گوگل میپ دنیا میں راستے تلاش کرنے کے لیے سب سے زیادہ مقبول سروس ہے۔ اس کا مقصد نئے لوگوں کو اپنی منزل اور سیاحتی دوروں کے دوران مدد فراہم کرنا ہے۔ گوگل میپ کی سہولت جتنی آسان ہے، اسی قدر مفید بھی ہے
پاکستان سمیت دنیا بھر میں لوگ آج کل ٹریفک جام سے بچنے یا جلد سے جلد اپنی منزل تک پہنچنے کے لیے گوگل میپ کا استعمال کرتے ہیں
نہ صرف عام لوگ بلکہ آن لائن سفری سہولیات فراہم کرنے والی کمپنیاں اور پیدل چلنے والے افراد بھی ہر وقت اپنے موبائل پر گوگل میپ یا لوکیشن کو کھلا رکھتے ہیں تاکہ انہیں ایک سے دوسری جگہ پہنچنے میں آسانی ہو
گوگل میپ جہاں لوگوں کو اپنی منزل کا درست راستہ دکھانے میں مدد فراہم کرتا ہے وہیں یہ فیچر لوگوں کو یہ بھی بتاتا ہے کہ راستے میں کس جگہ کتنا ٹریفک ہے اور کون سا راستہ اس وقت ٹریفک سے خالی ہے
لیکن گوگل میپ سے راستہ ڈھونڈنا اب مزید آسان ہو گیا ہے۔ حال ہی میں گوگل نے اپنی اس مقبول ترین سروس میپس میں صارفین کی آسانی کے لیے نیا فیچر متعارف کروا لیا ہے
امریکا میں ٹیکنالوجی کی ویب سائٹ دی ورج کی رپورٹ کے مطابق گوگل کی جانب سے نئے فیچر کا نام امرسیو ویو فار روٹ (Immersive View for routes) کا نام دیا گیا ہے
یہ نیا فیچر تھری ڈی ڈیزائن ہے، جس کی مدد سے آپ باآسانی اپنی منزل تک پہنچ سکتے ہیں اس کے ساتھ ساتھ نئے فیچر کے تحت آپ ٹریفک کی معلومات بھی حاصل کر سکتے ہیں
اس نئے فیچر کی ایک اور خاص بات یہ ہے کہ راستہ تلاش کرنے کے دوران سڑکوں کا تھری ڈی منظر وسیع اور واضح نظر آئے گا، جس کی مدد سے صارفین بہتر طریقے سے راستہ سمجھ سکتے ہیں
اس کے علاوہ گوگل میپ سڑک کی موجودہ صورت حال کا صحیح اندازہ دینے کے لیے ٹریفک کی صورتحال بھی دکھائے گا
یہ فیچر اگلے ماہ میں سے لانچ کیا جائے گا۔ یہ فیچر پہلے مرحلے میں ایمسٹرڈیم، برلن، ڈبلن، فلورنس، لاس ویگاس، لندن، لاس اینجلس، میامی، نیو یارک سٹی، پیرس، سان فرانسسکو، سان ہوزے، سیئٹل، ٹوکیو اور وینس سمیت صرف پندرہ شہروں کے لیے شروع کیا جائے گا۔
اس فیچر کی اچھی بات یہ ہے کہ اس سے آئی فون کے علاوہ اینڈرائڈ صارفین بھی فائدہ اٹھا سکیں گے۔
