فرنچ فٹبال فیڈریشن (ایف ایف ایف) نے کہا ہے کہ ارجنٹینا کے ہاتھوں فٹبال ورلڈکپ کے فائنل میں شکست کے بعد متعدد فرانسیسی کھلاڑیوں کو سوشل میڈیا پر نسل پرستانہ اور نفرت انگیز تبصرے کرکے نشانہ بنایا گیا ہے، جن کے خلاف قانونی شکایت درج کرائی جائے گی
غیر ملکی خبر رساں ادارے ’اے ایف پی‘ کے مطابق پنالٹی شوٹ آؤٹ میں گول نہ کرنے والے کنگسلے کومان اور اورلین چاؤمینی کو نشانہ بنایا گیا
واضح رہے کہ گزشتہ برس یورو 2020ع کے فائنل میں اٹلی سے ہارنے کے بعد انگلینڈ کے تین کھلاڑیوں کو بھی اسی طرح سے نسل پرستی پر مبنی رویے کا سامنا کرنا پڑا تھا جب انہیں بدسلوکی والے پیغامات موصول ہوئے تھے
فرانس فٹبال فیڈریشن کے سربراہ نے ان کھلاڑیوں کو نشانہ بنانے کی شدید مذمت کی ہے کیونکہ سوشل میڈیا پر کھلاڑیوں کو نسلی تعصب پر مبنی تبصروں کے ذریعے اُس وقت نشانہ بنایا گیا، جب فرانس کو سنسنی خیز مقابلے کے بعد پنالٹی شوٹ آؤٹ پر شکست ہوئی تھی
تاہم فرانس کی ٹیم کو عوام کی ایک بڑی تعداد کی جانب سے سراہا بھی گیا اور تقریباً پچاس ہزار لوگوں نے قطر سے واپس آنے کے بعد پلیس ڈی لا کانکورڈ میں کھلاڑیوں کا استقبال کیا
فرنچ فٹبال ٹیم نے ٹوئٹ کیا کہ ورلڈکپ فائنل کے اختتام پر فرانسیسی ٹیم کے کئی کھلاڑیوں کو سوشل میڈیا پر نسل پرستانہ اور ناقابل قبول نفرت انگیز ریمارکس کے ساتھ نشانہ بنایا گیا
مزید بتایا گیا کہ ایف ایف ایف ان افراد کی مذمت کرتا ہے اور ان کے خلاف شکایت درج کرائے گا، فرانسیسی کھلاڑی کومان کو دوسرے ہاف میں کوچ دیس چیمپس نے متعارف کروایا تھا، ان کا دفاع ان کے کلب سے پہلے ہی کیا جارہا ہے
ایف سی بائرن نے ٹوئٹ کرتے ہوئے نسل پرستی پر مبنی تبصروں کی شدید مذمت کی ہے، جس میں کنگسلے کومان کو نشانہ بنایا گیا تھا
ٹوئٹ میں مزید کہا گیا کہ ایف سی بائرن فیملی آپ کے پیچھے ہے، نسل پرستی کی کھیل اور معاشرے میں کوئی جگہ نہیں ہے
رپورٹ کے مطابق سیاست دانوں نے بھی فوری طور پر بدسلوکی کے حوالے سے رپورٹس پر اظہار مذمت کیا، حزب اختلاف کی سوشلسٹ پارٹی نے فرنچ فٹبال فیڈریشن پر زور دیا ہے کہ وہ اس حوالے سے شکایت درج کرائیں
وزیر برائے مساوات ایزابیل روم نے کہا ”یہ ناقابلِ قبول ہے، میں ان تبصروں کی شدید مذمت کرتی ہوں“
رپورٹ میں بتایا گیا کہ فرانس کی ٹیم کو نشانہ بنانے کا یہ عمل پہلی بار سامنے نہیں آیا۔ اس سے وبل ورلڈکپ فائنل میں ہیٹرک کرنے والے کائلیان ایمباپے کو اس وقت نشانہ بنایا گیا تھا، جب وہ یورو 2020ع میں سوئٹرزلینڈ کے خلاف شوٹ آؤٹ پر گول نہیں کر سکے تھے
خیال رہے کہ قطر میں کھیلے گئے فٹبال ورلڈ کپ 2022 کے فائنل میں ارجنٹینا نے فرانس کو سنسنی خیز مقابلے کے بعد پنالٹی شوٹ پر شکست دے دی تھی اور تیسری بار عالمی چیمپئن بن گیا
اضافی وقت میں بھی مقابلہ 3-3 گول سے برابر رہا تھا، میچ کا فیصلہ پنالٹی شوٹ پر ہوا، فرانس صرف 2 گول کرپایا جبکہ ارجنٹینا نے 4 گول کیے، یوں پنالٹی شوٹ میں میسی کی ٹیم نے مقابلہ 2-4 سے جیتا۔
