ارجنٹائن کے اسٹار فٹ بالر لیونل میسی ورلڈکپ جیتنے کے بعد سے مسلسل خبروں کی زینت بنے ہوئے ہیں، کبھی وہ کوئی ریکارڈ اپنے نام کر لیتے ہیں تو کبھی ان کا نام کسی نئے کلب سے جوڑا جا رہا ہوتا ہے
رواں سال ان کا کانٹریکٹ ان کے فٹبال کلب ’پاری سن ژرمن‘ (پی ایس جی) سے ختم ہو رہا ہے، جس کے بعد ان کے پاس سعودی کلب الہلال سمیت کئی فٹبال کلبوں سے کھیلنے کی آفر ہے۔ لیکن اسپینش ویب سائٹ اسپورٹ کے مطابق لیونل میسی اپنے کریئر کے اگلے دو سال گزارنے کے لیے بارسلونا کا رخ کرنے کا انتخاب کریں گے
اسپینش ویب سائٹ کے لیے لکھتے ہوئے ڈیوڈ برنبو نے انکشاف کیا کہ فٹبال کلب بارسلونا اور پینتیس سالہ لیونل میسی کے درمیان کئی ماہ سے مذاکرات چل رہے تھے اور دونوں ہی پرامید ہیں کہ اگلے سیزن میں میسی بارسلونا کی کٹ میں نظر آئیں گے۔ لیکن میسی کی واپسی کو یقینی بنانے کے لیے کلب اور کھلاڑی دونوں کو ’قربانیاں‘ دینا ہوں گی
کیونکہ ایک طرف انہیں سعودی عرب کے کلب سے تاریخ کی سب سے بڑی ڈیل کی آفر ہے تو دوسری جانب ان کا اولین کلب بارسلونا ہے، جہاں مالی مشکلات ہیں
رپورٹ کے مطابق لیونل میسی اپنی گزشتہ تنخواہ سے کم از کم چار گنا کم تنخواہ پر بارسلونا جانے کے لیے اس لیے رضامند ہو رہے ہیں کیوں کہ جس کلب سے کھیل کر وہ اسٹار بنے، وہ اس وقت مالی مشکلات سے دوچار ہے
لیونل میسی کے پاس اس سے بھی بڑی بڑی آفرز ہیں لیکن وہ بارسلونا کے ساتھ ایک ایسا کانٹریکٹ کرنے کے خواہش مند ہیں، جس سے دونوں پارٹیوں کو فائدہ ہو۔ میسی نے 2021 میں پی ایس جی جوائن کرنے سے پہلے 19 سال بارسلونا کی نمائندگی کی اور ان کی آخری تنخواہ 100 ملین یوروز سالانہ کے لگ بھگ تھی۔ اطلاعات کے مطابق سعودی کلب انہیں چار سو ملین یورو سالانہ کی آفر کر چکا ہے
تاہم حیران کن طور پر اگر بارسلونا سے ان کا کانٹریکٹ فائنل ہو گیا تو وہ 25 ملین یورووز سالانہ پر زیادہ سے زیادہ دو اور کم سے کم ایک سال کے لیے واپس بارسلونا کا حصہ بن سکتے ہیں
یہ پہلا موقع نہیں ہوگا جب لیونل میسی نے کلب کے خراب مالی حالات کی وجہ سے تنخواہ میں کٹوٹی پر رضامندی ظاہر کی ہو۔ سن 2019ع میں کرونا کی وجہ سے بھی انہوں نے سو ملین یوروز کے بجائے 73 ملین یوروز پر اکتفا کیا تھا۔ تاہم اس کے اگلے ہی سال وہ فری ٹرانسفر پر پی ایس جی اس لیے چلے گئے تھے کیوں کہ مالی مشکلات کی وجہ سے بارسلونا ان کے اخراجات برداشت نہیں کر پا رہا تھا
ویسے تو دو سال گزرنے کے باوجود بارسلونا میسی کے ساتھ بڑا معاہدہ کرنے کی پوزیشن میں نہیں ہے۔ تاہم رپورٹس کے مطابق اس بار وہ میسی کو واپس لانے کے لیے ہر ممکن کوشش کر رہے ہیں
فٹبال کلب بارسلونا کے صدر یوان لاپورتا تو پرامید ہیں کہ سات مرتبہ بیلن ڈو اور جیتنے والے فٹبالر کو واپس بلانے میں کامیاب ہو جائیں گے تاہم اسپینش فٹ بال لیگ لا لیگا کے صدر ہاویئرتیباس کے خیال میں ایسا کرنے کے لیے بارسلونا کو کئی درست فیصلے کرنے پڑیں گے
ان کا کہنا تھا کہ دوسروں کی طرح وہ بھی میسی کے مداح ہیں اور چاہیں گے کہ اسٹار فٹبالر دوبارہ اسپینش فٹبال سرکٹ کا حصہ بنیں لیکن ایسا کرنے کے لیے وہ قوانین میں کسی قسم کی تبدیلی نہیں کریں گے، جو کرنا ہوگا وہ بارسلونا کو کرنا ہوگا
انگلش اخبار ڈیلی میل نے گزشتہ ماہ رپورٹ کیا تھا کہ لالیگا کے قوانین پر پورا اترنے کے لیے فٹبال کلب بارسلونا کسی نامور کھلاڑی کو فروخت کرنے کی کوشش کرے گا تاکہ ان دو سو ملین یوروز کا انتظام ہو سکے جو ان کے پاس ہونے چاہیے
ادھر بارسلونا کے اسٹار کھلاڑی جورڈی ایلبا نے لیونل میسی کی ممکنہ واپسی پر خوشی کا اظہار کرتے ہوئے کہا کہ یہ کلب اور مداحوں کے لیے بہترین خبر ہے
معروف فٹ بال ویب سائٹ گول سے گفتگو کرتے ہوئے ان کا کہنا تھا ”میسی کو کسی اور کلب کی شرٹ میں دیکھ کر ہمیں ہمیشہ ہی عجیب لگتا تھا، اور ہم پرامید ہیں کہ اس بار وہ واپس بارسلونا آنے کا درست فیصلہ کریں گے۔“
