لاس ویگاس – زراعت اور کاشت کاری کے لیے آلات تیار کرنے والی کمپنی جان ڈیئری نے ایک ایسا ٹریکٹر متعارف کروایا ہے جو خودکار ڈرائیونگ کی صلاحیت کا حامل ہے
اس ٹریکٹر کو کسان اسمارٹ فون کے ذریعے کنٹرول کرسکیں گے جبکہ وہ دن بھر چوبیس گھنٹے کام کرسکے گا
کمپنی کی جانب سے 8 آر ٹریکٹر کو لاس ویگاس میں سی ای ایس نمائش کے دوران پیش کیا گیا
اس ٹریکٹر کی آزمائش 2019ع سے امریکا میں چند کسان کررہے تھے اور اب جاکر اسے دنیا کے سامنے پیش کیا گیا ہے
اس ٹریکٹر میں چھ کیمرے اور مصنوعی ذہانت (اے آئی) کی ٹیکنالوجی کا استعمال کیا گیا ہے، تاکہ یہ زمین پر اپنی پوزیشن کو چیک کرتے ہوئے اپنے راستے میں کسی چیز کے سامنے آنے پر رک جائے
کمپنی کا کہنا ہے کہ یہ کیمرے اور کمپیوٹرز ٹریکٹر کی بیرونی باڈی پر ایک دن میں نصب کیے جاسکتے ہیں
کمپنی کے مطابق اس سال وہ بیس ٹریکٹر فروخت کرے گی، تاہم ابھی تک اس کے خودکار سسٹم کی قیمت کا اعلان نہیں کیا گیا
کمپنی نے بتایا کہ عالمی سطح پر افرادی قوت کی قلت کا بحران زیادہ بدتر ہوگیا ہے اور زرعی شعبے کو لوگوں کی کمی کا سامنا ہے، ان حالات میں اس طرح کی ٹیکنالوجی سے لیس ٹریکٹر زرعی پیداوار کو بڑھانے میں مددگار ثابت ہونگے
کمپنی نے بتایا کہ کسانوں کو متعدد چیلنجز جیسے بدلتے موسم، مٹی کے معیار، بیجوں اور کیڑے مار ادویات کے انتظامات کا سامنا ہے، جس کے نتیجے میں زرعی پیداوار کی صلاحیت متاثر ہوتی ہے
یہ نیا ٹریکٹر دور رہتے ہوئے بھی اسمارٹ فون سے کنٹرول کیا جاسکے گا اور بیجوں کو بونے مں بھی مدد فراہم کرے گا
اسے سب سے پہلے امریکا میں ہی فروخت کے لیے پیش کیا جارہا ہے، لیکن دیگر ملکوں میں اس کی دستیابی کے حوالے سے کمپنی نے فی الحال کچھ نہیں بتایا.
