دس منٹ سے کم دورانے کی ہوتی تھیں، تین منٹ بھی کافی طویل وقت ہوتا ہے، جس میں پورا فلم ٹریلر یا میک اپ ٹیوٹرل دکھایا جاسکتا ہے
ٹک ٹاک کی جانب سے یہ واضح نہیں کیا گیا کہ اس کے ریکمینڈیشن الگورتھم میں طویل کلپس سے کیا اثرات مرتب ہوں گے، تاہم یہ واضح ہے کہ زیادہ طویل وڈیو دیکھنے کا مطلب ایپ پر زیادہ وقت بھی گزارنا ہے اور وقت کے ساتھ مختصر وائرل وڈیوز کی تعداد میں کمی بھی آتی جائے گی. یہی وجہ ہے کہ ماہرین نے سوال اٹھایا ہے کہ کیا ٹک ٹاک بھی مستقبل کا یوٹیوب بننے جا رہا ہے؟
